رىن فاميليالى وتباسىنداعىلارمەن بىرگە ساقشىلارعا العىس تۋ ۇسىنۋدا 

   وماربەك قىزىرقان ۇلى، ەرلان ماناپ ۇلى حابارلايدى. تاياۋدا ساۋان اۋدانى دۇڭۋان قالاشىعى كازىۋان قىستاعىنىڭ رىن فاميليالى تۇرعىنى وتباسىنداعىلارمەن بىرگە «حالىق ساقشىلارى حالىق قامىن ويلاپ، مىندەتتەرىن ادا ەتتى» دەگەن ايشىقتى جازۋ جازىلعان العىس تۋدى قالاشىق ساقشى بولىمشەسىندەگى حالىق ساقشىلارىنا ۇسىنىپ، ولارعا دەگەن شەكسىز العىسىن ءبىلدىردى. وسى ءبىر العىس تۋدىڭ استارىندا حالىقتىڭ قورعاۋشى قامالى اتالعان حالىق ساقشىلارى مەن حالىق بۇقاراسى اراسىنداعى شەكسىز سۇيىسپەنشىلىك مەن مۇندالايدى. وسىدان بىرنەشە كۇننىڭ الدىنداعى ءبىر كۇنى تۇسكە تاياۋ رىن فاميليالىنىڭ 62 جاستاعى شەشەسى ۇيىنەن شىعىپ كەتىپ ارتىنان بالالارى ىزدەپ تابا الماعان سوڭ قالاشىق ساقشى بولىمشەسىنە جاعدايدى مالىمدەپ كومەك سۇرايدى. حالىقتىڭ مۇددەسى مەن باس اماندىعىن بارىنەن جوعارى قوياتىن بولىمشەدەگى ساقشىلار دەرەۋ وسى قىستاققا بارىپ رىن فاميليالىدان احۋال ۇعىسۋ ارقىلى اجەيدىڭ ەس اقىلىنىڭ ونشا دۇرىس ەمەستىگىن، ۇيىنەن شىعىپ كەتكەنىنە 6 ساعاتتاي بولعاندىعىن، دەرەۋ ىزدەپ تاپپاسا اجەيدىڭ ءۇسىنىپ قالۋى، ءتىپتى ومىرىنە حاۋىپ ءتونۋىنىڭ ابدەن مۇمكىندىگىن تۇجىرىمداپ، دەرەۋ قىستاق كادرلارىن قىستاق راديوسىندا، قىستاق تۇرعىندارىن قولفون ءۇنحات شوعىرىندا اجەيگە ىزدەۋ سالۋعا ۇيىمداستىرادى، ءبىر ساعاتتاي ۋاقىتتان كەيىن ساقشىلار مال ىزدەپ جۇرگەن ءبىر مالشىنىڭ بەرگەن دەرەگىنە نەگىزدەلىپ كازىۋان قىستاعىنىڭ سولتۇستىگىندەگى 20 شاقىرىمنان استام شالعايدعى قىستاۋلىق ماڭىنداعى ەلەكتر باعاناسىنىڭ تۇبىندە بۇكشىيىپ جاتقان اجەيدى تاۋىپ الىپ ساقشى كولىگىمەن قالاشىق شيپاحاناعا اپارىپ تەكسەرتكەندە اجەيدە ءبىراز توڭازىعانى بولماسا، دەنساۋلىعىندا وزگەشە حاۋىپتى احۋال بولماعاندىعىن تۇراقتاندىرعاننان كەيىن، ۇيىنە اپارىپ، وتباسىنداعىلارعا امان ساۋ تابىس ەتەدى. دۇڭۋان ساقشى بولىمشەسىندەگى حالىق ساقشىلارى قاقاعان ايازدا 8 ساعاتتان استام قۇلشىنىس جاساۋ ارقىلى اجەيدى ءساتتى قۇتقارىپ، بۇقارانىڭ القاۋىنا بولەندى.