شي جينپيڭ پولشانىڭ پرەزيدەنتىمەن تەلەفوندا سويلەستى
ٴوز حابارىمىز: مەملەكەت ءتوراعاسى شي جينپيڭ 3 - ايدىڭ 1 -كۇنى كەشتە پولشانىڭ پرەزيدەنتى دۋدامەن تەلەفوندا سويلەستى.
شي جينپيڭ مىنالاردى اتاپ كورسەتتى: پولشا _ _ ورتا شىعىس ەۆروپا وڭىرىندەگى ٴىرى ەل جانە ەۆروپا وداعىنىڭ ماڭىزدى مۇشەسى، سونداي ـ اق جۇڭگونىڭ ەۆروپاداعى جان ـ جاقتى ستراتەگيالىق سەرىگى. جۇڭگو ەجەلدەن جۇڭگو-پولشا قاتىناسىنىڭ دامۋىنا وسكەلەڭ ٴمان بەرىپ كەلەدى. ىندەت تۋىلعاننان كەيىن، جۇڭگو مەن پولشا ءبىر - بىرىنە قارايلاسىپ، جۇقپالى اۋرۋدان ساقتانۋ جانە ونى تىزگىندەۋ، جۇمىستى، ءوندىرىستى قالپىنا كەلتىرۋ سياقتى جاقتاردا تاماشا سەلبەستىك ورىستەتىپ، ەكى ەل دوستىعىنىڭ تىڭ داستانىن جازدى. قازىرگى جاعدايدا جۇڭگو مەن پولشا ستراتەگيالىق سۇحباتتى كۇشەيتىپ، ناقتى سەلبەستىكتى تەرەڭدەتىپ، ٴتۇرلى حاۋىپ ـ قاتەرلەر مەن سىن ـ سايىستارعا بىرگە توتەپ بەرۋدى ٴتىپتى دە قاجەت ەتەدى. جۇڭگو پولشامەن بىرگە جۇڭگو ـ پولشا قاتىناسىنىڭ جاڭا جىلدا ورنىقتى، باياندى دامۋىن ىلگەرىلەتۋدى قالايدى.
شي جينپيڭ مىنالاردى باسا دارىپتەدى: جۇڭگو پولشامەن بىرلەسىپ ساقتانۋ، بىرلەسىپ تىزگىندەۋ جانە ىندەتتەن ساقتانۋ جانە ونى ەمدەۋ تاجىريبەلەرىندە اۋىس-كۇيىس جاساۋدى ۇزدىكسىز كۇشەيتۋدى، سونىمەن بىرگە ادامداردىڭ بارىس ـ كەلىسىن ورنىقتى، ٴتارتىپتى تۇردە قالپىنا كەلتىرۋدى قالايدى. جۇڭگو پولشانىڭ قاجەتىنە ساي، مۇمكىندىكتىڭ بارىنشا پولشاعا ۆاكسينا ونىمدەرىن بەرۋدى قالايدى. ىندەت كەزىندە جۇڭگو ـ ەۆروپا كەزەكشى پويەزىنىڭ قاتىناۋ مولشەرى مەن جۇك تاسىمال مولشەرى تاريحتاعى ەڭ جوعارى دەڭگەيگە جەتىپ، جۇڭگو ـ پولشا، جۇڭگو ـ ەۆروپا قامداۋ تىزبەگى مەن كاسىپ تىزبەگىنىڭ جوعارى دارەجەدە ٴبىر ـ بىرىنە سۇيەنەتىندىگىن، سونداي ـ اق ەكى جاقتىڭ ەكونوميكا ـ ساۋدا سەلبەستىگىنىڭ كومەسكى كۇشىنىڭ وراسان زور ەكەندىگىن ايگىلەدى. جۇڭگو الدا جۇڭگو ـ ورتا شىعىس ەۆروپا ەلدەرى سەلبەستىگى جۇلگەسىندەگى قاتىستى مەحانيزمدەردى ورناتۋ ارقىلى پولشانىڭ اناعۇرلىم كوپ ساپالى اۋىل شارۋاشىلىق ونىمدەرىن يمپورت ەتۋدى ىلگەرىلەتەدى. جۇڭگو مەن ەۆروپا قارجى قوسۋ كەلىسىمى كەلىسسوزىن ورىنداپ، جۇڭگو مەن پولشا سەلبەستىگىنە اناعۇرلىم كەڭ ٴورىس اشادى.
شي جينپيڭ مىنالاردى اتاپ كورسەتتى: تاياۋدا جۇڭگو ـ ورتا شىعىس ەۆروپا ەلدەرى باسشىلارىنىڭ بەينە ەكران باسشىلار ٴماجىلىسى ٴساتتى وتكىزىلدى، مەن سىزبەن جانە باسقا دا ٴار ەل باسشىلارىمەن جۇڭگو ـ ورتا شىعىس ەۆروپا ەلدەرى سەلبەستىگىنىڭ دامۋ بارىسىن جان ـ جاقتى ەسكە الىپ، دامۋ تاجىريبەلەرىن ىشكەرىلەي قورىتىندىلاپ، دامۋ بولاشاعىنا بىرگە نازار اۋدارىپ، كەڭ كولەمدى ورتاق تانىمعا كەلىپ، سەلبەستىك مەحانيزمى جاعىندا ماڭىزدى جوبا جاساپ جانە جەتەكشىلىك ەتۋگە كۇش سالامىن. جۇڭگو پولشامەن بىرگە قۇلشىنىپ، وسى رەتكى باسشىلار باس قوسۋىن جاڭا باستاما ەتىپ، جۇڭگو ـ ورتا شىعىس ەۆروپا ەلدەرى سەلبەستىگىن جانە جۇڭگو ـ ەۆروپا قاتىناسىن ىلگەرىلەتۋدە اناعۇرلىم كوپ تابىستارعا قول جەتكىزۋدى قالايدى.
دۋدا بىلاي دەدى: ٴتوراعا شي جينپيڭنىڭ 2016 ـ جىلعى پولشاداعى مەملەكەتتىك ساپارى پولشا ـ جۇڭگو قاتىناسىنىڭ دامۋىن پارمەندى جەبەدى. تاياۋدا ٴتوراعا شي جينپيڭ ورتا شىعىس ەۆروپا ەلدەرى مەن جۇڭگو باسشىلارىنىڭ بەينە ەكران باسشىلار ٴماجىلىسىن ٴساتتى باسقارىپ اشتى، بۇل ورتا شىعىس ەۆروپا ەلدەرىنىڭ جۇڭگومەن سەلبەستىگىن جەبەپ، ورتا شىعىس ەۆروپا ەلدەرىنىڭ جۇقپالى اۋرۋدان كەيىنگى ەكونوميكانىڭ قالپىنا كەلۋىن جۇزەگە اسىرۋىنا دەم بەرۋدە توتەنشە ماڭىزدى. پولشا ٴتوراعا شي جينپيڭنىڭ جۇڭگونىڭ جاڭا تيپتى ايدارشا ۆيرۋسپەن جۇعىمدالعان وكپە قابىنۋ اۋرۋىنا قارسى ۆاكسيناسىن الەمدىك الەۋمەتتىك ٴونىم ەتۋگە كۇش سالعاندىعىن ايرىقشا القايدى ٴارى ورتا شىعىس ەۆروپا ەلدەرىمەن ۆاكسينا سەلبەستىگىن ورىستەتۋدى قالايدى. بۇل جۇڭگونىڭ ءتوراعا شي جينپيڭنىڭ باسشىلىعىندا جاۋاپكەرلىك ارقالايتىن ءىرى ەلدىك رولىن ساۋلەلەندىرگەنىن دالەلدەدى. پولشا جۇڭگومەن ىندەتكە قارسى تۇرۋ سەلبەستىگىن كۇشەيتۋدى قالايدى. جۇڭگو ـ ەۆروپا كەزەكشى پويەزى ىندەتكە قارسى تۇرۋ جاعىندا ماڭىزدى رول اتقاردى. ەكى جاقتىڭ ٴار سالاداعى ادامداردىڭ بارىس ـ كەلىسى مەن سەلبەستىگىن ۇزدىكسىز ساقتاپ، ەكى جاقتى ساۋدانىڭ بىركەلكى ارتۋىن جەبەۋىن ٴۇمىت ەتەمىن. پولشا ورتا شىعىس ەۆروپا ەلدەرىنىڭ جۇڭگومەن سەلبەستىگىنە ۇزدىكسىز ۇلەس قوسۋدى قالايدى. جۇقپالى اۋرۋدان كەيىن جۇڭگوعا تاعى دا ساپارلاي بارۋدى ٴۇمىت ەتەمىن، ٴتوراعا شي جينپيڭمەن قويۋ دوستىق بارىس ـ كەلىستى ساقتاپ، پولشا ـ جۇڭگو قاتىناسىنىڭ تىڭ ساتىعا كوتەرىلۋىن بىرگە جەبەۋدى قالايمىن.
اۋدارعان: نازار ٴارىپ ۇلى
