شي جينپيڭ مەن بەلورۋسسيانىڭ پرەزيدەنتى جۇڭگو مەن بەلورۋسسيانىڭ ديپلوماتيالىق قاتىناس ورناتقاندىعىنىڭ 30 جىلدىعى جونىندە ٴوزارا قۇتتىقتاۋ تەلەگرامما جولدادى
ٴوز حابارىمىز. 2022 ـ جىلى 1-ايدىڭ 20-كۇنى مەملەكەت ٴتوراعاسى شي جينپيڭ مەن بەلورۋسسيانىڭ پرەزيدەنتى لۋكاشەنكو ٴوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قاتىناس ورناتقاندىعىنىڭ 30 جىلدىعىن قۇتتىقتادى. شي جينپيڭ مىنالاردى اتاپ كورسەتتى: ديپلوماتيالىق قاتىناس ورناتقان 30 جىلدان بەرى، جۇڭگو ـ بەلوروسسيا قاتىناسى ۇدەرە العا تارتىپ، ەكى ەلدىڭ ٴداستۇرلى دوستىعى ۋاقىت وتكەن سايىن بەكەمدەلە ٴتۇستى. ٴبىزدىڭ بىرگە جەتەكشىلىك ەتۋىمىزدە، جۇڭگو مەن بەلوروسسيا ىلگەرىندى ـ كەيىندى جالپى بەتتىك ستراتەگيالىق سەرىكتەستىك قاتىناس جانە ٴوزارا سەنىم ارتاتىن، سەلبەسىپ تەڭ يگىلىككە كەنەلەتىن جالپى بەتتىك ستراتەگيالىق سەرىكتەستىك قاتىناس ورناتتى. ەكى جاقتىڭ ساياسي سەنىمدىلىگى بەرىك، ٴار سالاداعى سەلبەستىگى سۇبەلى تابىستارعا قول جەتىپ، ٴبىر-ٴبىرىنىڭ وزەكتى مۇددەسىنە ساياتىن ماسەلەلەردە ٴبىرىن ـ ٴبىرى باتىل قولداپ، حالىقارالىق جانە وڭىرلىك ىستەردە ٴونىمدى سەلبەستىكتى نىعايتتى. جۇقپالى اۋرۋ تارالعاننان كەيىن، ەكى ەل ٴبىر-بىرىنە قارايلاسىپ، قول ۇستاسا توتەپ بەرىپ، جاپا ـ ماشاقاتتا بىرگە بولعان تۋىسقاندىق سۇيىسپەنشىلىكتى ايگىلەدى.
شي جينپيڭ مىنالاردى باسا دارىپتەدى: تاياۋ جىلداردان بەرى، مەن لۋكاشەنكو پرەزيدەنتپەن ٴتۇرلى فورمالارمەن كەڭەسىپ، جاڭا جاعدايداعى جۇڭگو ـ بەلوروسسيا قارىم-قاتىناسى جونىندە ماڭىزدى ورتاق تانىمعا كەلدىك. مەن جۇڭگو-بەلوروسسيا قاتىناسىنىڭ دامۋىنا ايرىقشا ٴمان بەرەمىن، لۋكاشەنكو پرەزيدەنتپەن بىرگە قۇلشىنىپ، ەكى ەلدىڭ ديپلوماتيالىق قاتىناس ورناتقاندىعىنىڭ 30 جىلدىعىن وراي ەتىپ، جۇڭگو مەن بەلورۋسسيانىڭ جان-جاقتى ستراتەگيالىق سەرىكتەستىك قاتىناسىندا جانە «ٴبىر بەلدەۋ، ٴبىر جولدى» بىرگە قۇرۋ سەلبەستىگىندە اناعۇرلىم كوپ جەتىستىكتەرگە قول جەتكىزۋدى ىلگەرىلەتىپ، ەكى ەلگە جانە ەكى ەل حالقىنا باقىت جاراتۋدى قالايمىن.
لۋكاشەنكو بىلاي دەدى: 30 جىلدا بەلورۋسسيا ـ جۇڭگو قاتىناسى دوستىق سەلبەستىك قاتىناسىنان ٴوزارا سەنىم ارتاتىن، سەلبەسىپ تەڭ يگىلىككە كەنەلەتىن جالپى بەتتىك ستراتەگيالىق سەرىكتەستىك قاتىناسقا كوتەرىلىپ، ەكى ەلدىڭ ٴار سالاداعى سەلبەستىگىندە سۇبەلى تابىستارعا قول جەتتى. ەكى ەل حالقىنىڭ شىنايى دوستىق، ٴوزارا قولداۋ رۋحىن ۇرپاقتان-ۇرپاققا جالعاستىراتىندىعىنا سەنەمىن.
اۋدارعان: كۇلان ىرىسباي قىزى
