شي جينپيڭ مىنالاردى اتاپ كورسەتتى: ٴسىز ج ك پ 20-قۇرىلتايىنان كەيىن لاتىن امەريكاسى جانە كارايب رايونىنان جۇڭگوعا تۇڭعىش ساپارلاي كەلگەن مەملەكەت باسشىسىسىز، بۇل جۇڭگو مەن كۋبا پارتيالارىنىڭ، ەلدەرىنىڭ ەرەكشە دوستىق قاتىناسىن تولىق ايگىلەدى. كۋبا باتىس جارتى شارداعى جاڭا جۇڭگومەن تۇڭعىش ديپلوماتيالىق قاتىناس ورناتقان مەملەكەت، جۇڭگو-كۋبا قاتىناسى سوتسياليستىك ەلدەردىڭ ىنتىماقتاسا سەلبەسۋىنىڭ، وركەندەۋ جولىنداعى ەلدەردىڭ ٴءوزارا شىنايى كومەكتەسۋىنىڭ ۇلگىسىنە اينالدى. جۇڭگو كۋبامەن ساياسي سەنىمدىلىكتى ۇزدىكسىز تەرەڭدەتىپ، ناقتى سەلبەستىكتى كەڭەيتىپ، ٴبىر-ٴبىرىنىڭ وزەكتى مۇددەسىنە ساياتىن ماسەلەلەردە ٴبىر-ٴبىرىن باتىل قولداپ، حالىقارالىق جانە وڭىرلىك ىستەردە سايكەسۋدى، سەلبەسۋدى كۇشەيتىپ، ٴوز ەلىنىڭ جۇڭگوشا سوتسياليزم ىستەرىن قۇرۋ جولىندا قول ۇستاسا العا باسىپ، جاڭا داۋىردەگى جۇڭگو-كۋبا قاتىناسىن ۇزدىكسىز تەرەڭدەتۋدى قالايدى.

 

 شي جينپيڭ ج ك پ 20-قۇرىلتايىنىڭ ماڭىزدى جەتىستىكتەرىن تانىستىرىپ، مىنالاردى باسا دارىپتەدى: جۇڭگو كوممۋنيستىك پارتياسى بۇكىل ەلدەگى ٴءار ۇلت حالقىن ىنتىماقتاستىرىپ جانە باستاپ، جۇڭگو ۇلگىسىندەگى وسىزاماندانۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتتى، ءٴبىز پارتيانىڭ جاپپاي باسشىلىعىن كۇشەيتۋگە تاباندى بولامىز، جۇڭگوشا سوتسياليزم جولىنان اۋىتقىمايمىز، حالىقتى وزەك ەتكەن دامۋ يدەياسىنا، رەفورما جاساۋدى، ەسىك اشۋدى تەرەڭدەتۋگە، كۇرەس رۋحىن ساۋلەلەندىرۋگە تاباندى بولامىز، مەملەكەت پەن ۇلتتى دامىتۋدا ٴوز كۇشىمىزدى تياناق ەتىپ، جۇڭگونىڭ دامۋ، العا باسۋ تاعدىرىن ٴوز قولىمىزدا بەرىك ۇستايمىز. جۇڭگو-كۋبا پارتيالارى تىعىز بايلانىستى ساقتاپ، ەكى پارتيانىڭ نازاريالىق زەرتتەۋ-تالقى ٴماجىلىسى سياقتى مەحانيزمدەردەن ويداعىداي پايدالانىپ، اۋىس-كۇيىستى، ٴوزارا ۇلگى الۋدى كۇشەيتىپ، سوتسياليستىك نازاريادا جاڭالىق اشۋدى جانە امالياتتىق العا باسۋدى قول ۇستاسا ىلگەرىلەتىپ، ماركسيزمنىڭ جەرگىلىكتەنۋىنىڭ، زامانالانۋىنىڭ جاڭا ٴورىسىن بىرگە اشىپ، وزدەرىنىڭ مەملەكەت جاعدايىنا ۇيلەسەتىن سوتسياليزمدى ويداعىداي قۇرۋلارى كەرەك.

 

 شي جينپيڭ مىنالاردى باسا دارىپتەدى: جۇڭگو مەن كۋبا ءٴبىر-بىرىنە سەنەتىن تاتۋ دوستار، مۇراتتاس جاقسى جولداستار، جاپا-ماشاقاتتى بىرگە وتكەرگەن ەتەنە باۋىرلاستار. جۇڭگو مەن كۋبانىڭ ٴداستۇرلى دوستىعىن اعا بۋىن باسشىلار قول ۇستاسا ورناتقان ٴارى دەن قويا جەتىلدىرگەن. ديپلوماتيالىق قاتىناس ورناتقان 62 جىلدان بەرى، اۋمالى-توكپەلى حالىقارالىق جاعدايدا، جۇڭگو مەن كۋبا ٴبىر-بىرىنە ادال دوستىقتى مىزعىماستان تەرەڭدەتىپ، ٴوزارا پايدا جەتكىزىپ، تەڭ يگىلىككە كەنەلەتىن سەلبەستىكتى تاباندى ورىستەتىپ، رەفورمالاۋ مەن دامۋ ىستەرىندە سەرىكتەس بولۋدان اينىمادى. جۇڭگو جاق ەكى ەل پارتيالارىنىڭ، ەكى ەلدىڭ قاتىناسىنا باستان-اياق ستراتەگيالىق تۇرعىدان مامىلە جاساپ جانە ونى دامىتىپ، جۇڭگو-كۋبا قاتىناسىن قاي-قاشان دا ديپلوماتيالىق جالپى جاعدايدىڭ ەرەكشە ورنىنا قويىپ كەلەدى. حالىقارالىق جاعداي قالاي وزگەرسە دە، جۇڭگونىڭ ەكى ەلدىڭ باياندى دوستىعىنا تاباندى بولۋ باعىتى وزگەرمەيدى، كۋبانىڭ سوتسياليزم جولىمەن ٴجۇرۋىن قولداۋ بەكىمى وزگەرمەيدى، كۋبامەن بىرگە حالىقارالىق ادىلدىكتى، تۋراشىلدىقتى قورعاۋ، زورەكەرلىككە قارسى تۇرۋ ەركى وزگەرمەيدى. جاڭا جاعدايدا، ەكى جاق ستراتەگيالىق سەلبەستىكتى كۇشەيتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ بارىسىندا جۇڭگو-كۋبا تاعدىرلاس ورتاق تۇلعاسىن قول ۇستاسا بىرگە قۇرۋلارى كەرەك. جۇڭگو كۋبانىڭ مەملەكەتتىڭ يەلىك ۇقىعىن قورعاۋىن ۇزدىكسىز باتىل قولداپ، سىرتتىڭ كيلىگۋى مەن قۇرساۋلاۋىنا قارسى تۇرادى، كۋبامەن بىرگە الەمدىك دامۋ دارىپتەمەسىن، الەمدىك حاۋىپسىزدىك دارىپتەمەسىن تياناقتاندىرۋدى قول ۇستاسا ىلگەرىلەتىپ، دۇنيە ٴجۇزىنىڭ بەيبىتشىلىگى مەن دامۋىن بىرگە جەبەۋدى قالايدى. كەزەكتە كۋبا اسا زور سايىسقا تاپ بولدى. سوتسياليزم ىستەرى ەجەلدەن ەرلىكپەن ءٴورىس اشۋ بارىسىندا العا باسىپ كەلەدى، ٴءبىز كۋبانىڭ بارلىق قيىنشىلىقتى، ٴءسوز جوق، جەڭەتىندىگىنە كامىل سەنەمىز ءٴارى كۋباعا بارىنشا قولداۋ كورسەتەمىز جانە كومەكتەسەمىز. جۇڭگو كۋبامەن ٴار سالاداعى ناقتى سەلبەستىكتى تەرەڭدەتىپ، ”ٴبىر بەلدەۋ، ٴبىر جولدى“ بىرگە قۇرۋ سەلبەستىك جوباسىن ويداعىداي تياناقتاندىرىپ، سوتسياليستىك وسىزامانداندىرۋ قۇرىلىسىن قول ۇستاسا ىلگەرىلەتۋدى قالايدى.

 

 شي جينپيڭ مىنالاردى اتاپ كورسەتتى: جۇڭگو مەن لاتىن امەريكاسىنىڭ سەلبەستىگى ماندىك جاقتان العاندا وڭتۇستىكتەگىلەر سەلبەستىگى، بۇل ٴوزارا قۇرمەت ەتۋدى العى شارت، ٴوزارا پايدا جەتكىزىپ، تەڭ يگىلىككە كەنەلۋدى پرينسيپ، اشىق، سيىسىمدى بولۋدى ەرەكشەلىك، بىرگە دامۋدى نىسانا ەتكەن، دۇنيە ٴجۇزىنىڭ جالپى اۋقىمى مەن تاريحتىڭ اعىمىنا سايكەسەدى، وڭىردەگى ەلدەردىڭ ورتاق مۇددەسىنە ۇيلەسەدى. قازىر لاتىن امەريكاسى مەن كارايب وڭىرىنىڭ ساياسي جاعدايى جاڭا كەزەكتى تەرەڭ رەتتەۋدى باستان كەشىرۋدە. جۇڭگو جاق جۇڭگو-لاتىن امەريكاسى قاتىناسىنىڭ دامۋىنا وسكەلەڭ ءٴمان بەرەدى، كۋبانى قامتىعان لاتىن امەريكاسى جانە كارايب وڭىرى ەلدەرىمەن بىرگە ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى ىشكەرىلەي ىلگەرىلەتىپ، تەڭ تۇرعىدا ءٴوزارا پايدا جەتكىزەتىن، بىرگە داميتىن جۇڭگو-لاتىن امەريكا جان-جاقتى سەلبەستىك سەرىكتەستىك قاتىناسىنىڭ جاڭا داۋىردە اناعۇرلىم جاقسى دامۋىن ىلگەرىلەتۋدى، جۇڭگو مەن لاتىن امەريكا حالقىن اناعۇرلىم مول باقىتقا كەنەلتۋدى قالايدى.

 

 دياز.كانەل ٴتوراعا شي جينپيڭنىڭ جۇڭگو كوممۋنيستىك پارتياسىنىڭ 20-قۇرىلتايى ٴساتتى اشىلعاننان كەيىن، ٴوزىن لاتىن امەريكاسىنداعى تۇڭعىش مەملەكەت باسشىسى رەتىندە جۇڭگوعا ساپارلاي كەلۋگە ۇسىنىس ەتكەنىنە شىن جۇرەكتەن العىس ايتتى، كۋبا پارتياسى مەن مەملەكەتى اتىنان جۇڭگو كوممۋنيستىك پارتياسى 20-قۇرىلتايىنىڭ جەڭىسپەن اشىلعاندىعىن تاعى دا قىزۋ قۇتتىقتادى، ٴتوراعا شي جينپيڭنىڭ جۇڭگو كوممۋنيستىك پارتياسى ورتالىق كوميتەتىنىڭ باس شۋجيى بولىپ جالعاستى تاعايىندالعاندىعىن قىزۋ قۇتتىقتادى، جۇڭگونىڭ ٴتوراعا شي جينپيڭنىڭ باسشىلىعىندا جۇڭگوشا سوتسياليزم ىستەرىن ىلگەرىلەتۋدە تاريحي تابىستارعا قول جەتكىزگەندىگىن قىزۋ قۇتتىقتاپ، دۇنيە جۇزىندەگى العاباسار كۇشتەر بۇدان تەرەڭ شابىت الادى،-دەدى. دياز.كانەل بىلاي دەدى: مەن جانە كۋبا پارتياسىنىڭ جوعارى جىكتەگىلەرى ٴسىزدىڭ جۇڭگو كوممۋنيستىك پارتياسىنىڭ 20-قۇرىلتايىندا جاساعان بايانداماڭىزدى مۇقيات ۇيرەندىك. ەرەكشە كۇردەلى، قاتاڭ ساياسي-ەكونوميكالىق جاعدايدا، كۋبا جۇڭگونى ۇلگى تۇتىپ، سايىسقا جاسامپازدىقپەن توتەپ بەرىپ، سوتسياليزم قۇرۋ نىساناسىن ىسكە اسىرادى. 

 

 دياز.كانەل بىلاي دەپ باسا دارىپتەدى: جۇڭگومەن قاتىناستى دامىتۋ كۋبانىڭ ديپلوماتيالىق ساياساتىنداعى ەڭ ماڭىزدى ٴتۇيىن. كۋبا ٴبىر جۇڭگو پرينسيبىنە باتىل بويسۇناتىندىعىن، ”ٴبىر بەلدەۋ، ٴبىر جولدى“ جوعارى ساپامەن بىرگە قۇرۋدى، الەمدىك دامۋ دارىپتەمەسىن جانە الەمدىك حاۋىپسىزدىك دارىپتەمەسىن قولدايتىندىعىن قايتالاي دارىپتەيدى ٴارى لاتىن امەريكاسى ەلدەرى جانە جۇڭگو تالقىسى، ”77 ەل توبى مەن جۇڭگو“ سياقتى وڭىرلىك جانە حالىقارالىق كوپ جاقتى مەحانيزمدە جۇڭگومەن سايكەسۋدى، سەلبەسۋدى اناعۇرلىم كۇشەيتىپ، لاتىن امەريكاسى مەن جۇڭگونىڭ قاتىناسىن ىلگەرىلەتۋگە، وركەندەۋ جولىنداعى ەلدەردىڭ ورتاق مۇددەسىن قورعاۋعا ۇزدىكسىز ۇلەس قوسۋدى قالايدى.

 كەڭەستەن كەيىن، ەكى ەل باسشىلارى ەكى ەلدىڭ پارتيالار اۋىس-كۇيىسى، سىرتقى ىستەر مينيسترلىگى اراسىنداعى كەڭەس مەحانيزمى، ”ٴبىر بەلدەۋ، ٴبىر جولدى“ بىرگە قۇرۋ، ناقتى سەلبەستىك سياقتى ەكى جاقتى حۇجاتتارعا قول قويۋعا بىرگە كۋا بولدى.

 

 ەكى جاق «جۇڭحۋا حالىق رەسپۋبليكاسى مەن كۋبا رەسپۋبليكاسىنىڭ جاڭا داۋىردەگى جۇڭگو-كۋبا قاتىناسىن تەرەڭدەتۋ جونىندەگى بىرلەسكەن مالىمدەمەسىن» جاريالادى.

 

 كەڭەستەن ىلگەرى، شي جينپيڭ حالىق سارايىنىڭ سولتۇستىك زالىندا دياز.كانەلدى قارسى الۋ سالتىن وتكىزدى، تيان-انمىن الاڭىندا 21 رەت قۇرمەت ساليۋتى اتىلدى، ەكى ەلدىڭ مەملەكەت باسشىلارى قۇرمەت قاراۋىلى مىنبەسىنە شىعىپ، جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى. 

 

 كەڭەس اياقتاعاننان كەيىن، شي جينپيڭ مەن زايىبى پىڭ لييۋان دياز.كانەل مەن ونىڭ زايىبى كۋيستاعا ارناپ، قارسى الۋ قوناعاسىسىن وتكىزدى. 

 

 ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى. 

 

اۋدارعان: گۇلنۇر قابىلقاق قىزى