ٴوز حابارىمىز . مەملەكەت ٴتوراعاسى شي جينپيڭ جەرگىلىكتى ۋاقىت 3-ايدىڭ 21-كۇنى موسكۆاداعى كرەمىل سارايىندا رەسەيدىڭ زۇڭتۇڭى پۋتينمەن سۇقپات وتكىزگەننەن كەيىن، ونىمەن بىرگە تىلشىلەرمەن كەزدەستى.

 شي جينپيڭ بىلاي دەپ اتاپ كورسەتتى: بۇل مەنىڭ 3 جىلدان استام ۋاقىتتان كەيىن موسكۆاعا تاعى كەلۋىم، سونداي-اق مەنىڭ جۇڭگونىڭ مەملەكەت ٴتوراعاسى بولىپ جالعاستى تاعايىندالعاننان كەيىنگى العاشقى ساپارىم جانە رەسەيدە مەملەكەتتىك ساپاردا بولۋىم. ون جىلدان بەرى، پۋتين زۇڭتۇڭمەن تىعىز قاتىناس ورناتىپ، ستراتەگيالىق سويلەسۋدى ساقتاپ، ەكى ەلدىڭ ستراتەگيالىق سەلبەستىك سەرىكتەستىك قاتىناسىندا تىڭ تابىستارعا قول جەتكىزۋدى جەبەدىك.

 

 الگىندە پۋتين زۇڭتۇڭمەن بۇكپەسىز، دوستىق، تابىستى كەڭەس وتكىزىپ، ەكى جاقتى قاتىناس جانە ورتاق كوڭىل ٴبولىپ وتىرعان كەلەلى حالىقارالىق، وڭىرلىك ماسەلەلەر جونىندە ىشكەرىلەي پىكىر الماستىرىپ، كوپتەگەن تىڭ دا ماڭىزدى ورتاق تانىمعا كەلدىك. ٴبىز «جۇڭگو مەن رەسەيدىڭ جاڭا داۋىردەگى جان-جاقتى ستراتەگيالىق سەلبەستىك سەرىكتەستىك قاتىناسىن تەرەڭدەتۋ جونىندەگى بىرلەسكەن مالىمدەمەگە»، «2030-جىلعا دەيىنگى جۇڭگو مەن رەسەيدىڭ ەكونوميكالىق سەلبەستىگىنىڭ ٴتۇيىندى باعىتتارىن دامىتۋ جوباسى جونىندەگى بىرلەسكەن مالىمدەمەگە» قول قويىپ جانە جاريالاپ، كەلەسى ساتىداعى ەكى ەل قاتىناسىنىڭ دامۋى جانە ٴار سالاداعى سەلبەستىگى جونىندە جوبا جانە ورنالاستىرۋ جاسادىق.

 

 شي جينپيڭ مىنالاردى باسا دارىپتەدى: پۋتين زۇڭتۇڭمەن بىرگە 10 جىلدان بەرگى ەكى ەل قاتىناسىن دامىتۋداعى تابىستاردى ەسكە الىپ، ٴبىر اۋىزدان بىلاي دەپ قارادىق: ەكى ەل قاتىناسى ەكى جاقتى قاتىناس كولەمىنەن الدەقايدا اسىپ ٴتۇستى، بۇل دۇنيە ٴجۇزىنىڭ جاعدايى مەن ادامزاتتىڭ بولاشاق تاعدىرى جونىنەن توتەنشە ماڭىزدى. ەكى جاق تاتۋ كورشى بولۋ، سەلبەسىپ تەڭ يگىلىككە كەنەلۋ پرينسيبى بويىنشا ٴار سالاداعى بارىس-كەلىستى، سەلبەستىكتى ىلگەرىلەتتى. جاڭا تاريحي شارت-جاعدايدا، ەكى جاق جۇڭگو-رەسەي قاتىناسىنا شالقار كوز ايامەن، ۇزاق بولاشاقتىق تۇرعىدان مامىلە جاساپ جانە ونى يگەرىپ، ادامزاتتىڭ العا باسۋ ىستەرى ٴۇشىن اناعۇرلىم زور ۇلەس قوسادى.

 

 شي جينپيڭ مىنالاردى اتاپ كورسەتتى: بىلتىردان بەرى، جۇڭگو مەن رەسەيدىڭ جان-جاقتى ناقتى سەلبەستىگىندە سۇبەلى تابىستارعا قول جەتىپ، نەگىزىنەن ورنىقتى، ٴوزارا تولىقتاۋ سيپاتى كۇشتى، سەرپىمدىلىگى قۋاتتى بولۋ ەرەكشەلىگى ۇزدىكسىز كورنەكتىلەندى. 10 جىلدىڭ الدىنداعىمەن سالىستىرعاندا، جۇڭگو مەن رەسەيدىڭ ەكى جاقتى ساۋدا سوماسى %116 ارتىپ، ەكى ەل قاتىناسىنىڭ زاتتىق نەگىزىن ٴونىمدى بەكەمدەپ قانا قويماي، ەكى ەلدىڭ ەكونوميكالىق، قوعامدىق دامۋىنا دا ماڭىزدى دەم بەردى. بۇل ناتيجە وڭاي-وسپاق قولعا كەلگەن جوق.

 

 پۋتين زۇڭتۇڭ ەكەۋىمىز مىناداي ورتاق تانىمعا كەلدىك، ەكى جاق ٴبىر تۇتاس جوبالاۋ مەن جوعارى دەڭگەيلى جوبالاۋدى كۇشەيتىپ، ەنەرگيا، بايلىق، ماشينا-ەلەكتر ونىمدەرى ساۋداسىن كەڭەيتىپ، ەكى جاقتىڭ كاسىپ سالاسى تىزبەگىنىڭ، قامداۋ تىزبەگىنىڭ سەرپىمدىلىگىن كۇشەيتىپ، ينفورماتسيا تەحنيكاسى، سيفرلى ەكونوميكا، اۋىل شارۋاشىلىعى، قىزمەت وتەۋ ساۋداسى سياقتى سالالارداعى سەلبەستىكتى كەڭەيتۋى كەرەك. ٴداستۇرلى ساۋدا مەن جاڭادان گۇلدەنگەن سالالارداعى سەلبەستىكتە ٴبىرىن-ٴبىرى تولىقتاۋدى، بىرگە دامۋدى ىلگەرىلەتىپ، شەكارا اتتاعان زات اينالىمى تاسىمالىن اناعۇرلىم ىركىلىسسىزدەندىرۋ كەرەك. 

 

 ٴبىز ٴبىر اۋىزدان بىلاي دەپ قارادىق: ەكى جاق گۋمانيتارلىق اۋىس-كۇيىستىڭ ىرگە تاسىن ۇزدىكسىز بەكەمدەۋى كەرەك. ەكى ەلدىڭ دوس ولكە-وبلىستارىنىڭ، دوس قالالارىنىڭ باعىتتامالى اۋىس-كۇيىستى كەڭەيتۋىن ىلگەرىلەتىپ، جۇڭگو مەن رەسەيدىڭ دەنە تاربيە اۋىس-كۇيىس جىلىن ويداعىداي وتكىزىپ، ەكى ەل ادامدارىنىڭ بارىس-كەلىسىن جەبەۋگە قولايلى شارت-جاعداي ازىرلەۋ كەرەك.

 

 ەكى جاق بىلاي دەپ اتاپ كورسەتتى: ب م ۇ حاۋىپسىزدىك القالار كەڭەسىنىڭ تۇراقتى القا ەلى رەتىندە، جۇڭگو مەن رەسەي حالىقارالىق قوعاممەن بىرگە ب م ۇ ۋستاۆىنىڭ نەگىزگى ماقساتى مەن پرينسيبىن نەگىز ەتكەن حالىقارالىق قاتىناستىڭ نەگىزگى ولشەمىن باتىل قورعايدى. شاڭحاي سەلبەستىك ۇيىمى، بريكس ەلدەرى سەلبەستىك مەحانيزمى، 20 ەل توبى سياقتى حالىقارالىق كوپ جاقتى جۇلگەدەگى سەلبەستىكتى كۇشەيتىپ، ناعىز كوپ جاقتىلىقتى امالياتتا ايگىلەپ، جۇقپالى اۋرۋدان كەيىنگى ەكونوميكانىڭ قالپىنا كەلۋىن جەبەپ، كوپ ۇيەكتى دۇنيە جاعدايىن قۇرۋداعى، الەمدىك جونگە سالۋ جۇيەسىن كەمەلدەندىرۋدەگى سىندارلى كۇشتەردى زورايتىپ، الەمدىك استىق حاۋىپسىزدىگىن، ەنەرگيا حاۋىپسىزدىگىن، كاسىپ تىزبەگى مەن قامداۋ تىزبەگىنىڭ ورنىقتىلىعىن قورعاۋ جاعىندا اناعۇرلىم كوپ ۇلەس قوسىپ، ادامزاتتىڭ تاعدىرلاس ورتاق تۇلعاسىن قۇرۋدى كۇش سالا ىلگەرىلەتەدى.

 

 شي جينپيڭ مىنالاردى باسا دارىپتەدى: وتكەن ايدا جۇڭگو «ۋكراينا داعدارىسىن ساياسي جولمەن شەشۋ جونىندەگى جۇڭگونىڭ مايدانى» اتتى حۇجاتتى جاريالادى. ۋكراينا داعدارىسى ماسەلەسىندە جۇڭگو ب م ۇ ۋستاۆىنىڭ نەگىزگى ماقساتى مەن پرينسيبىنە باستان-اياق بويسۇنىپ، وبيەكتيۆ، ٴادىل مايداندا تۇرىپ، بەلسەنە جاراستىرىپ، كەلىسسوزدى جەبەپ، ٴىستىڭ دۇرىس-بۇرىستىعى بويىنشا ٴوز تۇرعىسىن بەلگىلەپ، قاي-قاشان دا بەيبىتشىلىك جاعىندا، كەڭەسۋ جاعىندا، تاريحتىڭ دۇرىس جاعىندا تۇردى.

 مەن ٴتۇرلى تاسىلدەر ارقىلى پۋتين زۇڭتۇڭمەن تىعىز بايلانىستى ۇزدىكسىز ساقتاپ، جۇڭگو-رەسەي قاتىناسىنىڭ ورنىقتى، باياندى ىلگەرىلەۋىنە بىرگە جەتەكشىلىك ەتۋدى ٴۇمىت ەتەمىن. 

 

اۋدارعان:گۇلنۇر قابىلقاق قىزى