شي جينپيڭ مىنالاردى انىق ايتتى: باس ٴۋازىر حۇڭماناي مىندەتكە وتىرعاننان كەيىن جۇڭگونى تۇڭعىش رەت ەكى جاقتى ساپاردا بولاتىن مەملەكەت ەتىپ تاڭداۋى كامبودجانىڭ جاڭا كەزەكتى ۇكىمەتىنىڭ جۇڭگو ـ كامبودجا دوستىعىن بەكەمدەۋگە جانە دامىتۋعا ايرىقشا ٴمان بەرەتىندىگىن تولىق ايگىلەيدى. جۇڭگو مەن كامبودجا ناعىز دوستار. 

 

ديپلوماتيالىق قاتىناس ورناتقان 65 جىلدان بەرى، ەكى جاق باستان ـ اياق وسكەلەڭ ٴوزارا سەنىم ارتىپ، تەڭ تۇرعىدا مامىلە جاساپ، ٴوزارا پايدا جەتكىزە ورتاق يگىلىكتەنىپ، ٴوزارا مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋدى باستان ـ اياق باتىل قولداپ كەلدى، بۇل جۇڭگو ـ كامبودجا تاعدىرلاس ورتاق تۇلعاسىنىڭ وزەكتى ٴمانى. بيىل ەكى جاق جوعارى ساپالى، جوعارى دەڭگەيلى، جوعارى ولشەمدى جۇڭگو ـ كامبودجا تاعدىرلاس ورتاق تۇلعاسىن قۇرۋ جاڭا ٴداۋىرىن باستادى. جۇڭگو كامبودجامەن بىرلىكتە قۇلشىنىپ، جۇڭگو-كامبودجا تاعدىرلاس ورتاق تۇلعاسى قۇرىلىسىنىڭ تەرەڭدەۋىن، ناقتىلانۋىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋ ۇلگىسىن قول ۇستاسا سومداۋدى قالايدى.

 

 شي جينپيڭ بىلاي دەپ باسا دارىپتەدى: جۇڭگو كامبودجانىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىن تابۋىن باتىل قولدايدى، كامبودجامەن ۇنەمىلىك ستراتەگيالىق بايلانىستى ساقتاپ، ەل باسقارۋ تاجىريبەلەرى جونىندە اۋىس-ءتۇيىستى تەرەڭدەتۋدى قالايدى. ەكى جاق ۇكىمەتتەر ارا سايكەستىرۋ كوميتەتى مەحانيزمىنىڭ رولىن ويداعىداي ساۋلەلەندىرىپ، جاڭا ۇلگىدەگى جۇڭگو-كامبودجا تاعدىرلاس ورتاق تۇلعاسى ارەكەت جوسپارىن ويداعىداي تياناقتاندىرىپ، جۇڭگو مەن كامبودجانىڭ « التى قىرلى گاۋھار» سەلبەستىك جۇلگەسىن تولىقتاپ، «ونەركاسىپتى دامىتۋ ءدالىزى» مەن «بالىق جانە كۇرىش شارۋاشىلىعى ءدالىزىن» بىرلىكتە قۇرىپ، قاتىستى ءتۇيىندى سەلبەستىك ىستەرىنىڭ ەرتەرەك تياناقتانىپ، ءونىم بەرۋىن ىلگەرىلەتۋ كەرەك. جۇڭگو كامبودجامەن زاڭ اتقارۋ، حاۋىپسىزدىك سەلبەستىگىن ۇدايىلاندىرىپ، ينتەرنەت قۇمار ۇتىسى، تەلەگراف الدامكوستىگى سياقتى شەكارا اتتاعان قىلمىستارعا ۇزدىكسىز سوققى بەرۋدى قالايدى. ەكى جاق «جۇڭگو-كامبودجا دوستىق جىلى» جەلىلەس قيمىلدارىن ۇزدىكسىز ويداعىداي وتكىزىپ، ەكى ەل جاستارى، جەرلىك ورىندار، وقۋ-اعارتۋ، ساياحات، ەمدەۋ، دەنساۋلىق ساقتاۋ سياقتى سالالارداعى سەلبەستىكتى كەڭەيتىپ، جۇڭگو-كامبودجا دوستىعى ارقىلى ەكى ەل حالقىنا اناعۇرلىم مول يگىلىك جاراتۋ كەرەك.

 

شي جينپيڭ بىلاي دەپ انىق ايتتى: حالىقارالىق جانە وڭىرلىك جاعداي قالاي وزگەرسە دە، جۇڭگو قاشاندا كامبودجانىڭ ەڭ سەنىمدى دوسى، ەڭ بەرىك سۇيەنىشى بولا بەرەدى. جۇڭگو جاق كامبودجا جاقپەن تىزە قوسا وتىرىپ، حالىقارالىق ادىلدىكتى، تەڭدىكتى ورتاق قورعاۋدى، وركەندەپ كەلە جاتقان ەلدەردىڭ ورىندى ۇقىق-مۇددەسىن قورعاۋدى قالايدى.

 

حۇڭماناي بىلاي دەدى: مەنىڭ جۇڭگونى تۇڭعىش رەسمي ساپارعا شىققان مەملەكەت ەتىپ تاڭداۋىم كامبودجانىڭ جاڭا كەزەكتى ۇكىمەتىنىڭ جۇڭگوعا دوستىق ساياساتتى ۇزدىكسىز تاباندىلىقپەن اتقارىپ، كامبودجا مەن جۇڭگونىڭ بولاتتاي بەرىك دوستىعىن ونان ارى ساۋلەلەندىرۋ ٴۇشىن بولىپ تابىلادى. كامبودجا ٴبىر جۇڭگو پرينسيبىنە تاباندى بولادى، جۇڭگونىڭ ٴوزىنىڭ وزەكتى مۇددەسىن قورعاۋىن باتىل قولدايدى، ٴتوراعا شي جينپيڭ العا قويعان الەمدىك دامۋ دارىپتەمەسىن، الەمدىك حاۋىپسىزدىك دارىپتەمەسىن، الەمدىك وركەنيەت دارىپتەمەسىن قۇپتايدى. كامبودجا جۇڭگونىڭ ۇزاق ۋاقىتتان بەرى كامبودجانىڭ ەكونوميكالىق، قوعامدىق دامۋىنا كورسەتكەن زور قولداۋى مەن كومەگىنە العىس ايتادى، جۇڭگومەن ەكى ەل باسشىلارى كەلىسكەن ماڭىزدى ورتاق تانىمدى تياناقتاندىرىپ، «ٴبىر بەلدەۋ، ٴبىر جولدى» ورتاق قۇرۋ سەلبەستىگىن تەرەڭدەتۋدى قالايدى. «التى قىرلى گاۋھار » جۇلگەسى اياسىندا ەكى ەلدىڭ ونەركاسىپ، اۋىل شارۋاشىلىعى، قارجى قوسۋ، گۋمانيتارلىق سياقتى سالالارداعى سەلبەستىگىنىڭ ونان ارى دامۋىن ىلگەرىلەتىپ، كامبودجا مەن جۇڭگونىڭ تاعدىرلاس ورتاق تۇلعاسىن سومداپ، ەكى ەل حالقىن اناعۇرلىم تاماشا باقىتقا كەنەلتۋگە كۇش سالادى. كامبودجا جۇڭگومەن وڭىرلىك جانە حالىقارالىق ىستەردە تىعىز سايكەسىپ، كامبودجا-جۇڭگو قاتىناسىن تىڭ بەلەسكە كوتەرۋدى قالايدى. ۋاڭ ي كەزدەسۋگە قاتىناستى. 

 

اۋدارعان: قاناتبەك جۇماباي ۇلى