ءوز حابارىمىز. مەملەكەت ءتوراعاسى شي جينپيڭ 3-ايدىڭ 27-كۇنى تۇستەن كەيىن حالىق سارايىندا جۇڭگوعا قىزمەت ساپارىمەن كەلگەن نيدەرلاندتىڭ باس ءۋازىرى رۋتتەمەن كەزدەستى.

 شي جينپيڭ بىلاي دەپ اتاپ كورسەتتى: تاياۋ جىلداردان بەرى، جۇڭگو-نيدەرلاند قاتىناسى ورنىقتى، تەز دامىپ، ەكى ەلدىڭ ءار سالاداعى سەلبەستىگى ۇزدىكسىز تەرەڭدەپ، نيدەرلاند اتى زاتىنا ساي جۇڭگو-ەۆروپا سەلبەستىگىنىڭ «قاقپاسىنا» اينالدى. جۇڭگو نيدەرلاندپەن ءار دارەجەلى بارىس-كەلىستى ساقتاپ، سويلەسۋگە، پىكىرلەسۋگە، ءوزارا پايدا جەتكىزىپ، تەڭ يگىلىككە كەنەلۋگە تاباندى بولىپ، جۇڭگو مەن نيدەرلاندتىڭ اشىق، ناقتى جالپى بەتتىك سەلبەستىك سەرىكتەستىك قاتىناسىنىڭ ۇزدىكسىز دامۋىن ىلگەرىلەتۋدى قالايدى. جۇڭگو نيدەرلاندتان ساپالى تاۋار يمپورتىن كەڭەيتۋدى قالايدى، نيدەرلاند كاسىپورىندارىنىڭ جۇڭگوعا كەلىپ قارجى قوسۋىن قارسى الادى، سونداي-اق نيدەرلاندتىڭ جۇڭگو كاسىپورىندارىنا ءادىل، جاريا تيجارات-ساۋدا ورتاسىن جاراتۋىن ءۇمىت ەتەدى. ەكى جاق اۋىل شارۋاشىلىعى، سۋ يگىلىگى، ەنەرگيا سياقتى ءداستۇرلى سەلبەستىكتى بەلسەنە ىلگەرىلەتۋى، سونىمەن بىرگە جاساندى زەردە، جاسىل تيپكە بۇرىلىس جاساۋ، قارتتارعا قاتىستى ەكونوميكا سياقتى سالالارداعى سەلبەستىكتىڭ كومەسكى كۇشىن اشۋى كەرەك. ەكى جاق ادامدارىنىڭ بارىس-كەلىسىنە قولايلى اناعۇرلىم كوپ شارالاردى ۇزدىكسىز قولدانىپ، وقۋ-اعارتۋ، مادەنيەت جانە حالىقتىق اۋىس-كۇيىسكە دەم بەرۋدى ءۇمىت ەتەمىن. جۇڭگو نيدەرلاندپەن ب م ۇ، دۇنيە جۇزىلىك ساۋدا ۇيىمى سياقتى كوپ جاقتى قۇرىلىمدارداعى سويلەسۋدى، سايكەسۋدى كۇشەيتىپ، كليمات وزگەرىسى، ورگانيزمدەردىڭ الۋان تۇرلىلىگى سياقتى الەمدىك سىن-سايىستارعا بىرگە توتەپ بەرۋدى قالايدى.

 شي جينپيڭ بىلاي دەپ باسا دارىپتەدى: ەكونوميكانىڭ الەميلەنۋى قارسىلىقتارعا ۇشىراۋى مۇمكىن، ءبىراق تاريحتىڭ جالپى اۋقىمى وزگەرمەيدى، «قاتىناستى اجىراتىپ، بايلانىستى ۇزۋدەن» شىعار جول جوق، ەسىك اشۋ، سەلبەسۋ بىردەن-ءبىر تالعام. جۇڭگو باستان-اياق بىلاي دەپ قارايدى: بىرەۋ جەڭىلىپ، بىرەۋ جەڭەتىن، ءسوزسىز دۇرىس نەمەسە بۇرىس دەيتىن ەكى نەگىزدىك قاراما-قارسى وي جەلىسىنىڭ ۋاقىتى الدەقاشان ءوتتى، ناعىز حاۋىپسىز دۇنيە ءوزارا تەرەڭ توعىسقان، ءبىر-بىرىنە سۇيەنىپ ءومىر سۇرەتىن دۇنيە بولۋعا ءتيىس. عىلىم-تەحنيكا قامالىن قولدان جاساپ، كاسىپ تىزبەگى مەن قامداۋ تىزبەگىن ءبولىپ تاستاۋ-بولشەكتەنۋگە جانە قاراما-قارسىلىققا اپارىپ سوعادى. جۇڭگو حالقىنىڭ دا ورىندى دامۋ ۇقىعى بار، ءارقانداي كۇش جۇڭگونىڭ عىلىم-تەحنيكاسىنىڭ دامۋ، العا باسۋ اياق الىسىنا بوگەت بولا المايدى. جۇڭگو باستان-اياق تەڭ يگىلىككە كەنەلۋ تانىمىنان جازباي، جوعارى دەڭگەيدەگى سىرتقا ەسىك اشۋدى ۇزدىكسىز كەڭەيتىپ، ءار جاقپەن دامۋدىڭ پايداسىنان بىرگە يگىلىكتەنەدى. جۇڭگونىڭ ەۆروپاعا قاراتقان ساياساتى ءۇرتىس ورنىقتى بولىپ، ەۆروپانى كوپ ۇيەكتى دۇنيە جۇزىندەگى ماڭىزدى ۇيەك جانە سەلبەستىك سەرىگى دەپ قارايدى. نيدەرلاندتىڭ جۇڭگو مەن ەۆروپانىڭ ءوزارا ءتۇسىنىسۋىن ىلگەرىلەتۋدە، سىندارلى قاتىناستى دامىتۋدا ۇزدىكسىز بەلسەندى رول اتقارۋىن ءۇمىت ەتەمىن.

رۋتتە بىلاي دەدى: 2013-جىلى مەن باس ءۋازىر رەتىندە جۇڭگوعا تۇڭعىش رەت ساپارلاي كەلدىم، اسىرەسە، 2014-جىلى ءتوراعا شي جينپيڭمەن بىرگە نيدەرلاند پەن جۇڭگونىڭ اشىق، ناقتى جالپى بەتتىك سەلبەستىك سەرىكتەستىك قاتىناس ورناتقاندىعىن جاريالاعاننان بەرى، ەكى ەل قاتىناسى تاماشا دامۋدى ساقتاپ، ساۋدا سوماسى ەكى ەسەلەنىپ، ەكى جاقتى سەلبەستىكتە وراسان زور كومەسكى كۇش جارىققا شىعىپ، جارقىن بولاشاققا بەتالدى. «قاتىناستى اجىراتىپ، بايلانىستى ءۇزۋ» نيدەرلاند ۇكىمەتىنىڭ ساياساتتىق تالعامى ەمەس، ويتكەنى جۇڭگونىڭ دامۋ مۇددەسىنە زيان جەتكىزەتىن ءارقانداي ارەكەت وزىنە دە زيان جەتكىزەدى. جۇڭگونىڭ نيدەرلاند ازاماتتارىنىڭ جۇڭگوعا 15 كۇندىك ۆيزاسىز بارۋ مامىلەسىنە العىس ايتامىن. نيدەرلاند جۇڭگومەن دوستىق قاتىناسىن قاستەرلەيدى، جۇڭگومەن سەرىكتەستىك قاتىناستى ۇزدىكسىز تەرەڭدەتىپ، ادامداردىڭ بارىس-كەلىسىنە قولايلىلىق جاراتىپ، ەكونوميكا-ساۋدا، كومىرتەگىن ىعىستىرۋدى ازايتۋ سياقتى سالالارداعى سەلبەستىكتى كۇشەيتىپ، 20 ەل توبى سياقتى كوپ جاقتى ورىنداردا، سونداي-اق حالىقارالىق، وڭىرلىك قولامتالى ماسەلەلەردە پىكىرلەسۋدى، سايكەسۋدى جيىلەتۋدى قالايدى.

 ۋاڭ ي كەزدەسۋگە قاتىناستى.