ءوز حابارىمىز. 3-ايدىڭ 27-كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا رەسمي ساپارلاي كەلگەن سريلانكانىڭ زۇڭليى گۋناۆادنەرمەن كەزدەستى.

شي جينپيڭ مىنالاردى اتاپ كورسەتتى: جۇڭگو مەن سريلانكانىڭ دوستىعى ارىدان باستاۋ الادى، ەكى ەل حالقى تابيعي جاقىندىق سەزىمگە يە. جۇڭگو-سريلانكا قاتىناسىن ويداعىداي بەكەمدەۋ، ويداعىداي دامىتۋ ەكى ەل حالقىنىڭ ءتۇبىرلى مۇددەسى مەن ورتاق تىلەگىنە ۇيلەسەدى. جۇڭگو سريلانكامەن بىرگە «دەربەس ءوزىن الۋەتتەندىرۋ، ىنتىماقتاسا ءوزارا كومەكتەسۋ» سىندى «كۇرىش-كاۋچۇك ايىرباس كەلىسىمىنىڭ» رۋحىن ۇزدىكسىز ساۋلەلەندىرىپ، ساياسي سەنىمدىلىكتى بەكەمدەپ، ەل باسقارۋ تاجىريبەلەرىن اۋىستىرۋدى كۇشەيتىپ، ناقتى سەلبەستىكتى كەڭەيتىپ، «ءبىر بەلدەۋ، ءبىر جولدى» جوعارى ساپامەن بىرگە قۇرىپ، جۇڭگو مەن سريلانكانىڭ شىنايى ءوزارا كومەكتەسەتىن، ۇرپاقتان-ۇرپاققا جالعاسقان دوستىق ستراتەگيالىق سەلبەستىك سەرىكتەستىك قاتىناسىن ۇزدىكسىز تەرەڭدەتۋدى قالايدى.

شي جينپيڭ مىنالاردى باسا دارىپتەدى: جۇڭگو سريلانكانىڭ مەملەكەتتىڭ يەلىك ۇقىعىن، تاۋەلسىزدىگىن، ۇلتتىڭ ار-نامىسىن قورعاۋىن، ءوز ەلىنىڭ مەملەكەت جاعدايىنا ۇيلەسەتىن وسىزامانداندىرۋ جولىن قاراستىرۋىن باتىل قولدايدى، سريلانكانىڭ ەكونوميكالىق، قوعامدىق دامۋىنا شاماسىنىڭ كەلىسىنشە ۇزدىكسىز كومەكتەسەدى. ەكى جاق بىرگە قۇلشىنىپ، ءبىر بەلدەۋ، ءبىر جولدى جوعارى ساپامەن بىرگە قۇرۋدى ىلگەرىلەتۋ، اسىرەسە، كولومبو پورت قالاسى مەن حانبانتوتا كەشەندى اشۋ نىسانى سىندى 2 ۇلكەن باستاماشى نىساندى ىلگەرىلەتىپ، زات اينالىمى، ەنەرگيا، كاسىپ سالاسى سەلبەستىگىن تەرەڭدەتىپ، سيفرلى ەكونوميكا، جاسىل ەكونوميكا، تازا ەنەرگيا، مادەنيەت ساياحاتى، تەڭىز-مۇحيت ەكونوميكاسى سياقتى سالالارداعى اۋىس-كۇيىس، سەلبەستىكتى كۇشەيتۋ كەرەك. جۇڭگو سريلانكانىڭ ەرەكشە ساپالى ونىمدەرىن يمپورت ەتۋدى ۇزدىكسىز كەڭەيتىپ، جۇڭگو كاسىپورىندارىن سريلانكاعا بارىپ قارجى قوسىپ، شارۋاشىلىقتى گۇلدەندىرۋگە شابىتتاندىرادى، سريلانكانىڭ ءادىل، جاريا تيجارات-ساۋدا ورتاسىن ازىرلەۋىن ءۇمىت ەتەدى. جۇڭگو سريلانكامەن اۋىل-قىستاقتاردى كەدەيلىكتەردەن ارىلتۋ سەلبەستىگىن كۇشەيتىپ، سريلانكانىڭ ەكونوميكانىڭ تيپىن وزگەرتىپ، دارەجەسىن جوعارىلاتۋىنا جانە باياندى دامۋىنا دەم بەرۋدى قالايدى. ەكى جاق بەيبىت قاتار تۇرۋدىڭ بەس پرينسيبىن ساۋلەلەندىرىپ، حالىقارالىق جانە وڭىرلىك ىستەردەگى سەلبەستىكتى كۇشەيتىپ، جۇڭگو مەن سريلانكانىڭ ورتاق مۇددەسى جانە حالىقارالىق ادىلدىك پەن ادىلەتتىلىكتى ويداعىداي قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ كەرەك.

گۋناۆادنەر بىلاي دەدى: سريلانكا مەن جۇڭگونىڭ ءداستۇرلى دوستىعى تەرەڭ. سريلانكا ءبىر جۇڭگو پرينسيبىن سونداي-اق جۇڭگومەن دوستىق سەلبەستىك ساياساتىن ەش ءارى-ءسارى بولماستان باتىل اتقارادى، جۇڭگونى باستان-اياق سىرتقى قاتىناستا ماڭداي الدى ورىنعا قويادى. سريلانكا جۇڭگونىڭ قالتىقسىز كومەگىن استە ەستەن شىعارمايدى. كولومبو پورت قالاسى مەن حانبانتوتا ۋنيۆەرسال اشۋ نىسانى سياقتى نىساندار سريلانكانىڭ ەكونوميكالىق، قوعامدىق دامۋىن بارىنشا سەرپىلتتى ءارى ءوڭىردىڭ جالپى تۇلعالىق دامۋىن پارمەندى جەبەدى. ءتوراعا شي جينپيڭ العا قويعان الەمدىك دامۋ دارىپتەمەسى، الەمدىك حاۋىپسىزدىك دارىپتەمەسى، الەمدىك وركەنيەت دارىپتەمەسى دۇنيە ءجۇزىنىڭ بەيبىتشىلىگى مەن دامۋىنا تىڭ قوزعاۋشى كۇش جانە وڭ ەنەرگيا قوستى، سريلانكا جاق بەلسەنە قولدايدى جانە ات سالىسادى. سريلانكا جاق جۇڭگو جاقپەن بىرگە بەيبىت قاتار تۇرۋدىڭ بەس پرينسيبىن ۇزدىكسىز ساۋلەلەندىرىپ، سريلانكا مەن جۇڭگونىڭ دوستىق قاتىناسىن تەرەڭدەتىپ، «ءبىر بەلدەۋ، ءبىر جولدى» بىرگە قۇرۋدى ىلگەرىلەتىپ، ەكونوميكا-ساۋدا، وقۋ-اعارتۋ، ساياحات، كەدەيلىكتەن ارىلتۋ سياقتى سالالارداعى سەلبەستىكتى كەڭەيتىپ، حالىقاراداعى كوپ جاقتى قارىم-قاتىناستى، سەلبەستىكتى جيىلەتىپ، ازيانىڭ تاعدىرلاس ورتاق تۇلعاسىن جانە ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

ۋاڭ ي كەزدەسۋگە قاتىناستى.