شي جينپيڭ ەكۆاتور گۆينەياسىنىڭ زۇڭتۇڭىمەن كەڭەس وتكىزدى
来源:جۇڭگو قازاق راديو تورابى |责编:巴特勒| 发布日期: 2024-05-29 16:58
ءوز حابارىمىز. مەملەكەت ءتوراعاسى شي جينپيڭ 5-ايدىڭ 28-كۇنى تۇستەن كەيىن بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ەكۆاتور گۆينەياسىنىڭ زۇڭتۇڭى وبياڭمەن كەڭەس وتكىزدى. ەكى ەل باسشىلارى جۇڭگو مەن ەكۆاتور گۆينەياسىنىڭ قاتىناسىن جالپى بەتتىك ستراتەگيالىق سەلبەستىك سەرىكتەستىك قاتىناس دەڭگەيىنە كوتەرەتىندىگىن جاريالادى.
مەملەكەت ءتوراعاسى شي جينپيڭ 5-ايدىڭ 28-كۇنى تۇستەن كەيىن حالىق سارايىنىڭ شىعىس قاقپاسىنىڭ الدىنداعى الاڭدا سالت وتكىزىپ، ەكۆاتور گۆينەياسى رەسپۋبليكاسىنىڭ زۇڭتۇڭى تەودورو وبياڭ ەنگۆيما مباسوگونىڭ ەلىمىزدە مەملەكەتتىك ساپاردا بولعاندىعىن قارسى الدى.
ءتوراعا شي جينپيڭنىڭ حانىمى پىڭ لييۋان، ج ك پ ورتالىق كوميتەتى ساياسي بيۋروسىنىڭ مۇشەسى، ورتالىق سىرتقى ىستەر قىزمەتى كوميتەتى كەڭسەسىنىڭ مەڭگەرۋشىسى ۋاڭ ي قاتارلىلار قارسى الۋ سالتىنا قاتىناستى.
وبياڭمەن بىرگە جۇڭگوعا ساپارلاي كەلگەندەردەن زۇڭتۇڭنىڭ حانىمى، زۇڭتۇڭنىڭ ازاماتتىق ىستەر بيلىك كەڭسەسىنىڭ باستىعى، زۇڭتۇڭ سارايىنىڭ سىرتقى حاۋىپسىزدىك ىستەرى مينيسترى قاتارلىلار بار.
اسكەري وركەستر ەكۆاتور گۆينەياسى مەن جۇڭگونىڭ مەملەكەت ءانىن ورىندادى، قۇرمەت ساليۋتى 21 رەت اتىلدى.
وبياڭ شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى.
ەكى ەلدىڭ مەملەكەت باسشىلارى قۇرمەت قاراۋىلى مىنبەسىنە قايتىپ كەلىپ، قۇرمەت قاراۋىلىنىڭ سالتانات قاتارىن تاماشالادى.
وبياڭ شي جينپيڭنىڭ ۇسىنىسىمەن ەلىمىزدە مەملەكەتتىك ساپاردا بولدى.
قارسى الۋ سالتىنان كەيىن، ءتوراعا شي جينپيڭ وبياڭ زۇڭتۇڭمەن كەڭەس وتكىزدى. ەكى ەل باسشىلارى جۇڭگو مەن ەكۆاتور گۆينەياسىنىڭ قاتىناسىن جالپى بەتتىك ستراتەگيالىق سەلبەستىك سەرىكتەستىك قاتىناس دەڭگەيىنە كوتەرەتىندىگىن جاريالادى.
شي جينپيڭ مىنالاردى اتاپ كورسەتتى: جۇڭگو مەن ەكۆاتور گۆينەياسى ءبىر-بىرىنە ادال تاتۋ دوس، سەنىمدى سەرىك، جوعارى دەڭگەيدەگى ساياسي ءوزارا سەنىمدىلىك ەكى ەل قاتىناسىنىڭ ەڭ ايقىن ەرەكشەلىگى. ديپلوماتيالىق قاتىناس ورناتقان جارىم عاسىردان استام ۋاقىتتان بەرى، ەكى جاق باستان-اياق ءبىر-بىرىنە قارايلاسىپ، بەينەت پەن زەينەتتى بىرگە وتكەرىپ، ءبىر-ءبىرىنىڭ وزەكتى مۇددەسىنە جانە كوكەيتەستى ىستەرىنە ساياتىن ماسەلەلەردە ءبىرىن-ءبىرى باتىل قولداپ، جۇڭگونىڭ افريكا ەلدەرىمەن شىنايى دوستىعىنىڭ، قول ۇستاسا دامۋىنىڭ جاندى كارتيناسىنا اينالدى.
شي جينپيڭ مىنالاردى باسا دارىپتەدى: جاڭا جاعدايدا، جۇڭگونىڭ ەكۆاتور گۆينەياسىمەن قاتىناسىن ويداعىداي بەكەمدەۋى، ويداعىداي دامىتۋى ەكى ەلدىڭ جانە ەكى ەل حالقىنىڭ ءتۇبىرلى مۇددەسى مەن ورتاق تىلەگىنە ۇيلەسەدى. جۇڭگو ەكۆاتور گۆينەياسىنىڭ مەملەكەتتىڭ يەلىك ۇقىعى مەن تاۋەلسىزدىگىن قورعاۋىن، سىرتتىڭ كيلىگۋىنە قارسى تۇرۋىن، ءوز ەلىنىڭ دامۋ جولىن دەربەس قاراستىرۋىن باتىل قولدايدى، ەكۆاتور گۆينەياسىمەن جالپى بەتتىك ستراتەگيالىق سەلبەستىك سەرىكتەستىك قاتىناستى جوعارىلاتۋدى وراي ەتىپ، ءار سالاداعى، ءار جىكتەگى دوستىق بارىس-كەلىستى اناعۇرلىم جيىلەتىپ، رەفورما، دامۋ، كەدەيلىكتەن قۇتىلدىرۋدان قامال الۋ سياقتى سالالارداعى تاجىريبە اۋىس-كۇيىسىن ىشكەرىلەي ورىستەتىپ، ەكى ەلدىڭ ءداستۇرلى دوستىعىنا باياندى قوزعاۋشى كۇش قوسۋدى قالايدى.
شي جينپيڭ بىلاي دەپ اتاپ كورسەتتى: جۇڭگو ەكۆاتور گۆينەياسىنىڭ ەكونوميكالىق، قوعامدىق دامۋىن قولدايدى، ەكۆاتور گۆينەياسىنىڭ ەكونوميكانى كوپ نەگىزدەندىرۋ جانە ونەركاسىپتەندىرۋ جولىنداعى قۇلشىنىستارىن قولدايدى، جۇڭگو-افريكا سەلبەستىك تالقىسىنىڭ جەتىستىكتەرىن، «ءبىر بەلدەۋ، ءبىر جولدى» بىرگە قۇرۋ سەلبەستىگىن ەكۆاتور گۆينەياسىنىڭ «2035-جىلعى مەملەكەتتىڭ ەكونوميكالىق جانە قوعامدىق دامۋ جوباسىمەن» تىعىز ۇشتاستىرىپ، ءار سالاداعى سەلبەستىكتىڭ ساپاسىن جوعارىلاتىپ، ونىمدىلىگىن ارتتىرۋىن ىلگەرىلەتۋدى قالايدى. جۇڭگو قۋاتتى جۇڭگو كاسىپورىندارىن ەكۆاتور گۆينەياسىنا قارجى قوسىپ، كاسىپتى گۇلدەندىرۋگە شابىتتاندىرادى، ەكۆاتور گۆينەياسىمەن اۋىل شارۋاشىلىعى، اۋىل-قىستاق سالاسىنداعى دامۋ تاجىريبەلەرىمەن ورتاقتاسىپ، اۋىل شارۋاشىلىق تەحنيكاسىنا كومەك بەرۋ نىساندارىن ۇزدىكسىز ورىستەتىپ، جۇڭگو ەمدەۋ اترەتى، جۇڭگو-ەكۆاتور گۆينەياسى دوستىق شيپاحاناسى سياقتىلاردىڭ رولىن تولىق ساۋلەلەندىرىپ، ەمدەۋ، دەنساۋلىق ساقتاۋ، وقۋ-اعارتۋ، مادەنيەت سياقتى سالالارداعى اۋىس-كۇيىستى، سەلبەستىكتى تەرەڭدەتىپ، ەكى ەلدىڭ ءداستۇرلى دوستىعىن ۇرپاقتان-ۇرپاققا جالعاستىرۋدى، ەكى ەل حالقىنا ءتىپتى دە زور باقىت جاراتۋدى قالايدى.
شي جينپيڭ مىنالاردى باسا دارىپتەدى: بۇگىنگى دۇنيە ءجۇزى قىم-قۋىت، كۇردەلى بولىپ، 100 جىلدىق وزگەرىس جەدەلدەپ، ادامزات قوعامى بۇرىن-سوڭدى بولماعان سىن-سايىستارعا ءدوپ كەلدى، دامۋ جولىنداعى ەلدەر ىنتىماقتى، سەلبەستىكتى كۇشەيتۋدى بۇرىنعى ءارقانداي كەزدەگىدەن دە قاجەت ەتەدى. جۇڭگو ەكۆاتور گۆينەياسى سياقتى قالىڭ دامۋ جولىنداعى ەلدەرمەن بىرگە بەيبىت قاتار تۇرۋدىڭ بەس پريىنسىبى رۋحىن ساۋلەلەندىرىپ، حالىقارالىق ىستەردە سايكەسۋدى، سەلبەسۋدى كۇشەيتىپ، دامۋ جولىنداعى ەلدەردىڭ ورتاق مۇددەسىن، حالىقارالىق تەڭدىك پەن ادىلدىكتى قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى. افريكا ەلدەرىمەن ىنتىماقتى، سەلبەستىكتى دامىتۋ جۇڭگونىڭ ديپلوماتيالىق ساياساتىنىڭ ماڭىزدى ىرگە تاسى. جۇڭگو افريكامەن بىرگە جاڭا كەزەكتى جۇڭگو-افريكا سەلبەستىك تالقىسىنىڭ باسشىلار باس قوسۋىن ويداعىداي وتكىزىپ، ءداستۇرلى دوستىقتى ونان ارى ساۋلەلەندىرىپ، ىنتىماقتى، سەلبەستىكتى تەرەڭدەتىپ، بولاشاقتاعى دامۋ، سەلبەستىك ۇلى جوسپارىن بىرگە اقىلداسىپ، جۇڭگو-افريكا تاعدىرلاس ورتاق تۇلعاسىن قۇرۋدىڭ تىڭ پاراعىن اشۋدى قالايدى.
وبياڭ بىلاي دەدى: جۇڭگو شىعىستاعى ۇلى مەملەكەت، ەكۆاتور گۆينەياسىنىڭ جاقسى اعايىنى جانە سەنىمدى ستراتەگيالىق سەرىگى. ەكى ەل ديپلوماتيالىق قاتىناس ورناتقان 54 جىلدان بەرى، ەكى جاقتى قاتىناس باستان-اياق دوستىق دامۋدى ساقتادى، قازىر تاريحتاعى ەڭ جاقسى مەزگىلدە تۇر. جۇڭگونىڭ ەكۆاتور گۆينەياسىمەن سەلبەستىگى باستان-اياق تەڭدىك پەن ءوزارا قۇرمەت ەتۋدى نەگىز ەتەدى، جۇڭگونىڭ افريكاعا كومەككە كەلگەن ەمدەۋ اترەتى، كومەكتەسىپ سالعان جۇڭگو-ەكۆادور گۆينەياسى دوستىق شيپاحاناسى سياقتى ماڭىزدى نىساندار جەرگىلىكتى حالىققا باقىت جاراتىپ، افريكا-جۇڭگو دوستىعىنىڭ سيمۆولىنا اينالدى. ەكۆاتور گۆينەياسى جۇڭگوعا قاقپانى ايقارا اشىپ، جۇڭگو كاسىپورىندارىنىڭ ەكۆاتور گۆينەياسىنا بارىپ قارجى قوسىپ، سەلبەستىك جاساۋىن، ەكۆاتور گۆينەياسى ەكونوميكاسىنىڭ كوپ نەگىزدەنۋى مەن ونەركاسىپتەنۋىن جۇزەگە اسىرۋىنا، مەملەكەتتىڭ باياندى، اقاۋسىز دامۋىن جۇزەگە اسىرۋعا دەم بەرۋىن قارسى الادى. ءتوراعا شي جينپيڭ العا قويعان ادامزاتتىڭ تاعدىرلاس ورتاق تۇلعاسىن قۇرۋ تانىمى، سونداي-اق «ءبىر بەلدەۋ، ءبىر جولدى» بىرگە قۇرۋ، الەمدىك دامۋ دارىپتەمەسى، الەمدىك حاۋىپسىزدىك دارىپتەمەسى جانە الەمدىك وركەنيەت دارىپتەمەسى ادامزاتتىڭ بەيبىت العا باسۋىن ىلگەرىلەتۋگە، اناعۇرلىم كوركەم دۇنيە قۇرۋعا ءتيىمدى. ەكۆاتور گۆينەياسى جۇڭگونىڭ وڭىرلىك قولامتالى ماسەلەلەردى ساياسي جولمەن شەشۋدى ىلگەرىلەتۋ، دۇنيە ءجۇزىنىڭ بەيبىتشىلىگى مەن دامۋىن جەبەۋ جولىندا كورسەتكەن بەلسەندى قۇلشىنىستارىن جوعارى باعالايدى، جۇڭگومەن جۇڭگو-افريكا سەلبەستىك تالقىسى، بريكس ەلدەرى سياقتى جۇلگەدەگى سەلبەستىكتى كۇشەيتىپ، الەمدىك جونگە سالۋ جۇيەسىنىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتۋدى قالايدى. ەكۆاتور گۆينەياسى ءبىر جۇڭگو پرينسيبىن باتىل ۇستانادى، دۇنيە جۇزىندە ءبىر عانا جۇڭگو بار، تايۋان جۇڭگو تەرريتورياسىنىڭ ايرىلماس ءبىر بولەگى، جۇڭحۋا حالىق رەسپۋبليكاسى ۇكىمەتى بۇكىل جۇڭگوعا ۋاكىلدىك ەتەتىن بىردەن-ءبىر زاڭدى ۇكىمەت دەپ قارايدى، ءارقانداي فورماداعى «تايۋاندى دەربەستەندىرۋگە» قارسى تۇرادى، جۇڭگو ۇكىمەتىنىڭ مەملەكەتتىڭ بۇكىلدەي بىرلىككە كەلۋىن جۇزەگە اسىرۋ جولىندا كورسەتكەن قۇلشىنىستارىن باتىل قولدايدى.
كەڭەستەن كەيىن، ەكى ەل باسشىلارى قارجى قوسۋ، ەكونوميكالىق دامۋ، سيفرلى ەكونوميكا، جاسىل دامۋ، الەمدىك دامۋ دارىپتەمەسىن تياناقتاندىرۋ سياقتى سالالارداعى كوپتەگەن ەكى جاقتى سەلبەستىك حۇجاتتارعا قول قويۋعا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن ەكۆاتور گۆينەياسى رەسپۋبليكاسىنىڭ جالپى بەتتىك ستراتەگيالىق سەلبەستىك سەرىكتەستىك قاتىناس ورناتۋ جونىندەگى بىرلەسكەن مالىمدەمەسىن» جاريالادى.
سول كۇنى كەشتە شي جينپيڭ مەن پىڭ لييۋان حالىق سارايىنىڭ التىن ءتۇستى زالىندا وبياڭ مەن حانىمىنا ارناپ قارسى الۋ قوناعاسىن بەردى.
ۋاڭ ي جوعارىداعى قيمىلدارعا قاتىناستى.
اۋدارعان: گۇلنۇر قابىلقاق قىزى