ءوز حابارىمىز. تاياۋدا، ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ پۋ-ىر ۇلتتار ىنتىماعى سەرت ەسكەرتكىشىنە سەرت بەرۋشىلەر ۋاكىلدەرىنىڭ ۇرپاقتارىنا جاۋاپ حات جازىپ، ولاردى شىنايى شابىتتاندىردى ءارى ولارعا ىقىلاستى ءۇمىت ارتتى.

 

شي جينپيڭ مىنالاردى اتاپ كورسەتتى: 1951-جىلى سىزدەردىڭ اعا بۋىندارىڭىزدى قامتىعان ءار ۇلت ۋاكىلدەرى ەسكەرتكىش ورناتىپ، سەرت بەرىپ، ءبىر نيەت، ءبىر تىلەكپەن پارتياعا ىلەسەمىز دەپ ايبىندى سەرتتەستى. 70 نەشە جىلدان بەرى، ءار ۇلت بۇقاراسى ءبىر نيەت، ءبىر تىلەكپەن پارتياعا ىلەسىپ، ىنتىماقتاسا كۇرەس جۇرگىزىپ، شەكارا ءوڭىردىڭ ەكونوميكالىق، قوعامدىق دامۋىن ىلگەرىلەتۋدە تاريحي تابىستارعا قول جەتكىزىپ، ۇلتتار ىنتىماعى العاباسارلىعىنىڭ جاندى داستانىن جازدى.

 

شي جينپيڭ بىلاي دەپ باسا دارىپتەدى: جۇڭحۋا ۇلتى ۇلى شاڭىراق، 56 ۇلت ىنتىماعى جاراسقان ءبىر ءۇيلى جاندار. سىزدەردىڭ اعا بۋىنداردىڭ داڭقتى ءداستۇرىن ساۋلەلەندىرىپ، سەرت ەسكەرتكىشىنىڭ حيكايالارىن ءتىپتى دە جاقسى بايانداپ، ۇلتتار ىنتىماعىنىڭ تاماشا اڭگىمەلەرىن ۇرپاقتان-ۇرپاققا جالعاستىرۋلارىڭىزدى ءۇمىت ەتەمىن. ءار ۇلت حالقى جۇڭحۋا ۇلتى ورتاق تۇلعا تانىمىن ەستە بەرىك ساقتاپ، قانعا ءسىڭىرىپ، وتان توپىراعىن بىرگە قورعاپ، كورىكتى مەكەندى بىرگە قۇرىپ، ۇلتتار ىنتىماعى، العاباسارلىعى بايشەشەگىن ءتىپتى دە قۇلپىرتا ءتۇسۋى كەرەك.

 

1950-جىلى يۇننان ولكەسى پۋ-ىر ارناۋلى رايونىنداعى ءار ۇلت ۋاكىلدەرى ۇسىنىس بويىنشا بەيجيڭگە بارىپ جاڭا جۇڭگو قۇرىلعاندىعىنىڭ ءبىر جىلدىعىن قۇتتىقتاۋ قيمىلىنا قاتىناسىپ، ماۋ زىدۇڭ قاتارلى پارتيا مەن مەملەكەت باسشىلارىنىڭ ىقىلاستى قابىلداۋىندا بولدى. 1951-جىلى جاڭا جىلدا پۋ-ىر ارناۋلى رايونىنداعى ءار ۇلت بۇقاراسى سەرت بەرۋ جينالىسىن وتكىزىپ، از ۇلتتاردىڭ سالت-ساناسى بويىنشا سەرت ەسكەرتكىشىن ورناتىپ، «ءبىر نيەت، ءبىر تىلەكپەن سوڭىنا دەيىن ىنتىماقتاسىپ، جۇڭگو كوممۋنيستىك پارتياسىنىڭ باسشىلىعىندا، تەرەزەسى تەڭ، ەركىن، باقىتتى ۇلى شاڭىراق قۇرۋ جولىندا كۇرەسۋگە سەرت بەرەمىز!»،-دەدى.  ءار ۇلت ۋاكىلىنەن 48 ادام ەسكەرتكىشكە قول قويدى. تاياۋدا پۋ-ىر ۇلتتار ىنتىماعى سەرت ەسكەرتكىشىنە سەرت بەرۋشىلەردىڭ ۇرپاقتارى باس شۋجي شي جينپيڭگە حات جازىپ، جەرگىلىكتى ءار ۇلت بۇقاراسىنىڭ پارتيانىڭ باسشىلىعىندا باقىتتى تۇرمىس كەشىرۋ جاعدايىنان مالىمەت بەرىپ، سەرتتى ەستە بەرىك ساقتاپ، پارتياعا ىلەسۋ، ۇلتتار ىنتىماعى مەن شەكارا ءوڭىردىڭ گۇلدەنىپ-كوركەيۋىنە، دامۋىنا ۇلەس قوسۋ بەكىمىن ءبىلدىردى.