ءوز حابارىمىز. 12-ايدىڭ 10-كۇنى تۇستەن بۇرىن، مەملەكەت ءتوراعاسى شي جينپيڭ بەيجيڭدە حالىق سارايىندا جۇڭگوعا كەلىپ «1+10» كەڭەس ماجىلىسىنە قاتىناسقان نەگىزگى حالىقارالىق ەكونوميكالىق ۇيىمداردىڭ جاۋاپتىلارىمەن كەزدەستى.

شي جينپيڭ نەگىزگى حالىقارالىق ەكونوميكالىق ۇيىمداردىڭ جاۋاپتىلارىمەن ەستەلىك سۋرەتكە ءتۇسىپ، ولاردىڭ جۇڭگونىڭ وسىزامانداندىرۋ ىستەرىن ۇزاق ۋاقىت قولداعاندىعىنا العىس ايتتى.

شي جينپيڭ مىنالاردى اتاپ كورسەتتى: قازىر 100 جىلدىق وزگەرىس جەدەل دامىپ، دۇنيە ءجۇزى جاڭا اۋمالى-توكپەلى وزگەرىس كەزەڭىنە ءوتىپ، ءتورت كوشەنىڭ تۇيىلىسىندە تۇر. ادامزات − بەينەت پەن زەينەتتى بىرگە وتكەرەتىن تاعدىرلاس ورتاق تۇلعا، ءار ەل 190 نەشە كەمەگە وتىرمايدى، قايتا تاعدىرلاس، ورتاق ۇلكەن كەمەگە وتىرادى، ءار ەل ءبىر-ءبىرىنىڭ دامۋىن سىن-سايىس ەمەس، وراي دەپ ءبىلىپ، ءبىر-ءبىرىن قارسىلاس ەمەس، ارىپتەس ساناپ، ءبىر جاعادان باس، ءبىر جەڭنەن قول شىعارىپ، ىنتىماقتاسا سەلبەسىپ، ءوزارا پايدا جەتكىزىپ، تەڭ يگىلىككە كەنەلۋدى ءداۋىردىڭ نەگىزگى اۋەنىنە اينالدىرۋ كەرەك. جۇڭگو نەگىزگى حالىقارالىق ەكونوميكالىق ۇيىمدارمەن بىرگە كوپ جاقتىلىقتى امالياتتا ايگىلەپ، حالىقارالىق سەلبەستىكتى جەبەپ، دۇنيە ءجۇزى وڭتۇستىك ەلدەردىڭ دامۋىن قولداپ، تەڭ، ءتارتىپتى دۇنيە ءجۇزىنىڭ كوپ ۇيەكتەنۋىن، جالپىعا ءتيىمدى، قامتىمدى ەكونوميكانىڭ الەميلەنۋىن ىلگەرىلەتىپ، بىرگە داميتىن ءادىل دۇنيە قۇرۋدى قالايدى.

جاڭا كوركەيتۋ بانكەسىنىڭ باستىعى روسسەۆ، حالىقارالىق اقشا قورى ۇيىمىنىڭ ءتوراعاسى گەورگيەۆا، دۇنيە بانكەسىنىڭ باستىعى پىڭ انجيە، دۇنيە جۇزىلىك ساۋدا ۇيىمىنىڭ باس القاسى يۆيلا شەتەلدىك سيلى قوناقتار اتىنان ءسوز سويلەدى. ولار جۇڭگو ەكونوميكاسىنىڭ دامۋ جەتىستىكتەرىن جوعارى باعالاپ، جۇڭگونىڭ دامۋ بولاشاعىنا ۇمىتپەن قارايتىندىقتارىن ءبىلدىرىپ، جۇڭگونىڭ ۇزاق ۋاقىتتان بەرى حالىقارالىق ەكونوميكالىق ۇيىمداردىڭ قىزمەتىن قولداعاندىعىنا العىس ايتتى. ولار بىلاي دەدى: جۇڭگونىڭ دامۋ جەتىستىكتەرى دۇنيەنى جالت قاراتتى، اسىرەسە، كەدەيلىكتى ازايتۋ سالاسىندا ادامزات كەرەمەتىن جاراتتى، جاڭا ساپالى وندىرگىش كۇش جاعىندا دۇنيە ءجۇزى بويىنشا الدىڭعى قاتاردا تۇردى، بۇل جۇڭگو ۇكىمەتى تاباندى بولعان حالىقتى وزەك ەتكەن دامۋ يدەياسىنىڭ تابىستى ءارى جارامدى ەكەندىگىن، دۇنيە ءجۇزى جونىنەن ماڭىزدى وي سالۋ مانىنە يە ەكەنىن تولىق دالەلدەدى. جۇڭگو باستان-اياق دۇنيە ءجۇزى ەكونوميكاسىنىڭ ارتۋىنداعى ماڭىزدى قوزعالتقىش جانە ورنىقتىرعىش، كوپ جاقتىلىقتىڭ باتىل قورعاۋشىسى. جۇڭگو رەفورمانى ۇزدىكسىز جاپپاي تەرەڭدەتىپ، سىرتقا ەسىك اشۋدى كەڭەيتىپ، جوعارى ساپالى دامۋدى جۇزەگە اسىرىپ، دۇنيە جۇزىنە، اسىرەسە، دۇنيە ءجۇزى وڭتۇستىك ەلدەرىنە وراسان زور وراي ازىرلەدى. ءتوراعا شي جينپيڭ «ءبىر بەلدەۋ، ءبىر جولدى» بىرگە قۇرۋ دارىپتەمەسىن جانە 3 ءىرى الەمدىك دارىپتەمەنى العا قويىپ، جۇڭگونىڭ جاۋاپكەرشىلىك ارقالايتىن ءىرى ەل رەتىندەگى جاۋاپكەرشىلىگىن تولىق ايگىلەپ، دۇنيە ءجۇزى وڭتۇستىك ەلدەردىڭ جۇڭگونىڭ دامۋ ورايىنان يگىلىكتەنىپ، ءوزىنىڭ دامۋىن جۇزەگە اسىرۋىنا ماڭىزدى تۇعىر ازىرلەدى. قازىر دۇنيە ءجۇزىنىڭ ەكونوميكالىق جاعدايى كوپتەگەن قيىنشىلىقتار مەن سىن-سايىستارعا ءدوپ كەلىپ وتىر، سىڭار جاقتىلىق، قورعانىمپازدىق ءورشي ءتۇستى. دۇنيە جۇزىندەگى ءار ەل نازارىن جۇڭگوعا اۋداردى، ءار ەل جۇڭگونىڭ دۇنيە ءجۇزى ەكونوميكاسىنىڭ ارتۋىنداعى ەڭ ماڭىزدى قوزعالتقىشتىق رولىن ۇزدىكسىز ساۋلەلەندىرۋىن ءۇمىت ەتەدى جانە وعان سەنەدى. باستى حالىقارالىق ەكونوميكالىق ۇيىمدار جۇڭگو جاقپەن تىعىز سەلبەسىپ، كوپ جاقتىلىققا تاباندى بولىپ، ەركىن ساۋدانى جانە ەكونوميكانىڭ الەميلەنۋىن قورعاپ، دۇنيە ءجۇزىنىڭ بىرگە دامۋى مەن گۇلدەنۋىن جەبەۋگە اناعۇرلىم زور ۇلەس قوسىپ، ادامزاتتىڭ تاعدىرلاس بولاشاعىن بىرگە جاراتۋدى قالايدى.

شي جينپيڭ شەتەل ۋاكىلدەرىنىڭ ءسوزىن مۇقيات تىڭدادى ءارى دۇنيە ءجۇزى ەكونوميكاسى، جۇڭگو ەكونوميكاسى، الەمدىك ەكونوميكانى جونگە سالۋ سياقتى كوڭىل ءبولىپ وتىرعان ماسەلەلەرگە توقتالدى.

شي جينپيڭ بىلاي دەپ اتاپ كورسەتتى: دۇنيە ءجۇزى ەكونوميكاسىنىڭ قۋاتتى جانە باياندى ارتۋ جولىنا ءتۇسۋىن قالاي ىلگەرىلەتۋ − حالىقارالىق قوعام ءدوپ كەلگەن كەلەلى تاقىرىپ. ءار ەلدىڭ ەكونوميكاسىندا وزىندىك قيىندىعى بار، اشىق دۇنيە ءجۇزى ەكونوميكاسى جۇيەسىن سەلبەسىپ قۇرىپ، جاڭالىق اشۋ ارقىلى دەم بەرۋگە تاباندى بولىپ، سيفرلى ەكونوميكا، جاساندى زەردە، تومەن كومىرتەكتى تەحنيكا سياقتى ماڭىزدى ورايلاردى ويداعىداي يگەرىپ، ەكونوميكالىق ارتۋدىڭ جاڭا قوزعاۋشى كۇش قاينارىن جاراتىپ، ءبىلىم، تەحنيكا، دارىندىلاردىڭ ەل ارالىق اۋىسۋىن قولداۋ كەرەك. «شاعىن اۋلا بيىك داۋال قۇرۋعا»، «بايلانىستى اجىراتىپ، تىزبەكتى ۇزۋگە» بوي ۇرۋ باسقالاردى زياندايدى، وزىنە دە پايدا جەتكىزبەيدى. جۇڭگو قاي-قاشان دا جۇڭگو جاقسى بولسا، دۇنيە جاقسى بولادى؛ دۇنيە جاقسى بولسا، جۇڭگو ودان دا جاقسى بولادى دەپ سانايدى. ءار ەل ەكونوميكالىق جاقتاعى ءبىر-بىرىنە سۇيەنىپ ءومىر ءسۇرۋدى حاۋىپ-قاتەر دەپ قاراماي، قايتا ارتىقشىلىقتى قابىلداپ، كەمشىلىكتى تولىقتايتىن، ءوزارا پايدا جەتكىزىپ، تەڭ يگىلىككە كەنەلەتىن يگىلىكتى ءىس دەپ قاراۋ كەرەك.

شي جينپيڭ جۇڭگو كوممۋنيستىك پارتياسى 20-كەزەكتى ورتالىق كوميتەتى ءۇشىنشى جالپى ءماجىلىسىنىڭ قاتىستى جاعدايلارىن، اسىرەسە، جۇڭگونىڭ تاياۋدا شىعارعان جەلىلەس ماڭىزدى شارالارىن تانىستىرىپ، بىلاي دەپ اتاپ كورسەتتى: 40 نەشە جىل ءۇرتىس، تەز دامۋدى باستان كەشىرگەن جۇڭگو ەكونوميكاسى جوعارى ساپالى دامۋ كەزەڭىنە ءوتتى، دۇنيە ءجۇزى ەكونوميكاسىنىڭ ارتۋىنا قوسقان ۇلەسى %30 اينالاسىندا بولدى. جۇڭگو بيىلعى ەكونوميكالىق ارتۋ نىساناسىن جۇزەگە اسىرىپ، دۇنيە ءجۇزى ەكونوميكاسىنىڭ ارتۋىنداعى ەڭ ۇلكەن قوزعالتقىشتىق رولىن ۇزدىكسىز ساۋلەلەندىرۋگە تولىق سەنىمدى. جۇڭگونىڭ دامۋى اشىق، قامتىمدى بولادى، جۇڭگو سىرتقا ەسىك اشۋدى ۇزدىكسىز كەڭەيتىپ، حالىقارالىق جوعارى ولشەمدى ەكونوميكا-ساۋدا ەرەجەسىمەن ىرىقتىلىقپەن ۇشتاسىپ، بازارلانعان، زاڭمەن باسقارىلاتىن، حالىقارالانعان ماڭداي الدى ساۋدا ورتاسىن قۇرىپ، اناعۇرلىم جوعارى دەڭگەيدەگى اشىق ەكونوميكانىڭ جاڭا ءتۇزىلىسىن ورناتىپ، دۇنيە جۇزىندەگى ءار ەلدىڭ دامۋىنا اناعۇرلىم كوپ جاڭا وراي ازىرلەپ، اناعۇرلىم كوپ دامۋ پايداسىنان يگىلىكتەندىرەدى.

شي جينپيڭ «ءبىر بەلدەۋ، ءبىر جول» دارىپتەمەسى العا قويىلعان 10 جىلدان بەرى قول جەتكەن بەلسەندى ىلگەرىلەۋشىلىكتەردى تانىستىرىپ، بىلاي دەپ باسا دارىپتەدى: جۇڭگو ىسكەر، ناقتى اتقارۋشى، «ءبىر بەلدەۋ، ءبىر جولدى» بىرگە قۇرۋدى «شەگە قاعۋ» رۋحىمەن تىڭعىلىقتى ىلگەرىلەتىپ، جۇڭگو مەن دۇنيە ءجۇزىنىڭ بىرگە دامۋىنا دانەكەر بولادى. حالىقارالىق ەكونوميكالىق ۇيىمداردىڭ «ءبىر بەلدەۋ، ءبىر جول» قۇرىلىسىنا ۇزدىكسىز بەلسەنە ات سالىسىپ، بەيبىت دامىعان، ءوزارا ءتيىمدى سەلبەستىك جاسايتىن، بىرگە گۇلدەنگەن دۇنيە جۇزىندەگى ءار ەلدىڭ وسىزاماندانۋىن ىلگەرىلەتۋىن قارسى الامىز.

الەمدىك ەكونوميكانى جونگە سالۋ جونىندە شي جينپيڭ مىنالاردى باسا دارىپتەدى: دۇنيە ءجۇزى ەكونوميكاسىنىڭ ارتۋىن ىلگەرىلەتۋ ءونىمدى، ناقتى الەمدىك ەكونوميكانى جونگە سالۋدان ايرىلا المايدى. حالىقارالىق ەكونوميكالىق ۇيىمدار داۋىرمەن بىرگە العا باسىپ، ءداۋىردىڭ تالابى مەن دۇنيە ءجۇزى حالقىنىڭ تىلەگىنە جاۋاپ قايتارىپ، الەمدىك ەكونوميكانى جونگە سالۋ جۇيەسى رەفورماسىنا بەلسەنە ات سالىسىپ جانە ونى ىلگەرىلەتىپ، اناعۇرلىم ءادىل، ۇيلەسىمدى الەمدىك ەكونوميكانى جونگە سالۋ جۇيەسىن ورناتىپ، دۇنيە ءجۇزى ەكونوميكالىق جاعدايىنىڭ دامۋ وزگەرىسىن بەينەلەپ، دۇنيە ءجۇزى وڭتۇستىك ەلدەردىڭ ۋاكىلدىك سيپاتى مەن ءسوز سويلەۋ ۇقىعىن ارتتىرۋ كەرەك. تاراپتار بۇل جاعىندا كەيبىر ورتاق تانىمعا كەلدى، مۇنداعى شەشۋشى ءتۇيىن جوبانى رەالدىققا اينالدىرۋدا. الەمدىك ەكونوميكانى جونگە سالۋعا قالاي رەفورما جاسالسادا، ءسوز جوق، بىرگە اقىلداسۋ، بىرگە قۇرۋ، بىرگە يگىلىكتەنۋ پرينسيبىنە تاباندى بولىپ، ناعىز كوپ جاقتىلىقتان اۋىتقىماي، ءار ەلدىڭ ۇقىق تەڭدىگىنە، وراي تەڭدىگىنە، ەرەجە تەڭدىگىنە كەپىلدىك ەتۋ كەرەك.

شي جينپيڭ جۇڭگو جاقتىڭ جۇڭگو-ا ق ش قاتىناسىن دامىتۋداعى دايەكتى پرينسيپتىك تۇرعىسىن بايىمداپ، بىلاي دەپ باسا دارىپتەدى: جۇڭگو ا ق ش ۇكىمەتىمەن سويلەسۋدى ساقتاپ، سەلبەستىكتى كەڭەيتىپ، الاۋىزدىقتى تىزگىندەپ، جۇڭگو-ا ق ش قاتىناسىنىڭ ورنىقتى، اقاۋسىز، باياندى باعىتقا قاراي دامۋىن ىلگەرىلەتۋدى قالايدى، ا ق ش-نىڭ جۇڭگومەن ءبىر باعىتتا بولۋىن ءۇمىت ەتەدى. كەدەن سالىعى سوعىسى، ساۋدا سوعىسى، عىلىم-تەحنيكا سوعىسى دەگەندەر تاريح اعىمى مەن ەكونوميكالىق زاڭدىلىققا قايشى، بۇدا جەڭىمپاز بولمايدى. جۇڭگو زەيىن-زەردەنى شوعىرلاندىرا وتىرىپ ءوز ءىسىن ويداعىداي ىستەۋگە باستان-اياق تاباندى بولىپ، ءوزىنىڭ يەلىك ۇقىعىن، حاۋىپسىزدىگىن، دامۋ مۇددەسىن باتىل قورعايدى. سونىمەن بىرگە جۇڭگونىڭ جوعارى دەڭگەيدەگى سىرتقا ەسىك اشۋدى ىلگەرىلەتۋ بەكىمى وزگەرمەيدى.

ۋاڭ ي كەزدەسۋگە قاتىناستى.