شي جينپيڭ رەسەيدىڭ زۇڭتۇڭىمەن ەكران ارقىلى كەڭەس وتكىزدى

ءوز حابارىمىز. 1-ايدىڭ 21-كۇنى تۇستەن كەيىن مەملەكەت ءتوراعاسى شي جينپيڭ بەيجيڭدە حالىق سارايىندا رەسەيدىڭ زۇڭتۇڭى پۋتينمەن ەكران ارقىلى كەڭەس وتكىزدى.

ەكى ەلدىڭ مەملەكەت باسشىلارى ءوزارا جاڭا جىل قۇتتى بولسىن ايتتى. شي جينپيڭ مىنالاردى انىق ايتتى: بىرنەشە كۇننەن كەيىن جۇڭگونىڭ كوكتەم مەرەكەسى بولادى، كونەنى اتتاندىرىپ، جاڭانى قارسى العان وسىناۋ ساتتە زۇڭتۇڭ مىرزامەن ەكران ارقىلى كەڭەسكەنىمە توتەنشە قۋانىشتىمىن، جاڭا ءبىر جىلدا جۇڭگو-رەسەي قاتىناسىنىڭ اناعۇرلىم ومىرشەڭ بولۋىن تىلەيمىن.

پۋتين بىلاي دەدى: جاڭا جىل باستالىسىمەن ءتوراعا شي جينپيڭمەن ەكران ارقىلى كەڭەسكەنىمە توتەنشە قۋانىشتىمىن، ءتوراعا شي جينپيڭ مەن جۇڭگو حالقىنىڭ كوكتەم مەرەكەسىنىڭ كوڭىلدى، ىستەرىنىڭ ءساتتى بولۋىن تىلەيمىن!

شي جينپيڭ مىنالاردى انىق ايتتى: 2024-جىلى ءبىز 3 رەت كەزدەسىپ، كوپتەگەن ماڭىزدى ورتاق تانىمعا كەلدىك. ەكى ەل ديپلوماتيالىق قاتىناس ورناتقاندىعىنىڭ 75 جىلدىعىن سالتاناتپەن قۇتتىقتاپ، ماڭگىلىك تاتۋ كورشىلىك، دوستىق، جالپى بەتتىك ستراتەگيالىق سەلبەستىك، ءوزارا پايدا جەتكىزە ورتاق يگىلىكتەنۋدى رۋحاني وزەك ەتكەن جۇڭگو-رەسەي قاتىناسى ۇزدىكسىز تىڭ ومىرشەڭدىك كۇشكە يە بولدى. جۇڭگو-رەسەي مادەنيەت جىلى تارتىمدى بولدى، ناقتى سەلبەستىك ورنىقتىلىق بارىسىندا ىلگەرىلەدى، ەكى جاقتى ساۋدا سوماسىندا ارتۋ جاعدايى ساقتالدى، ب م ۇ، شاڭحاي سەلبەستىك ۇيىمى، بريكس ەلدەرى سياقتى كوپ جاقتى تەكشەلەردە تىعىز سەلبەستىك جاسالىپ، الەمدىك باسقارۋ جۇيەسى رەفورماسى مەن قۇرىلىسىنا اناعۇرلىم كوپ وڭ ەنەرگيا قوسىلدى.

شي جينپيڭ بىلاي دەپ باسا دارىپتەدى: جاڭا ءبىر جىلدا، مەن زۇڭتۇڭ مىرزامەن بىرلىكتە جۇڭگو-رەسەي قاتىناسىندا بيىكتە تۇرىپ الىسقا كوز جىبەرە ۇزدىكسىز جەتەكشىلىك ەتىپ، جۇڭگو-رەسەي قاتىناسىنىڭ ورنىقتىلىعى مەن توزىمدىلىگى ارقىلى سىرتقى ورتانىڭ تۇراقسىزدىعىنا توتەپ بەرىپ، ەكى ەلدىڭ دامۋىن، كوركەيۋىن ورتاق جەبەپ، حالىقارالىق تەڭدىكتى، ادىلدىكتى قورعاۋدى قالايمىن. ەكى جاق ستراتەگيالىق سەلبەستىكتى ۇزدىكسىز تەرەڭدەتىپ، ءبىرىن-ءبىرى تاباندىلىقپەن قولداپ، ەكى ەلدىڭ ورىندى مۇددەسىن قورعاۋى كەرەك. ەكى جاقتى قاتىناستى بەكەمدەپ جانە كەڭەيتىپ، ناقتى سەلبەستىكتىڭ ىشكەرىلەي دامۋىن ىلگەرىلەتۋ كەرەك. بيىل جۇڭگو حالقىنىڭ جاپون شاپقىنشىلارىنا قارسى سوعىسىنىڭ، سوۆەت وداعىنىڭ ۇلى وتان سوعىسى مەن دۇنيە جۇزىلىك فاشيزمگە قارسى سوعىستىڭ جەڭىسكە جەتكەندىگىنىڭ 80 جىلدىعى، سونداي-اق بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. جۇڭگو مەن رەسەي وسىنى وراي ەتىپ، بىرلەسكەن مەملەكەتتەر ۇيىمىن ۇيتقى ەتكەن حالىقارالىق جۇيە مەن دۇنيە جۇزىلىك ەكىنشى سوعىستىڭ جەڭىس جەتىستىكتەرىن ورتاق كۇش سالا قورعاۋ؛ ءار ەلدىڭ بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتى مەن پرينسيبىنە بويسۇنۋىن ىلگەرىلەتۋ؛ جالپى بەتتىك مويىندالعان حالىقارالىق قاتىناستىڭ نەگىزگى ولشەمىنە تاباندى بولىپ، ناعىز كوپ جاقتىلىقتى امالياتتا ايگىلەۋى كەرەك. شاڭحاي سەلبەستىك ۇيىمىنا كەزەكتى ءتوراعا ەل رەتىندە، جۇڭگو رەسەيمەن جانە باسقا دا مۇشە ەلدەرمەن بىرلىكتە شاڭحاي سەلبەستىك ۇيىمىنىڭ اناعۇرلىم جوعارى ساپالى دامۋدىڭ، اناعۇرلىم جاۋاپكەرشىلىك ارقالاپ، ناتيجە جاراتۋدىڭ جاڭا كەزەڭىنە ءوتۋىن ىلگەرىلەتۋدى قالايدى. جۇڭگو مەن رەسەي «بريكس ەلدەر سەلبەستىگىن» ورتاق كۇش سالا ىلگەرىلەتىپ، جەر شارى وڭتۇستىك ەلدەردىڭ ىنتىماقتاسىپ، ءوزىن الۋەتتەندىرۋ تىڭ داستانىن جازۋى كەرەك.

پۋتين بىلاي دەدى: رەسەي مەن جۇڭگو باستان-اياق ءبىر-بىرىنە سەنەدى، ءبىرىن-ءبىرى قولدايدى، تەڭ تۇرعىدا مامىلە جاسايدى، ەكى جاقتىڭ سەلبەستىگى ەكى ەل حالقىنىڭ مۇددەسىنە ۇيلەسەدى، حالىقارالىق جاعدايدىڭ وزگەرىسىنىڭ ىقپالىنا ۇشىرامايدى. ەكى ەلدىڭ ەكونوميكا-ساۋدا، ەنەرگيا سەلبەستىگىندە تاماشا جاعداي ساقتالعانىنا، ءوزارا ساپاردا بولاتىن ساياحاتشىلاردىڭ ۇزدىكسىز كوبەيگەنىنە، ەكى جاقتىڭ كوپ جاقتى ورىنداردا تىعىز قارىم-قاتىناستى، سەلبەستىكتى ساقتاعانىنا توتەنشە قۋانىشتىمىن. رەسەي جاق تايۋاندى جۇڭگو تەرريتورياسىنىڭ ايرىلماس ءبىر بولەگى دەۋدى باتىل قولدايدى، ءارقانداي فورماداعى «تايۋاندى دەربەستەندىرۋگە» باتىل قارسى تۇرادى. 80 جىلدىڭ الدىندا رەسەيلىكتەر مەن جۇڭگولىقتار ىستىق قاندارىمەن جانە ومىرلەرىمەن شاپقىنشىلارعا قارسى تۇرىپ، مەملەكەتتىڭ يەلىك ۇقىعى مەن ۇلتتىڭ ار-نامىسىن قورعادى. بيىل ءبىز دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن سالتاناتپەن قۇتتىقتاۋ ارقىلى دۇنيە جۇزىلىك ەكىنشى سوعىستىڭ جەتىستىكتەرىن قورعاۋىمىز كەرەك. رەسەي جۇڭگومەن كوپ جاقتى ىستەردەگى سەلبەستىكتى كۇشەيتىپ، دۇنيە ءجۇزىنىڭ بەيبىت دامۋىندا بەلسەندى رول اتقارۋدى قالايدى.

ەكى ەل باسشىلارى ورتاق كوڭىل ءبولىپ وتىرعان حالىقارالىق، وڭىرلىك ماسەلەلەر جونىندە ىشكەرىلەي پىكىر اۋىستىرىپ، جاڭا ءبىر جىلدا ستراتەگيالىق تۇسىنىستىكتى ۇزدىكسىز ساقتاۋعا قوسىلدى.

ۋاڭ ي جوعارىداعى قيمىلعا قاتىناستى.