تاياۋدا باس شۋجي شي جينپيڭ گۇيجوۋدا تەكسەرىپ-زەرتتەۋ جۇرگىزدى. بۇل بيىلعى مەملەكەتتىك ەكى ماجىلىستەن كەيىن باس شۋجيدىڭ تۇڭعىش رەت جەرگىلىكتى ورىندارعا بارىپ قىزمەت تەكسەرۋى، سونداي-اق پارتيانىڭ 18-قۇرىلتايىنان بەرى باس شۋجيدىڭ گۇيجوۋعا 3-رەت بارۋى.

گۇيجوۋدىڭ بولاشاق دامۋى جونىندە باس شۋجي «ءۇش ورتا» تۋرالى توقتالدى. ول الدىمەن گۋمانيتارلىق ورتاعا توقتالىپ: گۇيجوۋدىڭ تاريحي نەگىزى تەرەڭ، توڭكەرىستىك مادەنيەتكە باي، ۇلتتىق مادەنيەتى الۋان ءتۇرلى، -دەدى. وسى رەتكى تەكسەرۋدىڭ ءبىرىنشى بەكەتىندە باس شۋجي مىڭ جىلدىق  دۇڭزۋ قىستاعىنا باردى. وسى جاقتاعى ابزالدىلىقتان قايتكەندە ويداعىداي پايدالانىپ، ەكونوميكالىق، قوعامدىق دامۋعا دەم بەرۋگە بولادى؟ باس شۋجي مادەنيەت، ساياحات، دەنە تاربيە ىستەرىنىڭ توعىسۋىن باسا دارىپتەدى، بۇندا «دەنە تاربيە ىستەرى» تىلگە تيەك ەتىلدى. جاقىنعى جىلداردان بەرى گۇيجوۋداعى قىستاق فۋتبول جارىسى جۇرت نازارىن اۋدارىپ، جەرگىلىكتى ورىننىڭ دامۋىنا جەتەكشىلىك ەتۋدەگى تيپتىك مىسالعا اينالدى. ساياحات كاسىبى ۇزدىكسىز گۇلدەنىپ-كوركەيىپ، جاڭالىق جاراتىپ، تاماشا مازمۇندارمەن جۇرتتى قىزىقتىردى.

ەكىنشى، ساۋدا ورتاسىنا توقتالدى، باس شۋجي: ءبىر جەردىڭ دامۋ ومىرشەڭدىك كۇشى ساۋدا ورتاسىمەن تىعىز بايلانىستى، -دەپ باسا دارىپتەدى. ەندەشە ساۋدا ورتاسىن قالاي ساپالاندىرۋ كەرەك؟ باس شۋجي «ەكى جاقتى دا بىردەي يگەرۋدى» تىلگە تيەك ەتتى، ءبىر جاعىنان، رەفورمانى يگەرىپ، جوعارى ساپالى دامۋعا تۇساۋ بولاتىن بوگەتتەردى، كەدەرگىلەردى ارىلتۋ كەرەك؛ ەندى ءبىر جاعىنان، كادرلاردى تاربيەلەۋدى، باسقارۋدى يگەرىپ، كادرلاردى جالپى جاعداي تانىمىن، قىزمەت وتەۋ تانىمىن، سەنىمدىلىك تانىمىن، پاكتىك تانىمىن نىعايتۋعا جەتەكتەۋ قاجەت. بىلتىردان باستاپ گۇيجوۋ ساۋدا ورتاسىن بارىنشا جاقسارتۋدىڭ 3 جىلدىق ارەكەتىن اتقارىپ، دامىعان رايوندارعا تۋرالانىپ، ءبىرقىدىرۋ شارالار شىعاردى. مىسالى، كاسىپورىن اشۋ راسىمياتىن ءبىر قىزمەت كۇنىندە ءبىتىرۋ، اكىمشىلىك زاڭ اتقارۋداعى كورنەكتى ماسەلەلەردى ارناۋلى جونگە سالۋ سياقتىلار. كەلەسى قادامدا كاسىپورىندارداعى كەشەۋىلدەتىلگەن قارجىنى بار كۇشپەن اداقتاۋ سياقتى جاقتارعا كۇش سالادى. قاتىستى قىزمەتتەردى ۇزدىكسىز جاقسى ىستەگەندە عانا، «گۇيجوۋدىڭ» بولاشاعى ءتىپتى دە نۇرلانا تۇسەتىن بولادى.

سوڭىندا ەكولوگيالىق ورتاعا توقتالدى. گۇيجوۋدىڭ ەكولوگيالىق ورتاسى جاقسى، 2024-جىلى جاسىل ەكونوميكانىڭ بۇكىل ولكەنىڭ GDP ىندەگى سالىستىرماسى %48 كە جەتتى. وسى رەت گۇيجوۋدا باس شۋجي ەكولوگيالىق ورتانى ويداعىداي قورعاپ، ەكولوگيالىق ابزالدىلىقتى دامۋ ابزالدىلىعىنا اينالدىرۋعا قۇلشىنۋدى باسا دارىپتەدى.

گۋمانيتارلىق ورتا، ساۋدا ورتاسى جانە ەكولوگيالىق ورتا سىندى «ابزالدىقتار» جوعارى ساپالى دامۋمەن ۇشتاسقاندا، «كورىكتى گۇيجوۋدىڭ» جاڭا كەلبەتى اناعۇرلىم ارلەنە تۇسەدى.