ءوز حابارىمىز. مەملەكەت ءتوراعاسى شي جينپيڭ 7-ايدىڭ 9-كۇنى بوليۆيانىڭ زۇڭتۇڭى ارسەمەن ءوزارا قۇتتىقتاۋ تەلەگرامما جولداپ، ەكى ەل ديپلوماتيالىق قاتىناس ورناتقاندىعىنىڭ 40 جىلدىعىن قۇتتىقتادى. 

شي جينپيڭ بىلاي دەپ انىق ايتتى: جۇڭگو مەن بوليۆيا جاقسى دوس، جاقسى باۋىرلاستار. ديپلوماتيالىق قاتىناس ورناتقان 40 جىلدان بەرى، جۇڭگو-بوليۆيا قاتىناسى حالىقارالىق الماعايىپ وزگەرىستەردىڭ سىنىنان ءوتىپ، باستان-اياق تاماشا دامۋ ارىنى ساقتالدى. ەكى جاق ءبىر-ءبىرىنىڭ وزەكتى مۇددەسى مەن كوكەيتەستى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن-ءبىرى باتىل قولداپ، «ءبىر بەلدەۋ، ءبىر جولدى» جوعارى ساپامەن ورتاق قۇرۋ سەلبەستىگىنىڭ تابىسى مول بولدى، حالىقتار دوستىعى جۇرت جۇرەگىنە اناعۇرلىم تەرەڭ ۇيالادى. بىلتىر 11-ايدا مەن سىزبەن 20 ەل توبىنىڭ باسشىلارىنىڭ ريو-دە-جانەيروداعى باس قوسۋى كەزىندە مول ناتيجەلى كەڭەس وتكىزىپ، جۇڭگو-بوليۆيا قاتىناسىنىڭ بولاشاقتاعى دامۋىنا ايقىن باعدار كورسەتتىك. مەن جۇڭگو-بوليۆيا قاتىناسىن دامىتۋعا ايرىقشا ءمان بەرەمىن، زۇڭتۇڭ مىرزامەن بىرلىكتە قۇلشىنىپ، ءداستۇرلى دوستىقتى ۇزدىكسىز جالعاستىرىپ، جۇڭگو مەن بوليۆيا ستراتەگيالىق سەرىكتەستىك قاتىناسىنىڭ تاعى دا تىڭ ساتىعا كوتەرىلۋىنە جەتەكشىلىك ەتىپ، ەكى ەل حالقىن اناعۇرلىم ويداعىداي باقىتقا كەنەلتۋدى قالايمىن.

ارسە بىلاي دەدى: 40 جىلدان بەرى، بوليۆيا مەن جۇڭگو ءوزارا قۇرمەت ەتۋ، دوستىق ىنتىماق نەگىزىندە بەرىك ەكى جاقتى قاتىناس ورناتتى. بوليۆيا جۇڭگونىڭ نەگىزدىك جابدىق، تەحنيكا، ەنەرگيا، دەنساۋلىق-ساقتاۋ قاتارلى سالالاردا كورسەتكەن قولداۋى جانە كومەگىنە جوعارى باعا بەرەدى، جۇڭگونىڭ جەر شارى وڭتۇستىكتەگىلەرىن ىنتىماقتاستىرىپ، لاتىن امەريكا مەن جۇڭگونىڭ سەلبەستىگىن ىلگەرىلەتىپ، ءتىپتى دە ءادىل، تەڭ، سيىسىمدى حالىقارالىق ءتارتىپ ورناتۋ جاقتا اتقارعان باسشىلىق رولىن القايدى، ەكى مەملەكەت حالقىنىڭ باۋىرلاستىق دوستىعىن ۇزدىكسىز تەرەڭدەتۋدى قالايدى.