ءوز حابارىمىز. مەملەكەت ءتوراعاسى شي جينپيڭ 7-ايدىڭ 25-كۇنى تۇستەن بۇرىن بەيجيڭدە حالىق سارايىندا جۇڭگوداعى 16 باس ەلشىنىڭ مەملەكەت حاتىن قابىلدادى.

حالىق سارايىنىڭ سولتۇستىك قاقپاسىنىڭ سىرتىندا قۇرمەت قاراۋىلى سالتاناتپەن قاتارعا تۇرىپ، قوناقتاردى قارسى الۋ مۋزيكاسى وينالدى. ەلشىلەر ىركەس-تىركەس كەلىپ، تۋ شەبىنەن ءوتىپ، باسپالداقپەن جوعارى كوتەرىلدى.

«تاۋ وزەن تابيعاتى» اتتى  الىپ قابىرعا سۋرەت الدىندا، شي جينپيڭ ەلشىلەردىڭ مەملەكەت حاتىن جەكە-جەكە قابىلدادى ءارى ولارمەن ءبىر-بىرلەپ سۋرەتكە ءتۇستى.

جاڭادان تاعايىندالعان ەلشىلەر مىنالار: ۆيەتنامنىڭ جۇڭگوداعى باس ەلشىسى فان چيڭپيڭ، پانامانىڭ جۇڭگوداعى باس ەلشىسى لەي ميڭ، دومينيكانىڭ جۇڭگوداعى باس ەلشىسى گومەس، البانيانىڭ جۇڭگوداعى باس ەلشىسى بودا، جاڭا زەلانديانىڭ جۇڭگوداعى باس ەلشىسى چياۋ ۋىنبو، پاپۋا-جاڭا گۆينەيانىڭ جۇڭگوداعى باس ەلشىسى كامبانە، انگولانىڭ جۇڭگوداعى باس ەلشىسى اللۇن، ەگيپەتتىڭ جۇڭگوداعى باس ەلشىسى نازمي، نيكاراگۋانىڭ جۇڭگودا باس ەلشىسى كۇڭ لى-ران، يراننىڭ جۇڭگوداعى باس ەلشىسى فازري، چيليدىڭ جۇڭگوداعى باس ەلشىسى اريالان، ۋكراينانىڭ جۇڭگوداعى باس ەلشىسى نەچيتايلو، بەنيننىڭ جۇڭگوداعى باس ەلشىسى اجابا، ا ق ش-نىڭ جۇڭگوداعى باس ەلشىسى پاڭ دى-ۋي، يزرايلدىڭ جۇڭگوداعى باس ەلشىسى بەيلي، وڭتۇستىك سۋداننىڭ جۇڭگوداعى باس ەلشىسى مورريس. شي جينپيڭ تاعى شاڭحاي سەلبەستىك ۇيىمىنىڭ باس حاتشىسى ەرمەكبايەۆپتى دە قابىلدادى.

سالت اياقتاعاننان كەيىن، شي جينپيڭ بەيجيڭ زالىندا ەلشىلەرگە ءسوز سويلەدى.

شي جينپيڭ ەلشىلەردىڭ جۇڭگوعا كەلىپ جاڭا مىندەت اتقارۋىن قارسى الىپ، ولاردان ءوز ەلدەرىنىڭ باسشىلارىنا جانە حالقىنا ىزگى تىلەگىن جەتكىزۋدى تاپسىردى، ەلشىلەردىڭ جۇڭگونى جان-جاقتى، ىشكەرىلەي ءتۇسىنىپ، جۇڭگونىڭ ءار ەلمەن دوستىعىن تەرەڭدەتۋگە، جۇڭگونىڭ دۇنيە جۇزىمەن بارىس-كەلىسىن نىعايتۋعا بەلسەندى ۇلەس قوسۋىن ءۇمىت ەتتى.

شي جينپيڭ بىلاي دەدى: جۇڭگو دۇنيە جۇزىندەگى ءار ەل حالقىمەن بولعان دوستىق سۇيىسپەنشىلىكتى باستان-اياق قاستەرلەيدى، ءوزارا قۇرمەت ەتۋ، تەڭ تۇرعىدا مامىلە جاساۋ، ءوزارا پايدا جەتكىزىپ، تەڭ يگىلىككە كەنەلۋ نەگىزىندە ءار ەلمەن جان-جاقتى سەلبەستىك ورىستەتىپ، ءار سالاداعى اۋىس-كۇيىستى كۇشەيتۋدى قالايدى. قازىر جۇڭگو جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋدە، ەكونوميكاسى ۇزدىكسىز ورنىقتىلىق بارىسىندا جاقسارۋدا.جۇڭگو جوعارى دەڭگەيدەگى سىرتقا ەسىك اشۋدى تاباندىلىقپەن كەڭەيتىپ، ەرەكشە كولەمدى بازاردىڭ تيىمدى جاعدايىن جاراتىپ، جۇڭگونىڭ جاڭا دامۋىن ءار ەلدىڭ جاڭا ورايىنا اينالدىرىپ، دۇنيە ءجۇزى ەكونوميكاسىنىڭ ارتۋىنا اناعۇرلىم كوپ تۇراقتىلىق قوسادى.

100 جىلدا بولعان وزگەرىس جاعدايى مەن بىلىقپالىق توعىسقان حالىقارالىق جاعداي الدىندا، ءار ەل بۇرىنعى ءارقانداي كەزدەگىدەن دە ىنتىماقتى، سەلبەستىكتى اناعۇرلىم قاجەت ەتەدى، كىربەڭدىك پەن قاقتىعىستاردى كەڭ پەيىلدىكپەن ءبىر جاقتى ەتىپ، ادامزات تاعدىرىنا سۇيىسپەنشىلىكپەن مامىلە جاساۋ كەرەك. بيىل جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە ءجۇزىنىڭ فاشيزمگە قارسى سوعىسى جەڭىسكە جەتكەندىگىنىڭ 80 جىلدىعى، سونداي-اق ب م ۇ قۇرىلعاندىعىنىڭ 80 جىلدىعى.جۇڭگو ءار ەلمەن بىرگە بىرلەسكەن مەملەكەتتەر ۇيىمىن ۇيتقى ەتكەن حالىقارالىق جۇيە مەن حالىقارالىق زاڭدى نەگىز ەتكەن حالىقارالىق ءتارتىپتى باتىل قورعاپ، دوستىق سەلبەستىكتى امالياتتا ايگىلەۋشى، وركەنيەتتە ءوزارا ۇلگى بولۋدى ىلگەرىلەتۋشى، ادامزاتتىڭ تاعدىرلاس ورتاق تۇلعاسىن قۇرۋشىدان بولىپ، وسى پلانەتانىڭ اناعۇرلىم كوركەم بولاشاعىن قول ۇستاسا جاراتۋدى قالايدى.

ۋاڭ ي جوعارىداعى قيمىلدارعا قاتىناستى.