ءوز حابارىمىز. يزرايل مەملەكەت قورعانىس ارمياسى 3-ايدىڭ 23-كۇنى سوعىس حابارىن جاريالاپ بىلاي دەدى: يزرايل ارمياسى مەن يزرايل مەملەكەت حاۋىپسىزدىگى باس مەكەمەسى گازا ءوڭىرىنىڭ سولتۇستىك بولەگىندەگى شيفا دوحتىرحاناسى ورنالاسقان رايوندا جالعاستى اسكەري ارەكەت ورىستەتتى، قازىرگە دەيىن پالەستيندىك 170 نەشە قارۋلىنى اتىپ ءولتىردى جانە كوپتەگەن قارۋ-جاراق قامباسى مەن اسكەري قۇرىلعىلاردى بايقادى. وتكەن 24 ساعاتتا يزرايل ارمياسىنىڭ سوعىس ايروپلاندارى گازا وڭىرىندەگى پالەستيننىڭ سوعىسقا قولباسشىلىق ورتالىعى، اسكەري بەكىنىسى، اسكەري قۇرىلعىلارى سياقتىلاردى قامتىعان 35 اسكەري نىساناسىنا اۋەدەن شابۋىل جاسادى. 

 

 گازا وڭىرىندەگى دەنساۋلىق ساقتاۋ تاراۋى مىنانى جاريالادى: 3-ايدىڭ 23-كۇنى يزرايل ارمياسى گازا ءوڭىرىنىڭ سولتۇستىك بولەگىنە ورنالاسقان گازا قالاسىنداعى قۇتقارۋ بۇيىمدارىن تاراتۋ ورنىندا زات الۋدى كۇتىپ تۇرعان بۇقاراعا وق جاۋدىرىپ، 9 ادامدى ءولتىرىپ، نەشە ونداعان ادامدى جارالادى. بۇدان سىرت، وتكەن 24 ساعاتتا يزرايل ارمياسى گازا وڭىرىندە 7 ءتۇرلى اسكەري ارەكەت ورىستەتىپ، جيىنى 72 ادامدى ءولتىرىپ، 114 ادامدى جارالادى. بىلتىر 10-ايدا پالەستين مەن يزرايلدىڭ جاڭا كەزەكتى قاقتىعىسى باستالعاننان بەرى، يزرايلدىڭ گازا وڭىرىندەگى اسكەري ارەكەتىندە 32 مىڭ 100 دەن استام ادام ءولىپ، 74 مىڭنان استام ادام جارالاندى. 

 

 ب م ۇ-نىڭ باس حاتشىسى گۋتتەرەس 3-ايدىڭ 23-كۇنى گازا ءوڭىرى مەن ەگيپەتتىڭ شەگارا رايونىنا ساپارلاي باردى. بۇل پالەستين مەن يزرايلدىڭ وسى كەزەكتى قاقتىعىسىنان بەرى، ونىڭ وسى رايونعا ەكىنشى رەت ساپارلاي بارۋى. گۋتتەرەس رافا وتكەلىنىڭ قاقپاسى الدىندا وتكىزىلگەن تىلشىلەردىڭ اقپارات جاريالاۋ جيىنىندا بىلاي دەدى: رافا وتكەلىنىڭ وسى جاعىندا قۇتقارۋ بۇيىمدارىن تاسيتىن جۇك اۆتوموبيلدەرى ۇزىننان-ۇزاققا ءتىزىلىپ وتكەلدەن ءوتۋدى كۇتۋدە، الايدا وتكەلدىڭ ار جاعىندا كوپتەگەن ادام اشارشىلىققا تاپ بولدى. بۇل تراگەديا عانا ەمەس، ادامگەرشىلىككە جات ارەكەت. ول گازا وڭىرىندە سوعىستى دەرەۋ توقتاتۋ كەرەكتىگىن تاعى ءبىر رەت باسا دارىپتەدى. 

 

اۋدارعان: امانتاي مۇسايىپ ۇلى