لي جانشۋ بىلاي دەپ انىق ايتتى: بيىل جۇڭگو كوممۋنيستىك پارتياسى قۇرىلعاندىعىنىڭ 100 جىلدىعى. جۇڭگو مەن ۆيەتنام كوممۋنيستىك پارتيا باسشىلىعىنداعى سوتسياليستىك ەلدەر ٴارى كوپتەگەن ورتاق مىندەتتەرگە ٴدوپ كەلىپ وتىر. ەكى جاق ساياسي جاقتا ٴوزارا قولداۋدى ۇزدىكسىز كۇشەيتۋ؛ جۇڭگو ـ ۆيەتنام قاتىناسى جانە ورتاق كوڭىل ٴبولىپ وتىرعان كەلەلى ماسەلەلەر جونىندە دەر كەزىندە ستراتەگيالىق سۇحپاتتى ساقتاۋ، «ٴبىر بەلدەۋ، ٴبىر جول» جانە «ەكى ٴدالىز، ٴبىر شەڭبەر» ستراتەگياسىن ۇشتاستىرۋدى جەبەۋ؛ جۇقپالى اۋرۋدان ساقتانۋ-تىزگىندەۋدى بىرلىكتە ويداعىداي يگەرۋ؛ ەكى ەل دوستىعىنىڭ حالىق رايى نەگىزىن بەكەمدەۋ؛ تەڭىز ىستەرىندەگى الاۋىزدىقتاردى ۇيلەسىمدى مەڭگەرۋ كەرەك. لي جانشۋ بۇلاردان تىس تاعى دا ٴوز مەملەكەت جاعدايىن شىعار ٴتۇيىن ەتۋ، كوممۋنيستىك پارتيا باسشىلىعىنا تاباندى بولۋ، سوتسياليزم جولىمەن جۇرۋگە تاباندى بولۋ، «ٴتۇستى توڭكەرىستەن» ساقتانۋ، سوتسياليستىك مەملەكەتتى دامىتۋدا زورەكەرلىك ارەكەتتەرگە ٴونىمدى توتەپ بەرۋ، ساياسي حاۋىپسىزدىكتى جانە اكىمياتتىڭ حاۋىپسىزدىگىن قورعاۋ قاتارلىلار جونىندە ۋاڭ تيڭحۇيمەن ىشكەرىلەي اۋىس ـ كۇيىس جاسادى، ول جۇڭگو مەن ۆيەتنامنىڭ ەكى پارتيا، ەكى ەلدەرى ورتاق تانىمدى كۇشەيتىپ، سەلبەستىكتى نىعايتىپ، ٴتۇرلى ماسەلەلەرگە قول ۇستاسا توتەپ بەرۋ كەرەك، دەپ باسا دارىپتەدى.

    لي جانشۋ بىلاي دەدى: جۇڭگونىڭ مەملەكەتتىك حالىق قۇرىلتايى ۆيەتنام پارلامەنتىمەن بىرلىكتە ەكى پارتيا، ەكى ەل باسشىلارىنىڭ ماڭىزدى ورتاق تانىمىن تياناقتاندىرىپ، ٴار جىكتەگىلەردىڭ بارىس-كەلىسىن كۇشەيتۋدى؛ سوتسياليستىك دەموكراتيالى زاڭمەن باسقارۋ قۇرىلىسىن كەمەلدەندىرۋدە ورتاق ىزدەنىس جاساۋدى؛ ەكى جاقتى قاتىناستىڭ دامۋىنا ٴتيىمدى زاڭدىق قۇجاتتاردى دەر كەزىندە بەكىتۋ، وزگەرىس ەنگىزۋدى؛ سۇحپات پەن سايكەسۋدى كۇشەيتۋدى، حالىقارالىق تەڭدىك پەن ادىلدىكتى جانە دامۋ جولىنداعى ەلدەردىڭ ورتاق مۇددەسىن قورعاۋدى قالايدى.

    ۋاڭ تيڭحۇي بىلاي دەدى: ۆيەتنام جۇڭگومەن قاتىناسىن دامىتۋعا ايرىقشا ٴمان بەرەدى. جۇڭگو كوممۋنيستىك پارتياسى قۇرىلعاندىعىنىڭ 100 جىلدىعىن قۇتتىقتايمىن. ۆيەتنام پارلامەنتى جۇڭگونىڭ مەملەكەتتىك حالىق قۇرىلتايىمەن اۋىس ـ كۇيىستى، سەلبەستىكتى كۇشەيتۋدى قالايدى.

اۋدارعان: قاناتبەك جۇماباي ۇلى