سۋ يگىلىگى مينيسترلىگى مەن جۇڭگو اۋا رايى مەكەمەسى قىزىل ٴتۇستى ساقتىق سيگنالىن جاريالادى، ازاتتىق ارميا كوماندير-جاۋىنگەرلەرى قاتەردەن اراشالاپ، اپاتتان قۇتقارۋعا بار كۇشپەن ات سالىستى
ٴوز حابارىمىز. سۋ يگىلىگى مينيسترلىگى مەن جۇڭگو اۋا رايى مەكەمەسى 7-ايدىڭ 21 - كۇنى ساعات 18 دە قىزىل ٴتۇستى تاسقىن اپاتى اۋا رايى ساقتىق سيگنالىن بىرلەسىپ جاريالادى: مەجەمەن 7-ايدىڭ 22 - كۇنى ساعات 20 عا دەيىن، حىبيدىڭ باتىس وڭتۇستىك بولەگى، شانشيدىڭ شىعىس وڭتۇستىك بولەگى، حىناننىڭ سولتۇستىك بولەگى قاتارلى جەرلەردىڭ ٴىشىنارا رايوندارىندا تاسقىن اپاتى تۋىلۋ مۇمكىندىگى زور، ٴىشىنارا جەرلەردە تاسقىن اپاتى تۋىلۋ مۇمكىندىگى وتە زور بولادى. باسقا رايونداردىڭ ٴىشىنارا جەرلەرىندە قىسقا ۋاقىتتىق كۇشتى جاۋىن - شاشىننان سەل اپاتى تۋىلۋى مۇمكىن. تاسقىننان ساقتانۋ جاعدايى قاتاڭداستى، ازاتتىق ارميا جانە قارۋلى ساقشى بولىمدەرى حابار الا سالا دەرەۋ ارەكەتتەنىپ حاۋىپ - قاتەرگە قارسى اتتانىپ، حالىق بۇقاراسىنىڭ ٴومىرى مەن مال - مۇلكىنىڭ اماندىعىن بار كۇشپەن قورعادى.
اپات تۋىلعاننان كەيىن، ورتا بولەك سوعىس رايونى شۇعىل جاعدايعا توتەپ بەرۋ جوباسىن جەدەل ىسكە قوسىپ، سوعىس رايونىنىڭ حىنان ولكەسىندە تۇراتىن اسكەري بولىمدەرىنە، قارۋلى ساقشى بولىمدەرىنىڭ كوماندير ـ جاۋىنگەرلەرىنە جانە حالىق جاساقتارىنا قولباسشىلىق ەتىپ، كوپتەگەن وڭىرلەردە قاتەردەن اراشالاپ، اپاتتان قۇتقارۋعا ورتاق كۇش سالا ات سالىستى. قارۋلى ساقشى حىنان باس اترەتىنىڭ موتورلى تارماق اترەتى 500 دەن استام كوماندير ـ جاۋىنگەردى اتتاندىرىپ، گۋكى قالاسى فىڭلى ەگىس الاڭىنداعى سۋ ورعان كەتىكتى بىتەۋ، توسپانى بەكەمدەۋ، بۇقارانى جوتكەۋ سياقتى قۇتقارۋ ـ كومەكتەسۋ قيمىلدارىن شۇعىل ورىستەتتى.
بىرلەسكەن ارتقى شەپ قامداۋ اسكەري ٴبولىمىنىڭ جىڭجوۋ بىرلەسكەن ارتقى شەپ قامداۋ ورتالىعىنداعى 170 نەشە كوماندير ـ جاۋىنگەر جىڭجوۋ قالاسىنىڭ گۋانچىڭ رايونى، گوجيازۇي سۋ قويماسى سياقتى قاتەرلى بولەكتەردە بۇزىلعان توسپانى جوندەپ، بۇقارانى شۇعىل بىتىراتتى ٴارى ەمدەۋ قوسىنىن جىبەرىپ ارالاپ تەكسەرۋ جۇرگىزدى. 988-نومەرلى دوحترحانا ەمدەۋ قامتاماسىزداندىرۋ جانە قاتەردەن اراشالاۋ، اپاتتان قۇتقارۋ سىندى ەكى شۇعىل جاعدايعا توتەپ بەرۋ بولىمشە اترەتىن قۇردى، سونىمەن بىرگە 4 قۇتقارۋ اۆتوموبيلى مەن ٴبىر تاسىمال اۆتوموبيلىن شىعارىپ، جارالانعان بۇقارانى تاسىدى.
7 ـ ايدىڭ 21 ـ كۇنى تۇستەن كەيىن حىنان ولكەسى جياۋزو قالاسى شيۋ-ۋ اۋدانى شاحى توسپاسىندا توسپا قاتەرلى جاعدايى تۋىلدى، قارۋلى ساقشى حىنان باس اترەتى جياۋزو تارماق اترەتى جوعارىنىڭ بۇيرىعىن تاپسىرىپ العاننان كەيىن دەرەۋ اتتانىسقا كەلىپ، ٴۇرتىس 6 ساعات شايقاس جاساعاننان كەيىن، وزەن توسپاسىنداعى تاسقىن قاتەرى باسەيدى، كوماندير ـ جاۋىنگەرلەر جاڭبىرعا قاراماي تاسقىننان ساقتانۋدىڭ ٴبىرىنشى شەبىندە اتوي سالىپ، جەرلىك بۇقارانىڭ القاۋىنا يە بولدى.
ورتا بولەك سوعىس رايونى اۋە ارمياسىنىڭ بەلگىلى بريگاداسى، راكەتا ارمياسىنىڭ بەلگىلى ٴبولىمى، قۇرلىق ارمياسىنىڭ زەڭبىرەكشى اسكەرلەر اۋە شابۋىلىنان قورعانۋ اسكەرلەر ينيستيتۇتى، ستراتەگيالىق كومەك اسكەري ٴبولىمىنىڭ ينفورماتسيا ينجەنەرياسى ۋنيۆەرسيتەتى سياقتى ورىنداردان كەلگەن 1000 نان استام كوماندير ـ جاۋىنگەر بۇيرىقتى ەستي سالا اتتانىسقا كەلىپ، شۇعىل جاعدايعا توتەپ بەرۋ، تاسقىنعا قارسى تۇرۋ جابدىقتارىن الىپ، قۇتقارۋ ـ كومەك بەرۋدىڭ ٴبىرىنشى شەبىندە شايقاس جاساپ، چاڭجۋاڭ سۋ قويماسىنان تاپجىلماي، تاسقىندى بوگەۋ، اپاتقان قارسى تۇرۋ جۇمىستارىن جۇرگىزدى.
اۋدارعان: قاناتبەك جۇماباي ۇلى
