ٴوز حابارىمىز. «بەيبىتشىلىك بورىشى-2021» اتىنداعى شاڭحاي سەلبەستىك ۇيىمىنىڭ لاڭكەستىككە قارسى بىرلەسپە اسكەري مانەۆرى تاياۋدا اياقتادى، ەلىمىزدەن مانەۆرگە قاتىناسقان اسكەري بولىمدەر 9-ايدىڭ 25-كۇنىنەن باستاپ ىركەس-تىركەس ەلگە ورالدى. مانەۆەر كەزىندە، ٴار ەلدىڭ مانەۆرگە قاتىناسقان اسكەري بولىمدەرى شىنايى ىنتىماقتاسىپ، تىعىز سەلبەسىپ، تىزە قوسا شايقاس جاساپ، بىرلەسىپ سوعىس جۇرگىزۋ قۋاتىن ارتتىرىپ، مەجەلى نىساناعا قول جەتكىزدى. جۇڭگو اسكەرلەرىنىڭ جاۋىنگەرلىك ستيلى، كاسىپتىك ساپاسى جانە تاماشا وبرازى ٴار جاقتاعىلاردىڭ جاقسى باعاسىنا يە بولدى. 

    رەسەيدىڭ ورتا بولەك اسكەري رايونىنىڭ قولباسشىسى، گەنەرال پولكوۆنيك الەكساندر. رابين ٴار ەلدىڭ مانەۆرگە قاتىناسقان اسكەري بولىمدەرىنىڭ قولباسشىلارىمەن بىرلىكتە وسى رەتكى بىرلەسپە مانەۆەردى وراي ەتىپ، شاڭحاي سەلبەستىك ۇيىمىنا مۇشە ەلدەردىڭ اسكەري سەلبەستىگىن ۇزدىكسىز ىشكەرىلەتىپ، لاڭكەستىككە بىرلەسىپ توتەپ بەرۋ قۋاتىن جوعارىلاتىپ، ٴوڭىردىڭ بەيبىتشىلىگىن قورعاۋداي كۇشتى تىلەگىن اڭعارتتى. مانەۆر بىرلەسپە قولباسشىلىق ٴبولىمى باس قولباسشىسىنىڭ ورىنباسارى، جۇڭگو جاقتىڭ قولباسشىسى، سولتۇستىك سوعىس رايونى باس اقىلشىسىنىڭ ورىنباسارى جاۋ كاڭپيڭ وسى رەتكى بىرلەسپە اسكەري مانەۆەردىڭ ەرەكشەلىگىن تىلگە تيەك ەتىپ بىلاي دەدى: وسى رەتكى بىرلەسپە مانەۆردە ٴار ەل ارميالارىنىڭ سوعىس جۇرگىزۋدەگى وزىق تانىمى توعىستىرىلدى، ٴبىر تۇتاس سوعىس جۇرگىزۋ جوباسى ٴتارتىبى بويىنشا، ٴبىر تۇلعالانعان سوعىس جۇرگىزۋ بەكىمى قالىپتاسىپ، ورتاق ناقتى اسكەري ارەكەتكە قولباسشىلىق ەتىلىپ، مۇشە ەلدەر ارميالارىنىڭ ٴبىر تۇلعالانۋى شىنايى ايگىلەندى.

 شاڭحاي سەلبەستىك ۇيىمىنا مۇشە ەلدەر جيىنى 4000 داي اسكەر شىعارىپ، سوعىس ايروپلانى، تانكى، ساۋىتتى كولىك جانە ٴتۇرلى تۇرپاتتى قامتاماسىزداندىرۋ كولىكتەرىنەن 760 تان استامىن ىسكە قوسىپ، 36 مىڭنان استام وق-ٴدارى سارىپ ەتىپ، 2 مىڭنان ەلىكتەمەلى لاڭكەستەردى جويدى. جۇڭگودان مانەۆرگە قاتىناسقان اسكەري بولىمدەر سولتۇستىك سوعىس رايونىن نەگىز ەتە وتىرىپ، جيىنى 550 نەشە ادامدى اتتانىسقا كەلتىرىپ، كولىك-جابدىقتاردان 130 ىن ىسكە قوستى.


اۋدارعان: امانتاي مۇسايىپ ۇلى