ءوز حابارىمىز. مەملەكەتتىك تەمىر جول توبى 4-ايدىڭ 15-كۇنى جاريالاعان ساندى مالىمەتتە كورسەتىلۋىنشە، بيىل 1-توقساندا تەمىر جول سالاسىندا قۇرىلىستار ساپالى، جوعارى ءونىمدى ىلگەرىلەپ، بۇكىل ەل بويىنشا تەمىر جول سالاسىندا تۇراقتى مۇلىككە 124 ميلليارد 800 ميلليون يۋان قارجى قوسىلىپ، بىلتىرعى سول تۇستاعىدان %9.9 ارتىپ، تۇتاس جىلدا تاماشا باستاما جاراتىلدى.

بيىل جىل باسىنان بەرى، مەملەكەتتىك تەمىر جول توبى قۇرىلىس بايلىعىن عىلمي ءبىر تۇتاس جوسپارلاپ، قۇرىلىس جۇرگىزۋدى ۇيلەسىمدى ساپالاندىرىپ، حاۋىپسىزدىك، ساپا، قارجى قوسۋ جانە قورشاعان ورتانى قورعاۋ سياقتى جاقتاردى مەڭگەرۋدى جاپپاي كۇشەيتىپ، تەمىر جولدىڭ ءتۇيىندى ينجەنەريا قۇرىلىسىن عىلمي، ءتارتىپتى ىلگەرىلەتتى. شاڭحاي-چۇڭچيڭ-چىڭدۋ جوعارى قارقىندى تەمىر جولىنىڭ حىفىيدان ۋحانعا دەيىنگى بولەگى، جاڭجوۋدان شانتوۋعا دەيىنگى جوعارى قارقىندى تەمىر جول، پيڭلياڭنان چيڭياڭعا دەيىنگى تەمىر جول، ۋىنشاننان مىڭزىعا دەيىنگى تەمىر جول سياقتى ءبىر توپ جاڭا لەنيالار جۇمىس باستادى. مەملەكەتتىك تەمىر جول توبى ۇگىت ءبولىمى اقپارات باسقارماسىنىڭ ورىنباسار باستىعى ۋ شينشيڭ بىلاي دەدى: چىجوۋدان حۋاڭشانعا دەيىنگى جوعارى قارقىندى تەمىر جول اينالىم سىناعى مەن ىسكە قوسىلۋ دايىندىق قىزمەتىن ءبىر ۋاقىتتا ورىستەتتى؛ شاڭحايدان سۋجوۋعا دەيىنگى تەمىر جول، لۇڭيان-لۇڭچۋان جوعارى قارقىندى تەمىر جولىنىڭ ميجوۋدان لۇڭچۋانعا دەيىنگى بولەگى، چۇڭچيڭ-كۇنميڭ جوعارى قارقىندى تەمىر جولىنىڭ چۇڭچيڭنەن يبينگە دەيىنگى بولەگىندە تۇتاس لەنيا بويىنشا رەليس جاتقىزىلا باستادى، حاڭجوۋدان چۇيجوۋعا دەيىنگى تەمىر جولدىڭ تۇتاس لەنيا بويىنشا تۋنەلى تۇتاستىرىلدى، گۋاڭجوۋدان جانجياڭعا دەيىنگى جوعارى قارقىندى تەمىر جولدىڭ جانجياڭۋان تەڭىز استى تۋنەلى تۇتاستىرىلدى، نيڭبودان جوۋشانعا دەيىنگى تەمىر جولدىڭ فۋ چى مىن تاسجول-تەمىرجول كوپىرىنىڭ قۇرىلىسى باستالدى.

 

تەمىر جول تاراۋلارى تەمىر جولعا قارجى قوسۋدىڭ جەتەكشىلىك رولىن تولىق ساۋلەلەندىرىپ، توراپتى، توراپتى تولىقتاۋدى، شىنجىرلى بايلانىستى كۇشەيتۋدى ءتۇيىن ەتىپ، تەمىر جول ينجەنەرياسى قۇرىلىسىن جوعارى ساپامەن ىلگەرىلەتىپ، وسىزاماندانعان تەمىر جول تورابىنىڭ كولەمى مەن ساپاسىن ونان ارى جوعارىلاتىپ، تۇتاستىق پەن قامتۋ كولەمىن كۇشەيتىپ، وڭىرلىك ەكونوميكالىق، قوعامدىق دامۋعا پارمەندى تىرەك ازىرلەدى.

 

ۋ شينشيڭ بىلاي دەدى: كەلەسى قادامدا شينجياڭنان شىعاتىن، شيزاڭعا باراتىن تەمىر جولدار، شەكارا بويىنداعى تەمىر جولدار سياقتى مەملەكەتتىك ستراتەگيالىق نىسانداردى اتقارۋ تەبىنى ارتتىرىلىپ، وزەن جاعالاۋىنداعى، تەڭىز جاعالاۋىنداعى جوعارى قارقىندى تەمىر جول، باتىس بولەكتەگى قۇرلىق تەڭىز جاڭا ارناسى سياقتى ءتۇيىندى نىساندار مەن زات اينالىمى نەگىزدىك قۇرىلعىلار قۇرىلىسى بەلسەنە ىلگەرىلەتىلىپ، وڭىرلىك ءوزارا بايلانىس بەلسەنە جەبەلىپ، تەمىر جول قۇرىلىسىنا قارجى قوسۋدىڭ جەبەۋ رولى تولىق ساۋلەلەندىرىلىپ، ەكونوميكانىڭ قايتا ورلەۋ جاعدايىن بەكەمدەۋگە جانە كۇشەيتۋگە بەلسەندى ۇلەس قوسۋعا كۇش سالىنادى.

 

اۋدارعان: شالقار قازەز ۇلى