ءوز حابارىمىز. اۋىل شارۋاشىلىعى، اۋىل - قىستاق مينيسترلىگىنىڭ اۋىل شارۋاشىلىق جاعدايىن تەكسەرۋگە قاراعاندا، 6-ايدىڭ 2-كۇنى، ساعات 17 گە دەيىن بۇكىل ەل بويىنشا 140 ميلليون مۋ دۇمبە ءبيداي ورىلىپ، ءونىم الۋ قارقىنى %40 تەن استى. اۋىل شارۋاشىلىق ماشينالارىنىڭ ءونىمدى جۇمىس جۇرگىزۋى ريمونتشىلاردىڭ قاجىرلى ەڭبەگىنەن ايرىلا المايدى. « ءبيداي ورۋ مەزگىلى » اتتى حابارىمىزدا بۇگىن «ءبيداي اتىزىنداعى شۇعىل قۇتقارۋ قىزمەتكەرلەرىمەن» تانىساسىزدار.

تۇستەن كەيىن ساعات 5 جارىمدا، كەشكى سامال جەلمەن تولقىعانءبيداي اتىزىندا كومبايىندار قاربالاس جۇمىس ىستەۋدە. بۇل ارا انحۇيدىڭ سۋجوۋ قالاسى، سولتۇستىك انحۇيدىڭ بايتاق دالاسىندا ءبيداي ورۋ ناۋقانى باستالدى.

اۋىل شارۋاشىلىق ماشينالارىن جوندەۋشى جاڭ لي ءۇستى باسى شاڭ-توپىراق بولىپ، ەكى ساعات ماشينا جوندەۋمەن اينالىستى. قۇرال - سايمان ساندىعىن جيناستىرىپ جاتقان وعان سەرىكتىك جاقتان تاعى دا تەلەفون كەلدى. سۋجوۋ قالاسى يۇڭچياۋ رايونى لاڭگان قالاشىعىندا ءبىر كومبايننىڭ تاسپاسىنان كىنارات شىعىپتى. ول ماشيناسىن وتالدىرىپ، 60 كيلومەتر شالعايداعى ءبيداي اتىزىنا قاراي جالعاستى جولعا شىقتى. جاڭ لي بىلاي دەدى: كۇندىز ءتۇنى تىنىم المايمىز. ۇيگە ءتۇن ورتاسىندا ارەڭ قايتامىز، تاڭ اتپاي تەلەفون كەلەدى، تاعى كەتەمىز.

40 كيلومەتر اسفالت جولمەن جۇرىپ، 10 كيلومەتر قۇم - شاعىل جولمەن جۇرىپ، 10 كيلومەتر توپىراق جولمەن جۇرىپ، مەجەلى جەرگە دە تاياپ قالدى، باعدار سىلتەۋ جۇيەسىنەن قاراعاندا، كىناراتقا جولىققان كومباينعا ءبىر كيلومەتر بار ەكەن، جاڭ لي قۇرال - سايمان ساندىعى مەن بولشەكتەرىن ارقالاپ، جاياۋ تارتتى.

اتىز جاعاسىنا بارعاندا، كومباين يەسى جاي چۇنگۋاڭ جۇگىرىپ الدىنان شىقتى. كومباينىنىڭ تاسپاسى ءۇزىلىپتى، جاڭ لي جاي چۇنگۋاڭعا: تاسپا ۇزىلسە وڭاي، جارىم ساعاتتا جوندەپ بەرۋگە كەپىلدىك ەتەمىن دەدى.

36 جاستاعى جاڭ ليدىڭ 15 جىلدىق اۋىل شارۋاشىلىق ماشينالارىن جوندەۋ تاجىريبەسى بار، ارەكەتى تەز، 20 مينۋتتىڭ ىشىندە كومبايندى جوندەپ بولدى. جاڭ لي سەرىكتىككە قايتىپ كەلگەندە ساعات 9 عا تايادى، قىزمەتتەستەرى وعان الىپ قويعان تاماق تا سۋىپ قالىپتى، ول وتىرار وتىرماستان تاعى دا تەلەفون كەلدى.

قۇرال - سايمان ساندىعىن الىپ، ماشيناسىمەن تاعى دا جولعا شىقتى. ناق مايدانعا بارعاننان كەيىن، ول قۇرال - سايماندارىن كوتەرىپ، تەكشەنىڭ استىنا كىرىپ، كىناراتتى تۇراقتاندىرعاننان كەيىن كومپرەسسور جابدىعىن اۋىستىردى، ول قارا تەرگە مالشىنىپ، ءۇستى باسى ماي ماي بولىپ، كومبايىننىڭ استىنان شىقتى.

ءبيداي اتىزىندا شىراقتار جايناپ، ماشينالار گۇرىلدەپ جۇمىس ىستەۋدە. كومبايندار مەن ماشينالاردىڭ كىناراتتارىن جوندەۋمەن اينالىساتىن جاڭ لي جونىنەن العاندا، 43 ميلليون مۋ اتىزدىڭ شارۋاسى قانشا جاپالى بولسا دا، ءوزىن سونداي باقىتتى سەزىنەدى. 

 

اۋدارعان: شالقار قازەز ۇلى