ءوز حابارىمىز. ج ك پ ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ 12-ايدىڭ 3-كۇنى بەيجيڭدە دياۋيۇيتاي مەملەكەتتىك قوناق سارايىندا كامبودجا حالىق پارتياسىنىڭ ءتوراعاسى، كەڭەس پالاتاسىنىڭ ءتوراعاسى حۇڭسىنمەن كەڭەس وتكىزدى.

شي جينپيڭ بىلاي دەدى: جۇڭگو مەن كامبودجانىڭ اينىماس دوستىعى تەرەڭ، ەكى ەل حالقىنىڭ ورتاق مۇددەسىنە بۇكىلدەي ۇيلەسەدى. جۇڭگو كامبودجانى باستان-اياق توڭىرەكتىك ديپلوماتيانىڭ ءتۇيىندى باعىتى ەتىپ، كامبودجامەن قول ۇستاسا وتىرىپ جوعارى ساپالى، جوعارى دەڭگەيلى، جوعارى ولشەمدى جاڭا داۋىردەگى جۇڭگو-كامبودجا تاعدىرلاس ورتاق تۇلعاسىن قۇرۋدى قالايدى. ەكى جاق بىرىنشىدەن، ءوزارا باتىل قولداۋ كورسەتىپ، بولاتتاي بەرىك دوستىقتى بەكەمدەۋى كەرەك. جۇڭگو كامبودجانىڭ مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن باتىل قولدايدى. ەكىنشىدەن، اۋىس-كۇيىستى، ءوزارا ۇلگى الۋدى تەرەڭدەتىپ، دامۋدى-گۇلدەنۋدى ورتاق قاراستىرۋى كەرەك. جۇڭگو كوممۋنيستىك پارتياسى كامبودجا حالىق پارتياسىمەن ستراتەگيالىق بايلانىستى جانە كادرلاردى تاربيەلەۋ سەلبەستىگىن كۇشەيتىپ، كامبودجانىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىن قاراستىرۋىنا دەم بەرۋدى قالايدى. ۇشىنشىدەن، سەلبەستىك ورايىن يگەرىپ، ورتاق يگىلىكتەنۋدىڭ جاڭا جاعدايىن جاراتۋ كەرەك. جۇڭگو كامبودجامەن بىرلىكتە جاڭا ۇلگىدەگى تاعدىرلاس ورتاق تۇلعا ارەكەت جوسپارىن تياناقتاندىرۋدى نەگىزگى جەلى ەتىپ، «التى قىرلى گاۋھار تاس سەلبەستىگى» جۇلگەسىن ۇزدىكسىز تولىقتاپ، «ونەركاسىپتى دامىتۋ ءدالىزى» مەن «بالىق جانە كۇرىش ءدالىزى» سەلبەستىك جوباسىن جاساپ، ءتۇيىندى سەلبەستىك نىساندارىنىڭ تياناقتانىپ، ءونىم بەرۋىن ىلگەرىلەتىپ، «ءبىر بەلدەۋ، ءبىر جولدى» ورتاق قۇرۋ دارىپتەمەسى مەن كامبودجانىڭ «بەس بۇرىشتى ستراتەگياسىنىڭ» جوعارى ساپالى ۇشتاسۋىنا دەم بەرۋدى قالايدى.

شي جينپيڭ مىنالاردى انىق ايتتى: قازىر حالىقارالىق جاعداي قىم-قۋىت بولىپ، الەمدىك سىن-سايىستار تولاسسىز تۋىلىپ، ءار ەلدىڭ توتەپ بەرۋى مەن تالعامىنا سىن سايىس جاريالاۋدا. جۇڭگو مەن كامبودجا دۇنيە ءجۇزىنىڭ بەيبىتشىلىك كۇشى، دامۋ كۇشى، العا باسۋ كۇشى بولۋعا كۇش سالادى. جۇڭگو كامبودجانىڭ حالىقارالىق جانە وڭىرلىك ىستەردە اناعۇرلىم زور رول اتقارۋىن ۇزدىكسىز قولدايدى، «جەر شارى وڭتۇستىگى» كۇشتەرىن زورايتۋدى قولدايدى، شىعىس وڭتۇستىك ازيا ەلدەرى وداعىنىڭ ستراتەگيالىق دەربەستىككە تاباندى بولىپ، وزەكتى ورنىن قورعاۋىن قولدايدى، سىرتقى كۇشتەردىڭ قىرعي قاباقتىق وي جەلىسىن وسى رايونعا ەنگىزۋىنە باتىل قارسى تۇرادى، شىعىس وڭتۇستىك ازيا ەلدەرى وداعىنىڭ ءبىر تۇلعالانۋى مەن ورتاق تۇلعا قۇرىلىسىن تاباندىلىقپەن ىلگەرىلەتەدى. جۇڭگو كامبودجامەن بىرلىكتە جول وزگەرمەۋ، مۇرات وزگەرمەۋ بەكىمىن بەكەمدەپ، تومەنگى شەك ويلامدى كۇشەيتىپ، سەلبەستىك پەن سايكەسۋدى نىعايتىپ، ءتۇرلى حاۋىپ-قاتەرلەرگە ورتاق توتەپ بەرۋدى قالايدى.

حۇڭسىن بىلاي دەدى: كامبودجا مەن جۇڭگونىڭ دوستىعىن ەكى جاقتىڭ اعا بۋىن باسشىلارى بىرلىكتە تۇراقتاندىرىپ، تاريح پەن ۋاقىتتىڭ سىنىنان ءوتتى، كامبودجا مەن جۇڭگونىڭ تاعدىرلاس ورتاق تۇلعاسى ەكى جاقتىڭ ورتاق مۇددەسىنە ۇيلەسەدى. كامبودجا جۇڭگونىڭ ۇزاق ۋاقىتتان بەرى كامبودجانىڭ ساياسي، ەكونوميكالىق، قوعامدىق دامۋىنا كورسەتكەن قىمباتتى قولداۋى مەن كومەگىنە العىس ايتادى، جۇڭگو كامبودجانىڭ ەڭ سەنىمدى دوسى. جۇڭگومەن دوس بولۋ—كامبودجا حالىق پارتياسىنىڭ بەرىك ساياسي ورتاق تانىمى، كامبودجا باسشىلىق جىگىنىڭ جاڭالانۋىنا بولا ەشقانداي وزگەرىس تۋىلمايدى. كامبودجا ءبىر جۇڭگو پرينسيبىن ۇزدىكسىز باتىل اتقارادى، جۇڭگونىڭ وزەكتى مۇددەسىن قورعاۋىن قولدايدى، جۇڭگومەن پارتيالار ارا بارىس-كەلىستى جالپى بەتتىك كۇشەيتىپ، ساياسي ءوزارا سەنىمدىلىكتى تەرەڭدەتىپ، ءار سالاداعى ناقتى سەلبەستىكتى جەبەپ، جاستار ىستەرى، گۋمانيتارلىق اۋىس-كۇيىس سياقتىلاردى جيىلەتىپ، ەكى ەل حالقىنا ءتىپتى دە زور باقىت جاراتۋدى قالايدى. كامبودجا جۇڭگومەن حالىقارالىق، وڭىرلىك ىستەردە سايكەسۋ-سەلبەسۋدى كۇشەيتۋدى قالايدى.

ساي چي، ۋاڭ ي كەڭەسكە قاتىناستى.