ينفورماتسيا اشكەرەلەۋ: mzjubao@cnr.cn

سۋرەتتەر سويلەيدى

كورىكتى مەكەن كولدەنەڭ

来源:جۇڭگو قازاق راديو تورابى     |责编:阿依娜古丽|     发布日期: 2021-02-24 09:58

 

 سۋرەتتى ساپار ەستەلىگى


    ءسانيا ءنۇسىپحان قىزى 

    ٴتاڭىر تاۋى سىلەمىندەگى دۇنيە جاراتىلىستىق مۇراعات ٴوڭىرى تىزىمدىگىنە كىرگەن كولدەنەڭ كورىنىس ٴوڭىرى توعىزتاراۋ اۋدانىنداعى نەگىزگى ساياحات تۇيىندەرىنىڭ ءبىرى. اۋدان قالاشىعىنىڭ شىعىس وڭتۇستىگىندە 90 كيلومەتر جەردە كوك تىرەگەن قارلى شىڭى دۇيىم ىلە اڭعارىنىڭ كوز جەتپەي قالعان جەرىنە دەيىن كورنىپ تۇراتىن ايگىلى قابانباي شوقىسىنىڭ باۋرايى بولىپ كەلەتىن وسى جازيرالى جاسىل القاپ، جاز كۇندەرى ەمەس ءبىر جىلدىڭ ءتورت ماۋسىمىندا دا ٴوزىنىڭ مىڭ بوياۋلى، ءساندى تابيعات كورىنىسىمەن كوز تارتىپ، قويناۋىنا اياق باسقان ادامدى ەرەكشە باۋراپ الادى.


    سيىر جىلعى كوكتەم مەرەكەسىنىڭ سوڭىنا الا مەن اۋدانىمىزدىڭ شىعىس شەتىندەگى مۇقىر اۋىلىنا بارىپ، قايتاردا كولدەنەڭ كورىنىس ٴوڭىرىن كورىپ كەتۋ ءۇشىن ارنايى تاۋعا تارتتىم. وسى كەز اۋارايى جىلىنىپ، جازىق جەرلەردە اق قاردىڭ ەتەگى سوگىلىپ، وي ولكەگە قاراعان تاۋ ەتەكتەرى قارالا تارتقان شاق بولسا دا، مۇقىر مەن ساعادان جوعارعى تاۋ جاق قالىڭ قار قىمتانىپ، جىم-جىرت قىس قۇشاعىنداعى ۇيقىدا جاتقانداي سەزىم بەردى. جول بويى وزەن اڭعارىن كومكەرگەن قالىڭ ورمان، قارلى دالا بۇلتتى كۇننىڭ بولىمسىز ساۋلەسىندە ماعان بەينە شەبەر سۋرەتشىنىڭ قولىنان شىققان كەلىستى سۋ بوياۋلى تابيعات كارتيناسى ىسپەتتى كورىنىپ، ۇلى جاراتىلىستىڭ حيكىمەتتى كورىنىسى بار سانامدى باۋراپ، ەرەكشە قىزىقتىردى. سونىمەن فوتو اپپاراتىمدى كولدەنەڭ اڭعارىنىڭ قىس سوڭىنداعى اق قار قىمتاعان الۋان ءتۇرلى كورىنىستەرىنە تۋرالاپ، وزەن بويىنداعى تال-تەرەكتەردى، الىس تاۋلارداعى اقشا قارعا جاسىل رەڭ باعىشتاپ تۇرعان قايسار قاراعايلى نۋ ورمانداردى، جاعاسى مۇز قۇرسانىپ، كوگىلدىرلەنە اعىپ جاتقان وزەندەردى، اق كورپەسى سوگىلە باستاعان ەتەكتەگى جوتا-جونداردى، جاعاداعى بوي تۇزەگەن اق تەرەكتەردى سۋرەتكە الىپ، اشىق كۇندەگىدەن دە وزگەشە ادەمى سەزىلگەن ءبىرتالاي فوتو تۋىندىلار ٴءتۇسىردىم.


    وسى كۇنى ءتۇسىرىپ قايتقان «كورىكتى مەكەن كولدەنەڭنىڭ قىس سوڭىنداعى كورىنىستەرىنەن» تۇسىرىلگەن كوزايىم كورىنىستەردى رەتتەي وتىرىپ، زەر سالسام، سول كۇنگى اۋرايىنداعى كۇن نۇرىنىڭ شاماسىنا قاراي كورىنگەن رەڭ، تەك اق پەن قارا بوياۋدىڭ تىم تابيعي جاراسىم تابۋىنان قالىپتاسىپ، بەينە مەنىڭ جانىم سۇيگەن كاسىبىم اسەم ونەردەگى سۋ بوياۋلى سۋرەتتەر مەن ءداستۇرلى جۇڭگوشا سۋرەتتىڭ ستيلىنە تىم جاقىن بولىپ تۇرعانداي كورىندى.

وقىعان ماماندىعىم دا، قىزمەتكە قاتىناسقالى ىستەپ كەلە جاتقان جۇمىسىمدا اسەمونەر كاسىبى بولعاندىقتان، اسەمونەردىڭ ءبىر تارماعى فوتو سۋرەت ونەرىنە قىزىعىپ، اۋەستەنگەلى فوتوگراپياعا دا تەز ۇيلەسىپ، وسى ونەرگە دەگەن ىستىق ماحابباتىم مەنى ءتىپتى دە قۇلشىنىسقا جەتەلەدى. سونىمەن تالابىمنىڭ تايىنا قامشى باسىپ، فوتو ونەرى جولىندا ىزدەنۋگە كىرىسىپ، شامام كەلگەنشە تىرىسىپ كەلەم. فوتگراپ كاسىپتەستەرىمنىڭ قولداپ قۋاتتاۋىمەن تىرناق الدى تۋىندىلارىم ءتۇرلى مەديالاردا جاريالانىپ، فوتو جارىستاردا جۇلدەلى دە بولدى. فوتو ونەرىندەگى ۇستازدارىممەن قولداۋشى كاسىپتەستەرىمە شىنايى العىسمدى بىلدىرە وتىرىپ، وسى رەت كولدەنەڭنەن تۇسىرگەن ءبىر توپ تۋىندىمدى وقىرماندارعا «فوتو ساۋعا» رەتىندە ۇسنىپ وتىرمىن. (سۋرەتتەرىن تۇسىرگەن ءسانيا ءنۇسىپحان قىزى)

اۆتوردىڭ ءادىرىسى: توعىزتاراۋ اۋداندىق مادەنيەت سارايى

 

中央广播电视总台 央广网 版权所有

كورىكتى مەكەن كولدەنەڭ

ٴتاڭىر تاۋى سىلەمىندەگى دۇنيە جاراتىلىستىق مۇراعات ٴوڭىرى تىزىمدىگىنە كىرگەن كولدەنەڭ كورىنىس ٴوڭىرى توعىزتاراۋ اۋدانىنداعى نەگىزگى ساياحات تۇيىندەرىنىڭ ءبىرى.