«جۇڭگو ەكونوميكاسىنىڭ قۋاتى مىعىم» باجىنى جەڭىلدەتىپ، اقىنى ازايتۋ تەبىندى جۇرگىزىلۋدە
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2019-08-12 10:17:00

 

    ٴوز حابارىمىز: باجىنى كەمەيتۋ، اقىنى تومەندەتۋ كاسىپورىنداردىڭ اۋىرتپالىعىن جەڭىلدەتۋدە، بازار سۋبيەكتىلەرىنىڭ ومىرشەڭدىگىن جانداندىرۋدا، ەكونوميكانىڭ ارتۋىن جەبەۋدە ماڭىزدى رول اتقارادى. باس شۋجي شي جينپيڭ كەڭ كولەمدە باجىنى جەڭىلدەتىپ، اقىنى ازايتۋ جونىندە كوپ رەت بەكىتۋ-نۇسقاۋ بەرىپ، تالاپ قويىپ، «باجىنى جەڭىلدەتىپ، اقىنى ازايتۋ جونىندەگى ساياساتتىق شارالاردى تۇبەگەيلى تياناقتاندىرىپ، كاسىپورىنداردىڭ اۋىرتپالىعىن جەڭىلدەتۋ كەرەكتىگىن» باسا دارىپتەدى. بيىل الدىنعى جارىم جىلدا، ەلىمىز بويىنشا كەمەيتىلگەن باجى مەن ازايتىلعان اقى جيىنى 1 تريلليون 170 ميلليارد 900 ميلليون يۋانعا جەتتى. ارتقان قۇن باجىسى رەفورماسىن تەرەڭدەتۋ، شاعىن-ۇساق كاسىپورىندارعا قاراتا باجىنى جاپپاي جەڭىلدەتۋ ساياساتىن اتقارۋ، جەكەلەردىڭ باجى رەفورماسى سياقتى ٴبىرقىدىرۋ ساياساتتاردىڭ ونىمدىلىگى اناعۇرلىم كورنەكتىلەنىپ، رەفورما پايداسى ەكونوميكالىق قۇرىلىمدى ساپالىلاندىرۋدىڭ، ٴونىمدى سۇرانىستى كەڭەيتۋدىڭ قوزعاۋشى كۇشىنە اينالىپ، ەلىمىز ەكونوميكاسىنىڭ جوعارى ساپالى دامۋىنا پارمەندى دەم بەرۋدە.


    باس شۋجي شي جينپيڭ بىلتىر 11-ايدان بەرى ىلگەرىندى-كەيىندى كوپ رەت ماڭىزدى ٴسوز سويلەپ، باجىنى جەڭىلدەتۋ، اقىنى ازايتۋ تەبىنىن ارتتىرۋدى تالاي رەت باسا دارىپتەدى. بيىل الدىنعى جارىم جىلدا، ٴتىپتى دە كەڭ كولەمدە باجىنى جەڭىلدەتۋ، اقىنى ازايتۋ جونىندەگى ساياسات-شارالار اتقارىلعان جاعدايدا، ەلىمىزدىڭ باجىنى جەڭىلدەتۋ، اقىنى ازايتۋ ونىمدىلىگى ۇزدىكسىز كورنەكتىلەندى. مەملەكەتتىك باجى باس مەكەمەسى كىرىس پلانى، ەسەپ ـ حيساپ مەڭگەرمەسىنىڭ باستىعى ساي زىلي بىلاي دەدى: ەلىمىزدە ۇستەگى جارىم جىلدا جەڭىلدەتىلگەن باجى مەن ازايتىلعان اقى جيىنى 1 تريلليون 170 ميلليارد 900 ميلليون يۋان بولدى.


    باجىنى جەڭىلدەتىپ، اقىنى ازايتۋ ساياساتى ەكونوميكاعا قالاي قوزعاۋشى كۇش قوسادى؟-دەگەن سوۋالعا مەملەكەتتىك ساياسي كەڭەستىڭ تۇراقتى مۇشەسى، جۇڭگو باجى ىستەرى قوعامىنىڭ ورىنباسار باستىعى جاڭ ليانچي بىلاي دەدى: باجىنى جەڭىلدەتىپ، اقىنى ازايتۋ دەگەنىمىز ۇكىمەت كىرىسىن ازايتۋ امالىنان پايدالانىپ، كاسىپورىنداردىڭ ونىمدىلىگىن ارتتىرۋ، بازاردىڭ ومىرشەڭدىك قۋاتىن كۇشەيتۋ بولىپ تابىلادى.


    باس شۋجي شي جينپيڭ بىلاي دەپ باسا دارىپتەدى : باجىنى جەڭىلدەتىپ، اقىنى ازايتۋ ساياسات-شارالارىن تەز ارادا ناقتىلى تياناقتاندىرىپ، كاسىپورىنداردىڭ اۋىرتپالىعىن جەڭىلدەتىپ، شاعىن-ۇساق كاسىپورىنداردىڭ ومىرشەڭدىك كۇشىن ارتتىرۋ كەرەك. بيىلعى زور مولشەردە باجىنى جەڭىلدەتىپ، اقىنى ازايتۋ شاراسىنىڭ ماڭىزدى ٴتۇيىنى رەتىندە، ارتقان قۇن باجىسى رەفورماسىن تەرەڭدەتۋدەن 4-ايدان 6-ايعا دەيىن جيىنى 318 ميلليارد 500 ميلليون يۋان باجى جەڭىلدەتىلدى، مۇنىڭ ىشىندە بۇرىن %16 تىك باجى مولشەرىن قولدانعان كاسىپ سالالارى، مىسالى، جاساۋ كاسىبى، تولايىم ساتۋ، بولشەك ساتۋ كاسىبى قاتارلىلار ەڭ زور يگىلىككە كەنەلدى. اۋىرتپالىقتى بارىنشا جەڭىلدەتۋدەن جۇڭگونىڭ جاساۋ كاسىبى ۇدىرە العا تارتىپ، سەنىمى بەكەمدەلە ٴتۇستى. ساندى مالىمەتتە كورسەتىلۋىنشە، ٴتۇيىندى باجى قاينارىندىق كاسىپورىنداردىڭ الدىنعى جارىم جىلدا زەرتتەۋ-اشۋعا قوسقان قارجىسى وتكەن جىلدىڭ ۇقساس مەزگىلىندەگىدەن %20.6 ارتقان.


    اۋىرتپالىق جەڭىلدەسە ومىرشەڭدىك كۇش تاسقىندايدى، بۇل تاعى ٴبىر جاعىنان جەكەلەردىڭ باجى رەفورماسى تيىمدىلىگىنىڭ تۇرعىنداردىڭ كىرىسىن تىكەلەي ارتتىرعاندىعىنان، تۇرعىنداردىڭ تۇتىنۋ قۋاتىن جوعارىلاتقاندىعىنان دا ايگىلەنەدى. ساندى مالىمەتتە كورسەتىلۋىنشە، الدىنعى جارىم جىلدا، 307 ميلليارد 700 ميلليون يۋاندىق جەكەلەردىڭ تابىس باجىسى جەڭىلدەتىلىپ، ورتا ەسەپپەن جان باسىنىڭ 1340.5 يۋان باجىسى جەڭىلدەتىلىپ، جيىنى 115 ميلليون ادام ەڭبەكاقى تابىسىنان ەندىگارى جەكەلەر تابىس باجىسىن تاپسىرمايتىن بولدى. جاڭ ليانچي بىلاي دەدى: بيىلعى باجىنى جەڭىلدەتىپ، اقىنى ازايتۋ ساياساتى ٴبىر تۇتاس ساياسات.


    بەتالدى اقى الۋدىڭ ٴتۇسىن قۇبىلتىپ قايتا بەلەڭ بەرۋىنەن قالاي ساقتانۋعا بولادى، بۇل بيىلعى 2 تريلليون يۋانعا تاياۋ باجىنى جەڭىلدەتىپ، اقىنى ازايتۋ ساياساتىنىڭ تياناقتانۋ ونىمدىلىگىنە سايادى، باس شۋجي شي جينپيڭ بىلتىر جىل سوڭىندا اشىلعان حالىق باسقارۋىنداعى شارۋاشىلىق جايلى اڭگىمە ماجىلىستە باسا دارىپتەپ بىلاي دەدى: حالىقتىق قارجى قوسۋعا، باسقارۋعا ساياتىن اكىمشىلىك قاراپ، بەكىتۋ ىستەرى مەن كاسىپورىندارعا ساياتىن اقى الۋدى جالعاستى كۇشىنەن قالدىرىپ جانە ىقشامداپ، ارالىق بۋىنداردى، دەلداردىڭ ۇيىمداستىرۋ قيمىلدارىن جۇيەگە ٴتۇسىرىپ، كاسىپورىنداردىڭ اۋىرتپالىعىن جەڭىلدەتىپ، كاسىپورىندارعا ساياتىن اكىمشىلىك اقى الۋ تۇرلەرىن كۇشىنەن قالدىرىپ، كاسىپورىنداردىڭ نارقىن تومەندەتۋ كەرەك.


    تاياۋدا، كوپتەگەن تاراۋ كاسىپورىندارعا ساياتىن ەرەجەگە قايشى اقى الۋ تۇرلەرىن جونگە سالۋدىڭ جاڭا شارالارىن جالعاستى ورنالاستىردى. جاڭ ليانچي بىلاي دەپ قارادى : باجىنى جەڭىلدەتىپ، اقىنى ازايتۋدا قاتىستى شارالار ويداعىداي قامتاماسىزداندىرىلسا، كۇردەلى دە اۋىر سىن ـ سايىستارعا ٴدوپ كەلگەن جاعدايدا، ٴبىز ايتارلىقتاي توتەپ بەرەتىن بولامىز.

اۋدارعان: امانتاي مۇسايىپ ۇلى