«ليچيما» اتتى تايفىڭ داۋىلى شاندۇڭ ولكەسىندە 2-رەت قۇرلىققا شىقتى، 6 ولكە، قالادان 6 ميلليون 510 مىڭ ادام اپاتقا ۇشىرادى
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2019-08-12 10:49:00

 

    ٴوز حابارىمىز: 8-ايدىڭ 11-كۇنى ساعات 17 گە دەيىن «ليچيما» اتتى تايفىڭ داۋىلى جىجياڭ، شاڭحاي، جياڭسۋ، انحۇي، شاندۇڭ، فۋجيان قاتارلى 6 ولكە،قالادا قۇرلىققا شىعىپ، 6 ميلليون 510 مىڭ ادام اپاتقا ۇشىراپ، ٴبىر ميلليون 456 مىڭ ادام شۇعىل ورنالاستىرىلدى. جىجياڭ، شاڭحاي، جياڭسۋ قاتارلى جەرلەردەگى ٴورت ٴسوندىرۋ، ورتتەن ساقتانۋ كوماندير-جاۋىنگەرلەرىنەن 30 مىڭنان استام ادام حاۋىپ ـ قاتەرگە ۇشىراعان جانە قامالىپ قالعان 6257 ادامدى قۇتقاردى . شۇعىل جاعدايعا توتەپ بەرۋ-باسقارۋ مينيسترلىگى مەملەكەتتىك استىق جانە زاتتىق ماتەريال ساقتاۋ مەكەمەسىمەن بىرگە جىجياڭ ولكەسىنىڭ اپاتقا ۇشىراعان رايوندارىنا 10 مىڭ بۇكتەمە توسەك قاتارلى اپاتتان قۇتقارۋ زاتتارىن شۇعىل جوتكەدى.


    جىجياڭ ولكەلىك تاسقىننان ساقتانۋ، قۋاڭشلىققا قارسى تۇرۋ قولباسشىلىق شتابىنىڭ ساناعىنا قاراعاندا، 8-ايدىڭ 11-كۇنى ساعات 13 تەن 30 مينۋتكە دەيىن، «ليچيما» تايفىڭ داۋىلىنان جىجياڭدا 32 ادام قازا بولىپ، 16 ادام حابار-وشارسىز كەتكەن. اۋىر اپاتقا ۇشىراعان جىجياڭ، جياڭسۋ، انحۇي قاتارلى جەرلەر اپاتتان قۇتقارۋ جانە اپاتتان كەيىنگى ٴوندىرىس ارقىلى ٴوزىن قۇتقارۋ جۇمىستارىن بەلسەنە ۇيىمداستىردى.


    تايفىڭ داۋىلى «ليچيما» جىجياڭ، جياڭسۋ، انحۇي قاتارلى جەرلەردەن وتكەننەن كەيىن، 8-ايدىڭ 11-كۇنى كەشكى ساعات 8 دەن 50 مينۋت وتكەندە شاندۇڭ ولكەسى چيڭداۋ قالاسى حۋاڭداۋ رايونىنىڭ تەڭىز جاعالاۋىنان تاعى قۇرلىققا شىقتى. قۇرلىققا شىققان كەزدەگى ەڭ كۇشتى جەل 9 بالعا جەتتى. «ليچيمانىڭ» قۇرلىققا شىعۋى چيڭداۋدى ەرەكشە زور ىقپال جاساعان جوق، ٴبىراق 8-ايدىڭ 10-كۇنى كەشتەن باستاپ شاندۇڭ ولكەسىنىڭ كوپ جەرىندە نوسەر جاۋىپ، ٴىشىنارا رايونداردا اپات تۋىلدى.


    ساناققا قاراعاندا، كۇشتى نوسەردەن شاندۇڭ ولكەسىندە اپاتقا ۇشىراعان اۋىل شارۋاشىلىق داقىلدار جەر كولەمى 46 مىڭ گەكتار بولىپ، 106 اۋىز ٴۇي قۇلاپ، تىكە ەكونوميكالىق زيان 547 ميلليون يۋان بولعان، مۇنىڭ ىشىندە اۋىل شارۋاشىلىق ەكونوميكا زيانى 404 ميلليون يۋانعا جەتكەن. «ليچما» تايفىڭ داۋىلى سوعىپ نوسەر قۇيعان اپات جاعدايعا قاراتا شاندۇڭ ولكەسىنىڭ جەر-جەرى، ٴارقايسى تاراۋلارى بەلسەنە توتەپ بەرۋگە بىلەك سىبانا كىرىستى. 8-ايدىڭ 11-كۇنى ساعات 15 تەن 30 مينۋت وتكەندە ۋيفاڭ، لين-ي، رىجاۋ قاتارلى 12 قالا بۇقارانى شۇعىل جوتكەپ ورنالاستىردى.


    سولتۇستىككە ويىسۋعا بايلانىستى «ليچيما» داۋىلى بىرتىندەپ السىرە يدى، ٴبىراق ۇزاق ۋاقىتقا جالعاسقان جاۋىن-شاشىننىڭ ىقپالى ٴالى دە   زور بولادى. مەجەگە قاراعاندا، الداعى ٴۇش كۇندە سولتۇستىك جۇڭگو مەن شىعىس سولتۇستىك جۇڭگودا كەڭ كولەمدە جاۋىن جاۋادى.

اۋدارعان: كۇلان ىرىسباي قىزى