«ليچيما» اتىنداعى تايفىڭ داۋىلىنىڭ كۇشى السىرەگەنىمەن بوحاي تەڭىز الابى مەن ەلىمىزدىڭ شىعىس سولتۇستىگىنە جالعاستى ىقپال ەتۋدە
كەلۋقاينارى:جۇڭگو قازاق راديو تورابى |جاۋاپتى رەداكتور: | جاڭالانعان ۋاقىت:2019-08-14 10:35:00

 

    ٴوز حابارىمىز: «ليچيما» اتىنداعى تايفىڭ داۋىلى 8-ايدىڭ 13-كۇنى بوحاي تەڭىزىنىڭ شىعىس الابىنداعى تەڭىز ايدىنىندا السىرەپ ىستىق بەلدەۋ تومەن قىسىمىنا اينالدى. قازىر جەل كۇشى ونان ارى السىرەي ٴتۇستى. «ليچيمانىڭ» ىقپالىنا ٴبىرشاما اۋىر ۇشىراعان جىجياڭ، شاندۇڭ، انحۇي سياقتى جەرلەر اپاتتان قۇتقارۋ جانە اپاتتان كەيىنگى قايتا قۇرۋ جۇمىستارىن كۇش سالا ورىستەتىپ، جەرگىلىكتى ورىنداردىڭ ٴوندىرىس، تۇرمىس ٴتارتىبىن بار كۇشپەن قالپىنا كەلتىرۋدە.


    شاندۇڭ ولكەلىك شۇعىل جاعدايعا توتەپ بەرۋدى باسقارۋ مەڭگەرمەسى جاريالاعان ينفورماتسيادا كورسەتىلۋىنشە، ٴۇرتىس بىرنەشە كۇن بويى جاۋعان جاڭبىردان شاندۇڭ ولكەسىندەگى 16 قالا تۇگەل اپاتقا ۇشىراپ، اپاتقا ۇشىراعان ادام سانى 3 ميلليون 731 مىڭ 900 گە جەتتى. ىسكە قوسىلعان ولكەلىك 2 - دارەجەلى اپاتتان شۇعىل قۇتقارۋ ۇندەۋىنە ساي، شاندۇڭ ولكەسى اپاتقا ۇشىراعان جەرلەرگە شاتىر، كورپە، ورامال كورپە، بۇكتەمەلى توسەك سياقتى اپاتتان قۇتقارۋ بۇيىمدارىن شۇعىل جەتكىزۋدە.


    جىجياڭ ولكەسىندەگى اپاتقا اۋىر دارەجەدە ۇشىراعان ۋىنجوۋ قالاسى يۇڭجيا اۋدانى يانتان قالاشىعى شان زاۋ قىستاعىندا ەلەكتردەن پايدالانۋ، سۋمەن قامداۋ نەگىزىنەن قالپىنا كەلتىرىلدى، 223-ٴنومىرلى ولكە تاس جولىنا تۇتاساتىن قىستاق تاس جولى دا قاربالاس جوندەلىپ كولىك قاتىناي باستادى. وسىمەن ٴبىر ۋاقىتتا، كۇرىش، ازىقتىق ماي سياقتى اپاتتان قۇتقارۋ بۇيىمدارى دا جەتكىزىلدى.


    الداعى ٴۇش كۇندە، ليچيما ەلىمىزدىڭ شىعىس سولتۇستىگىندەگى ٴىشىنارا رايوندارعا جاڭبىر جاۋعىزادى، كەزەكتە لياۋنيڭ ولكەسىندەگى 132 مىڭ 163 ادام كوشىرىلدى. جيلين ولكەسى 8-ايدىڭ 13-كۇنى تاسقىننان ساقتانۋداعى 4-دارەجەلى شۇعىل جاعدايعا توتەپ بەرۋ ۇندەۋىن 3-دارەجەگە كوتەردى. مەجەمەن 8-ايدىڭ 15-كۇنى جيلين ولكەسىنىڭ سىپيڭ، سۇڭيۋان، چاڭچۇن قالالارىندا قالىڭ جاڭبىر نەمەسە نوسەر جاۋادى.


    8-ايدىڭ 13-كۇنىنە دەيىن حيلۇڭجياڭداعى سۋ دەڭگەيى ساقتىق سىزىعىنان 0.05 تە 1.18 مەتر اسقان سۋ قويماسىنىڭ سانى 19 عا جەتتى. حيلۇڭجياڭ وزەنى الابىنداعى قالالار ساقتىق كۇيگە ٴوتىپ، ساقاداي سايلاندى.

اۋدارعان: امانتاي مۇسايىپ ۇلى