ٴوز حابارىمىز. باس شۋجي شي جينپيڭ تاياۋدا شاندۇڭ ولكەسىنىڭ دۇڭيىڭ قالاسىنداعى حۋاڭحى وزەنىنىڭ تەڭىزگە قۇيار اۋىزىنا، اۋىل شارۋاشىلىعىنىڭ جوعارى، جاڭا تەحنيكا كاسىبىنەن ۇلگى كورسەتۋ رايونىنا، حۋاڭحى وزەنىنىڭ بۇرىنعى تاسقىن ىركۋ رايونىنداعى تۇرعىنداردى كوشىرۋ الەۋمەتتىك اۋماعىنا بارىپ، حۋاڭحى وزەنى الابىنىڭ ەكولوگياسىن قورعاۋ جانە جوعارى ساپالى دامۋ جاعدايىن ناق مايداندا ۇعىسىتى،بۇل جەرگىلىكتى ورىندا اسا كۇشتى اڭىس قوزعادى. 

    كوپشىلىك بىلاي دەستى: باس شۋجيدىڭ تاپسىرماسىن ەستە بەرىك ساقتاپ، ەكولوگيالىق وركەنيەت تانىمىن ساۋلەلەندىرىپ، سوتسياليستىك وسىزامانداندىرۋ قۇرىلىسىنا ۇلەس قوسۋىمىز كەرەك. 

    حۋاڭحى وزەنىنىڭ تەڭىزگە قۇيار اۋزىندا قىزمەت تەكسەرگەندە، باس شۋجي شي جينپيڭ مىنالاردى باسا دارىپتەدى: حۋاڭحى وزەنىن جاپپاي قورعاۋدى تىڭعىلىقتى ىلگەرىلەتىپ، حۋاڭحى وزەنىنىڭ حاۋىپسىزدىگىنە كەپىلدىك ەتۋ- مەملەكەتتى باسقارىپ، بيلىك جۇرگىزۋدەگى ٴىرى ٴىس. تاسقىننان ساقتانۋ، اپات شىعىنىن ازايتۋ جالپىلىق جۇيەسى قۇرىلىسىن كۇشەيتىپ، سۋ ەكولوگياسى كەڭىستىگىن باسقارۋ-مەڭگەرۋدى قاتاڭداستىرىپ، تاسقىن سۋ جانە قۋاڭشىلىق اپاتىنا شۇعىل توتەپ بەرۋ، ٴبىر جاقتى ەتۋ قابىلەتىن جوعارىلاتىپ، حۋاڭحى وزەنى جاعالاۋىنىڭ حاۋىپسىزدىگىنە شىنايى كەپىلدىك ەتۋ كەرەك. حۋاڭحى وزەنى ساعاسىن باسقارۋ مەكەمەسىنىڭ باستىعى پەي ميڭشىڭ بىلاي دەدى: ٴبىز، ٴسوز جوق، حۋاڭحى وزەنىن ويداعىداي جونگە سالۋ بەكىمىمىزدى بەكەمدەپ، تەڭىزگە قۇياتىن سۋ مەن اقپا قۇمنىڭ سالىستىرماسىن تەڭشەۋ سىندى تۇيىندى مىقتى يگەرۋىمىز، ودان قالسا، اتىراۋ ٴوڭىرىنىڭ ەكولوگياسىن قورعاۋ جانە قالپىنا كەلتىرۋ قىزمەتىن ويداعىداي ىستەپ، اتىراۋدى ەكولوگيالىق سۋمەن تولىقتاۋىمىز كەرەك. 

    باس شۋجي شي جينپيڭ بىلاي دەپ اتاپ كورسەتتى: حۋاڭحى اتىراۋى جاراتىلىستىق قورىعىنىڭ ەكولوگيالىق ورنى توتەنشە ماڭىزدى، حۋاڭحى ساعاسى مەملەكەتتىك باقشاسىن قۇرۋدى جەدەل جوسپارلاپ، عىلمي دالەلدەپ، تىڭعىلىقتى ىلگەرىلەتۋ كەرەك. دۇڭيىڭ رايوندىق پارتكومنىڭ شۋجيى گوۋ حۇڭشۇي بىلاي دەدى: باس شۋجي وزەن اعىسى جولىنداعى وزگەرىستەرگە، تۇتاس جاراتىلىستىق قورىق رايونىنداعى وسى بىرنەشە جىلداعى تۇرلەردى قورعاۋعا، ەكولوگيانى قالپىنا كەلتىرۋگە ايرىقشا كوڭىل ٴبولىپ كەلەدى. ٴبىز حۋاڭحى وزەنىنىڭ تەڭىزگە قۇيار اۋزىن قورعاۋشىسى رەتىندە، ٴسوز جوق، ەكولوگيانى قورعاۋدىڭ تاريحي جاۋاپكەرشىلىگىن ارقالاپ، حۋاڭحى ساعاسى مەملەكەتتىك باقشاسىن ويداعىداي قۇرىپ، ەكولوگيالىق قۇرىلىس سىندى وسىناۋ ٴىرى قۇرىلىستى شىنايى، ويداعىداي جۇرگىزۋىمىز كەرەك. 

    حۋاڭحى اتىراۋى اۋىل شارۋاشىلىق جوعارى، جاڭا تەحنيكا كاسىبىنەن ۇلگى كورسەتۋ رايونى ەلىمىزدەگى مەملەكەت دارەجەلى ەكىنشى ۇلكەن اۋىل شارۋاشىلىق جوعارى، جاڭا تەحنيكا كاسىبىنەن ۇلگى كورسەتۋ رايونى سانالادى. باس شۋجي شي جينپيڭ وسى ارادا قىزمەت تەكسەرگەندە مىنالاردى باسا دارىپتەدى: سورتاڭ جەرلەردى جان-جاقتى پايدالانۋدى قانات جايدىرۋ-مەملەكەتتىڭ استىق حاۋىپسىزدىگىن قامتاماسىزداندىرۋدا، جۇڭگونىڭ استىق ٴوندىرىسىن مىقتى ۇستاۋدا ماڭىزدى ستراتەگيالىق مانگە يە. حۋاڭحى اتىراۋى اۋىل شارۋاشىلىق جوعارى، جاڭا تەحنيكا كاسىبىنەن ۇلگى كورسەتۋ رايونىن باسقارۋ كوميتەتىنىڭ 2-دارەجەلى شارلاۋشىسى لو شوۋييۇي بىلاي دەدى: باس شۋجيدىڭ تاپسىرماسىن ەستە بەرىك ساقتاپ، عىلمي زەرتتەۋ جەتىستىكتەرىن رەال وندىرگىش كۇشكە جەدەل اينالدىرىپ، اناعۇرلىم جوعارى ولشەم، اناعۇرلىم كەڭ كوز ايامەن سورتاڭ جەرلەردى جان-جاقتى پايدالانۋ تەحنيكاسىندا جاڭالىق اشۋ ورتالىعى قۇرىلىسىنىڭ اياق الىسىن جەدەلدەتىپ، سورتاڭ جەرلەرگە قاجەتتى ساپالى سورتتاردى دالمە-ٴدال، اناعۇرلىم ٴونىمدى تۇردە جەتىلدىرۋ كەرەك. 

    ياڭمياۋ الەۋمەتتىك اۋماعى حۋاڭحى وزەنىنىڭ بۇرىنعى تاسقىن ىركۋ رايونىنداعى بۇقارانىڭ ٴوندىرىس، تۇرمىس شارت-جاعدايىن جاقسارتۋ ٴۇشىن جاڭادان سالىنعان جاڭاشا الەۋمەتتىك اۋماق، باس شۋجي شي جينپيڭ وسى ارادا قىزمەت تەكسەرگەندە بىلاي دەپ اتاپ كورسەتتى: بەيقۇت ٴۇي سالىپ، حالىقتى اۋقاتتاندىرۋ قىزمەتىن تىڭعىلىقتى ىستەپ، كوشىرىپ ورنالاستىرۋ، كاسىپ سالاسى بويىنشا جۇمىسقا ورنالاستىرۋ، الەۋمەتتىك قۇرىلعى جانە الەۋمەتتىك اۋماق قىزمەت وتەۋ جۇيەسى قۇرىلىسىن ٴبىر تۇتاس ىلگەرىلەتىپ، حالىق بۇقاراسىنىڭ كوشىپ شىعۋىنا، ورنىعىپ قالۋىنا، دامۋىنا، اۋقاتتانۋىنا كەپىلدىك ەتۋ كەرەك. ياڭمياۋ الەۋمەتتىك اۋماعى پارتيا باس ياچەيكاسىنىڭ شۋجيى جاڭ مەيرۇڭ بىلاي دەدى: پارتيا باس ياچەيكامىز قولونەر بۇيىمدارى سەلبەستىك كووپەراتيۆىن باس بولىپ قۇرىپ، بۇقارانى ورتاق اۋقاتتانۋ جولىنا باستادىق. بۇرىن ۇيىمىزدەگى مۇلكىمىزدى سالىستىرساق ال قازىر وتباسى سالتىمەن، وتباسى تاربيەسىمەن سالىستىراتىن بولدىق، باس شۋجيدىڭ ٴسوزىن ەستە بەرىك ساقتايمىز، اۋىلداستار ٴۇشىن، ٴسوز جوق، جاقسى ىستەر، ناقتى ىستەر ىستەۋگە قۇلشىنامىز. 

    مۇناي، تابيعي گاز وزەكتى قاجەتىن شەشۋ ٴبىز ٴدوپ كەلىپ وتىرعان ماڭىزدى مىندەت. جەڭىس مۇناي الابىن بارلاۋ-اشۋدى زەرتتەۋ ورنىندا قىزمەت تەكسەرگەندە، باس شۋجي شي جينپيڭ مىنالاردى باسا دارىپتەدى: بارلاۋ-اشۋ تەبىنىن ارتتىرىپ، ەل ىشىندەگى ٴونىم مولشەرىنىڭ نەگىزىن بەكەمدەپ، ٴوزىن-ٴوزى قامتاماسىزداندىرۋ قابىلەتىن جوعارىلاتۋ كەرەك. بايلىقتى شوعىرلاندىرىپ، شەشۋشى، وزەكتى تەحنيكالاردان قامال الىپ، تازا، جوعارى ٴونىمدى اشىپ پايدالانۋدى جەدەلدەتىپ، ەنەرگيامەن قامداۋ ساپاسىن، پايدالانۋ ونىمدىلىگىن جانە كومىرتەگىن ازايتۋ دەڭگەيىن جوعارىلاتۋ كەرەك. جەڭىس مۇناي الابىن باسقارۋ مەكەمەسى شەكتى سەرىكتىگى پارتكومىنىڭ تۇراقتى مۇشەسى، ورىنباسار باس مەڭگەرۋشى شۋ حۋاۋىن بىلاي دەدى: ٴبىز تاعى دا قۇلشىنا تۇسىپ، مۇناي الابىن بارلاۋ-اشۋدى تىڭ ساتىعا كوتەرىپ، مەملەكەتتىڭ ەنەرگيا حاۋىپسىزدىگى سىندى اۋىر مىندەتتى باتىل ارقالايمىز. ٴبىز جاسىل دامۋ جولىندا تاعى دا تاماشا ناتيجەلەر جاراتىپ، وڭىرلىك ەكونوميكا مەن قوعامنىڭ كومىرتەگىن ازايتۋىنا، تۇتاس حۋاڭحى وزەنى الابىنىڭ ەكولوگياسىن قورعاۋعا جانە جوعارى ساپالى دامۋعا ۇلكەن ۇلەس قوسامىز. 


        اۋدارعان: كۇلان ىرىسباي قىزى