ٴوز حابارىمىز. ج ك پ ورتالىق كوميتەتىنىڭ باس شۋجيى، مەملەكەت ٴتوراعاسى شي جينپيڭ 12-ايدىڭ 3-كۇنى تۇستەن كەيىن بەيجيڭدە لاوس حالىق توڭكەرىستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى تۇڭلۇنمەن جۇڭگو ـ لاوس تەمىر جولىندا پويەز قاتىناۋ سالتىنا بەينە ەكران فورماسىندا قاتىناستى.

    مەملەكەتتىك ساياسي كەڭەستىڭ ورىنباسار ٴتوراعاسى، مەملەكەتتىك دامۋ جانە رەفورمالاۋ كوميتەتىنىڭ مەڭگەرۋشىسى حى ليفىڭ سالتتى باسقاردى.

    جۇڭگو مەن لاوستىڭ قاتىستى تاراۋلارىنىڭ، جەرگىلىكتى ورىنداردىڭ جاۋاپتىلارى، ينجەنەريا قۇرىلىسشىلارىنىڭ ۋاكىلدەرى، قاتىستى ەلدەردىڭ كۇنميڭدەگى باس كونسۋلدارى، لاوستاعى ەلشىلەرى قاتارلىلار جەكە-جەكە جۇڭگونىڭ كۇنميڭ قالاسىنداعى بولىمشە الاڭدا، لاوستىڭ ۆەنتيان قالاسىنداعى بولىمشە الاڭدا سالتقا قاتىناستى.

    لاوستىڭ ورىنباسار زۇڭليى سۇڭ ساي مەن جۇڭگو مەملەكەتتىك تەمىرجول توبىنىڭ جاۋاپتىسى جەكە ـ جەكە ەكى ەل باسشىلارىنا پويەز قاتىناتۋدىڭ دايىندىق جاعدايىن مالىمدەدى.

    ەكى ەلدىڭ مەملەكەت ٴتوراعالارى جەكە ـ جەكە ٴسوز سويلەدى.

    شي جينپيڭ جۇڭگو كوممۋنيستىك پارتياسى، جۇڭگو ۇكىمەتى جانە جۇڭگو حالقى اتىنان جۇڭگو ـ لاوس تەمىر جولىندا پويەز قاتىناعاندىعىن قىزۋ قۇتتىقتاپ، ەكى ەلدىڭ قۇرىلىسشىلارىنا وسكەلەڭ قۇرمەت ٴبىلدىردى.

    شي جينپيڭ بىلاي دەپ اتاپ كورسەتتى: مەن 2015-جىلى لاوس باسشىلارىمەن بىرلىكتە جۇڭگو ـ لاوس تەمىر جولىن بىرلەسىپ سالۋ جونىندە كەلەلى شەشىم جاسادىم. قۇرىلىس باستالعان 5 جىلدان بەرى، جۇڭگو مەن لاوس ٴبىر نيەتپەن سەلبەسىپ، ٴوزارا تىعىز سايكەسىپ، قيىنشىلىقتاردى جەڭىپ، قۇرىلىس مىندەتىن جوعارى دەڭگەيدە، جوعارى ساپامەن ورىنداپ، جۇڭگو مەن لاوستىڭ تاعدىرلاس ورتاق تۇلعاسى رۋحىنىڭ تەرەڭ ٴمانىن ٴىس جۇزىندىك ارەكەتتەرىمەن سومداپ، ەكى ەلدىڭ سوتسياليستىك ٴتۇزىمىنىڭ كۇشتى شوعىرلاندىرا وتىرىپ ٴىرى ىستەر تىندىرعان ەرەكشە باسىمدىعىن ايگىلەدى.

    شي جينپيڭ بىلاي دەپ اتاپ كورسەتتى: جۇڭگو ـ لاوس تەمىر جولى ەكى ەلدىڭ ٴوزارا ٴتيىمدى سەلبەستىگىنىڭ ۋاكىلدىك نىسانى. تەمىر جول تۇتاسقاننان كەيىن، كۇنميڭ مەن ۆەنتيان اراسىنداعى قاتىناس تەزدەيدى، قولايلىلاسادى. ەكى جاق كۇش ۇستىنە كۇش قوسىپ، جۇمىستى تىندىرۋعا، ناتيجە شىعارۋعا شەبەر بولىپ، تەمىر جولدى ويداعىداي قورعاپ، ۇتىمدى ىسكە قوسىپ، تەمىرجول لەنياسى جاعالاۋىن ويداعىداي اشىپ، ايتا قالسىن قۇرىپ، كەمەلدى لەنيا قالىپتاستىرىپ، ەكى ەل حالقىنا باقىت جاراتۋى كەرەك.

    شي جينپيڭ بىلاي دەپ باسا دارىپتەدى: جۇڭگو ـ لاوس تەمىر جولى - ”ٴبىر بەلدەۋ، ٴبىر جول“-دى جوعارى ساپامەن بىرلەسىپ قۇرۋدىڭ نىشاندىق ينجەنەرياسى. جۇڭگو تاياۋ جىلداردان بەرى جوعارى ولشەمدى، باياندى، حالىققا تيىمدىلىك جاساۋدى نىسانا ەتىپ، «ٴبىر بەلدەۋ، ٴبىر جولدى» بىرلىكتە قۇرۋ دەڭگەيىن ۇزدىكسىز جوعارىلاتىپ، ٴوزارا پايدا جەتكىزىپ، تەڭ يگىلىككە كەنەلتىپ، دۇنيە ٴجۇزى ەكونوميكاسىنىڭ دامۋىنا تىڭ ٴورىس اشتى. جۇڭگو لاوس سياقتى «ٴبىر بەلدەۋ، ٴبىر جول» بويىنداعى ەلدەرمەن بىرلىكتە اناعۇرلىم تىعىز «ٴبىر بەلدەۋ، ٴبىر جول» سەرىكتەستىك قاتىناسىن ورناتۋدى جەدەلدەتىپ، ادامزاتتىڭ تاعدىرلاس ورتاق تۇلعاسىن قۇرۋدى قاتار ىلگەرىلەتەدى.

    شي جينپيڭ مىنالاردى باسا دارىپتەدى: بىرنەشە كۇننىڭ الدىندا مەن جۇڭگونىڭ شاڭحاي قالاسىندا كەزىندە تەمىرجول كاسىبىن ۇيرەنگەن لاوستىق بىرنەشە وقۋشىنىڭ جازعان حاتىن تاپسىرىپ الدىم. ولار ٴبىر اۋىزدان جۇڭگودا ۇيرەنگەن بىلىمدەرىن جۇڭگو ـ لاوس تەمىر جولىنىڭ اينالىمى مەن دامۋىنا ارنايتىندىقتارىن ايتىپتى، بۇعان قاباعات قۋاندىم. جۇڭگو مەن لاوس دوستىعىنىڭ بولاشاعى جاستاردا، ٴوزارا بايلانىس جاساۋدىڭ نەگىزى جۇرەكتەردىڭ توعىسۋىندا. جۇڭگو لاوسپەن اراداعى دوستىق جولى ٴۇشىن ٴتىپتى دە كوپ تىرەكتى دارىندىلاردى جەتىلدىرۋدى قالايدى.

    تۇڭلۇن بىلاي دەدى: بۇگىن ماقتانۋعا تاتيتىن ٴسات، لاوستاعى ٴار ۇلت حالقىنىڭ ارمانى اقىرى جۇزەگە استى. جۇڭگونىڭ قولداپ-قۋاتتاعانىنا العىس ايتامىن، لاوس پويەز جوق داۋىرگە اقىرى قوش ايتىپ، وسىزاماندانعان تەمىر جولعا يە بولدى. لاوس ـ جۇڭگو تەمىر جولى-لاوستىڭ «قۇرلىقتىق تۇيىق ەلدەن» «قۇرىلىقتىق قاتىناس ەلىنە» اينالۋ ستراتەگياسىنىڭ «ٴبىر بەلدەۋ، ٴبىر جول» باستاماسىن ىشكەرىلەي توعىستىرۋداعى دانەكەرى، لاوستىڭ نەگىزدىك قۇرىلعىلاردى وسىزامانداندىرۋ قۇرىلىسىنداعى ماڭىزدى بەلەس بولىپ، لاوستىڭ ەكونوميكالىق، قوعامدىق دامۋىن بارىنشا جەبەيدى. ەكى ەل باسشىلارىنىڭ كوڭىل ٴبولۋى مەن ٴار جاقتىڭ زور كۇشپەن قولداۋىندا، ەكى جاق جۇقپالى اۋرۋ جاعدايى سياقتى قات-قابات سىن-سايىستار مەن قيىنشىلىقتاردى جەڭىپ، قۇرىلىستى ۋاعىندا ٴساتتى تامامدادى ٴارى پويەز قاتىناتتى، بۇل لاوستاعى ٴار ۇلت حالقىنىڭ مەملەكەت قۇرىلعاندىعىنىڭ 46 جىلدىعىن قارسى الاتىن قىمباتتى ساۋعاسى جانە لاوس پەن جۇڭگونىڭ ديپلوماتيالىق قاتىناس ورناتقاندىعىنىڭ 60 جىلدىعىن قۇتتىقتاۋداعى سالتاناتتى قۋانىشى، لاوس پەن جۇڭگونىڭ «تاتۋ كورشى، جاقسى دوس، تاماشا جولداس، سەنىمدى سەرىك» رۋحى مەن لاوس-جۇڭگو تاعدىرلاس ورتاق تۇلعاسى رۋحىنىڭ جاندى بەينەسى، سونداي-اق لاوس پەن جۇڭگو پارتيالارىنىڭ، ەكى ەلدىڭ جانە ەكى ەل حالقىنىڭ دوستىق قاتىناسىنىڭ ۇلى بەلگىسى بولىپ، لاوس پەن جۇڭگو پارتيالارىنىڭ، ەكى ەلدىڭ قاتىناسىنا، ٴسوز جوق، تىڭ دا ماڭىزدى مازمۇن قوسادى. لاوس جۇڭگومەن بىرلىكتە لاوس ـ جۇڭگو تەمىر جولىن ويداعىداي قورعاپ، ايتا قالسىن ىسكە قوسىپ، ەكى ەل مەن وڭىردەگى حالىققا ٴتىپتى كوپ باقىت جاراتىپ، ٴوڭىردىڭ ٴوزارا بايلانىسى مەن دامۋىن، گۇلدەنۋىن جەبەۋگە ۇلەس قوسۋدى قالايدى. جۇڭگونىڭ ۇزدىكسىز تىڭ شۇعىلالى تابىستار جاراتۋىن تىلەيمىن! لاوس پەن جۇڭگونىڭ دوستىق سەلبەستىك قاتىناسىنىڭ ماڭگى جالعاسۋىن ٴۇمىت ەتەمىن!

    ۆەنتيان پويەز ىستانسياسىنداعى پويەز شوفەرى: پويەز جۇرگىزۋگە دايىندالىپ بولدىق، ٴتوراعا تۇڭلۇننىڭ بۇيرىق تۇسىرۋىن وتىنەمىن،-دەپ مالىمەت بەردى.

    تۇڭلۇن: « پويەز قاتىناسىن!» -دەپ بۇيرىق بەردى.

    كۇنميڭ پويەز ىستانسياسىنداعى پويەز شوفەرى: پويەز جۇرگىزۋگە دايىندالىپ بولدىق، ٴتوراعا شي جينپيڭدى بۇيرىق تۇسىرۋگە ۇسىنىس ەتەمىز، ـ دەدى.

    شي جينپيڭ: «پويەز قاتىناسىن! »-دەپ بۇيرىق بەردى.

    جۇڭگو جاقتىڭ C 3 رەتكى جولاۋشىلار پويەزى كۇنميڭ پويەز ستانسياسىنىڭ 1-تەمىرجولىندا، لاوستىڭ C 82 رەتكى جولاۋشىلار پويەزى ۆەنتيان پويەز ستانسياسىنىڭ 1-تەمىرجولىندا تەڭ ۋاقىتتا قاتىنادى.
پويەز قاتىناۋ سالتى «جۇڭگو ـ لاوس حالقىنىڭ دوستىق جىرى» اۋەلەگەن ساتتە تابىسپەن اياقتادى.

    ديڭ شۋەشياڭ، ليۋ حى قاتارلىلار جوعارىداعى قيمىلدارعا قاتىناستى. لاوستىڭ زۇڭليى پانكان، مەملەكەتتىڭ ورىنباسار ٴتوراعاسى باني، ورىنباسار زۇڭليى جيچياۋ ۆەنتيان پويەز ىستانسياسىندا سالتقا قاتىناستى.
جۇڭگو-لاوس تەمىرجولى سولتۇستىكتە يۇننان ولكەسىنىڭ كۇنميڭ قالاسىندا باستالىپ، وڭتۇستىكتە لاوستىڭ استاناسى ۆەنتيانعا دەيىن جالعاسادى، بۇل تۇڭعىش رەت جۇڭگو ولشەمى قولدانىلعان، جۇڭگو مەن لاوس سەلبەسىپ سالىپ ىسكە قوسقان تەمىرجول قۇرىلىسى، سونداي-اق جۇڭگونىڭ تەمىرجول تورابىمەن تىكەلەي تۇتاساتىن شەتەل تەمىرجولى بولىپ، جالپى ۇزىندىعى 1035 كيلومەتر. پويەز قاتىناعاننان كەيىن، كۇنميڭنەن ۆەنتيانعا 10 ساعاتتا جەتۋگە بولادى.

اۋدارعان: امانتاي مۇسايىپ ۇلى