جيلين ولكەسىنىڭ تۇڭحۋا قالاسىندا 185 مىڭ مۋ جەردەگى ەرتە پىساتىن كۇرىشتىڭ جارتىسى جينالىپ بولدى. بيىل تۇڭحۋا قالاسىنداعى كۇرىشتى ولشەمدەندىرىپ ەگۋ كولەمى مەن سورتتى تۇقىم جالپىلاستىرۋ مولشەرى % 95 تەن استى، سونىمەن بىرگە 11 ٴتۇرلى كۇرىش ٴوندىرىسىنىڭ وزىق تەحنيكاسى جالپىلاستىرىلىپ، كۇرىشتىڭ ٴونىم مولشەرى مەن ساپاسىنا كەپىلدىك ەتىلدى. بيىل جەر ـ جەر جاراتىلىستىق شارت ـ جاعدايدىڭ ولقىلىقتارىنا مەڭزەس، جاڭا سورت، جاڭا تەحنيكانى جالپىلاستىرىپ، بىرلىك ٴونىمدى جوعارىلاتتى. جارتىلاي قۋاڭ وڭىرگە ورنالاسقان سانشي ولكەسىنىڭ چاڭجى قالاسىندا تەحنيكانى جاڭالاۋ ارقىلى سوك ەككەن كەزدە ىدىرايتىن سۋ ٴسىڭۋ جارعاعى توسەلىپ، كۇز ماۋسىمىنداعى توپىراق ىلعالدىعى ساقتالىپ، تۇقىم مايساسىنىڭ ٴساتتى وسۋىنە شارت-جاعداي جاسالدى. جياڭشيدىڭ نانچاڭ قالاسىندا 100 مىڭ مۋدان استام جەردى سۋارۋ قيىنعا سوقتى، بۇرىن وسى اراعا تەك ٴشول جەردە وسەتىن داقىلدار ەگىلەتىن، بيىل جەرگىلىكتى ورىن قۇرعاقشىلىققا ٴتوزىمدى كۇرىش سورتىن زور كۇشپەن جالپىلاستىرىپ، شارۋالاردىڭ استىق ەگۋىنە كەپىلدىك ەتتى.

    حىبي ولكەسىنىڭ ساڭجۋ قالاسىنداعى 4 ميلليون 300 مىڭ مۋ سورتاڭ جەردە داقىلدار ىركەس-تىركەس پىستى. بيىل جەرگىلىكتى ورىن توپىراقتى قۇنارلاندىرۋ نەگىزىندە، كاۋلەن، شەكىلدەۋىك سياقتى سورتاڭعا ٴتوزىمدى كوپتەگەن ساپالى سورتتاردى تاڭداپ سۇرىپتاپ جالپىلاستىرىپ، شارۋالاردىڭ ٴونىمىن جانە كىرىسىن ارتتىردى.

    ىشكى مۇڭعۇلدىڭ ۋچۋان اۋدانىنداعى 700 مىڭ مۋ جەردەگى كارتوپتان مول ٴونىم الىندى . ٴونىم الۋ قارقىنىن تەزدەتىپ، جاڭا كارتوپتى دەر كەزىندە تيەۋ، تاسۋ، ساتۋعا كەپىلدىك ەتۋ ٴۇشىن، جەرگىلىكتى ورىن ارناۋلى ۋاقىتتىق جۇمىس بازارىن قۇرىپ، ەگىمشىلىك وتباسىلارىن، سەلبەستىك كووپەراتيۆىن جانە سىرتتان كەلگەن جۇمىسكەرلەردى قامتاماسىز ەتتى جانە قىزمەت وتەدى. قازىر سىچۋان، گانسۋ، نيڭشيا، شاندۇڭ قاتارلى ولكە، اۆتونوميالى رايونداردان كەلگەن 10 مىڭنان استام جۇمىسكەر ەگىن ورۋعا كومەكتەستى. مەجەمەن بۇكىل ەل بويىنشا كۇزگى استىقتى كەڭ كولەمدە جيناۋ 9-ايدىڭ سوڭىندا باستالادى، اۋىل شارۋاشىلىعى، اۋىل - قىستاق مينيسترلىگى جەر - جەردىڭ ورۋ-جيناۋ ماشينالارى، شۇعىل جاعدايعا توتەپ بەرۋ جۇمىس اتىرەتى، سونداي - اق كەپتىرۋ، قامبادا ساقتاۋ سياقتى جان - جاقتىلى دايىندىقتارىنا ۇزدىكسىز جەتەكشىلىك ەتىپ، كۇزگى استىقتىڭ تولىق قامبالانۋىنا كەپىلدىك ەتەدى.

اۋدارعان: كۇلان ىرىسباي قىزى