ءوز حابارىمىز. بيىل جىل باسىنان بەرى، ەلىمىزدىڭ مۇناي، تابيعي گاز قۇبىر تورابىنىڭ نەگىزدىك قۇرىلعىلارى جەدەل دامىتىلدى. قازىرگە دەيىن جاڭادان سالىنعان مۇناي، تابيعي گاز قۇبىرىنىڭ ۇزىندىعى 4000 كيلومەتردەن اسىپ، تابيعي گازدىڭ «بۇكىل ەل بويىنشا ءبىرتۇتاس تور» قۇرىلىسى ورنىقتى ىلگەرىلەدى.

 

10 جىلعا جۋىق ۋاقىت سالىنعان جۇڭگو مەن رەسەيدىڭ شىعىس جەلىسىندەگى تابيعي گاز قۇبىرى تاياۋدا رەسمي تۇتاستى. قۇبىردىڭ جالپى ۇزىندىعى 5111 كيلومەتر، سولتۇستىگى حيلۇڭجياڭنىڭ حيحى وزەنىنەن باستالىپ، وڭتۇستىگى شاڭحايعا دەيىن 9 ولكەنى (اۆتونوميالى رايون، توتە قاراستى قالانى) باسىپ وتەدى.

 

 بيىل جىل باسىنان بەرى، بايسىدان ۋىنشانعا، حۋليننەن چاڭچۇنگە دەيىنگى قۇبىرلاردا قۇرىلىس باستالۋىنا ىلەسە، باتىستىڭ گازىن شىعىسقا جەتكىزۋ 4-جەلىسىنىڭ العاشقى بولەگى ءساتتى وندىرىسكە قوسىلىپ، ەلىمىزدىڭ تابيعي گاز قۇبىر تورابىنىڭ «بەس بويلىق، بەس ەندىك» جاڭا جاعدايى جەدەل قالىپتاستى.

 

كەزەكتە، ەلىمىزدىڭ نەگىزگى مۇناي، تابيعي گاز قۇبىر تورابىنىڭ جالپى ۇزىندىعى 100 مىڭ كيلومەتردەن اسىپ، ءبىر رەتكى تابيعي گاز جەتكىزۋ قۋاتى 2020-جىلعى 223 ميلليارد تەكشە مەتردەن قازىرگى 394 ميلليارد تەكشە مەترگە جەتىپ، %76 ارتىپ، تابيعي گازدىڭ كۇندىك گازبەن قامداۋ قۋاتى ءبىر ميلليارد تەكشە مەتردەن استى. جوبا بويىنشا، 2025-جىلعا بارعاندا، ەلىمىز شىعىس پەن باتىستى، وڭتۇستىك پەن سولتۇستىكتى ەندەي وتەتىن، بۇكىل ەلدى قامتىعان، شەتەلدەرمەن تۇتاساتىن تابيعي گازدىڭ «بۇكىل ەل بويىنشا ءبىرتۇتاس تورى» قۇرىلىسى اناعۇرلىم كەمەلدەنىپ، مۇناي، تابيعي گازبەن قامداۋدى قامتاماسىزداندىرۋ قابىلەتى اناعۇرلىم جوعارىلايتىن بولادى.

 

اۋدارعان: نازار ءارىپ ۇلى