حوش حابار، ۇزىلگەن بىلەگى قايتا جالعانعان حوتاندىق ۇيعۇر بالاقايدىڭ دەنساۋلىعى كۇن سايىن جاقسارىپ كەلەدى

جۇڭگوشا ەمدەۋ مەن باتىسشا ەمدەۋدى ۇشتاستىرۋدىڭ ارقاسىندا، ۇزىلگەن بىلەگى قايتا جالعانعان حوتاندىق ۇيعۇر بالاقاي شياۋ مايدىڭ (جاناما ەسىمى) اسقازان، ىشەك قىزمەتى تەز ارادا قالپىنا كەلىپ، تاماققا تابەتى تارتا باستادى. 

5-ايدىڭ 10-كۇنى ـــ بىلەگى ۇزىلگەن حوتاندىق ۇيعۇر بالاقايدىڭ بىلەگىن قايتا جالعاۋ وپەراتسياسىن جاساتقانىنا 9-كۇن. ونىڭ جاۋاپتى شيپاگەرى لي ليدىڭ تانىستىرۋىنشا، وپەراتسيا جاساپ ەمدەۋمەن بىرگە، جۇڭگوشا ەمشىلىك ارقىلى دياگنوز قويىپ، ءدارى-دارمەك بەرىپ ەمدەسە، بالاقايدىڭ ءتىپتى دە تەز ساۋىعۋىنا سەپتىگى تيەدى ەكەن.

سۋرەتتە: 5-ايدىڭ 10-كۇنى، ەمدەۋ قىزمەتكەرى شياۋ مايعا عىلىم جالپىلاستىرۋ سۋرەتتى جۋرنالىن تۇسىندىرۋدە. سول كۇنى، شياۋ مايدىڭ شينجياڭ مەديتسينا داشۋەسىنە قاراستى جۇڭگوشا ەمشىلىك شيپاحاناسىندا وپەراتسيا جاساتقانىنا 9-كۇن، قايتا جالعانعان وڭ بىلەگىنىڭ قالپىنا كەلۋى جاقسى، ءتۇرلى قابىنۋ كورسەتكىشىنىڭ قالپىنا كەلۋى نورمال. شيپاحانا كەلەسى قادامدا ەمدەۋ ءتۇيىنىن شياۋ مايدىڭ قول-اياق يقۋاتىن ساۋىقتىرۋ مەن پسيحيكالىق جاقتان ەمدەۋگە اۋدارادى. انار بۇلت/ شينجياڭ گازەتىنىڭ ءتىلشىسى تاڭ يۇڭ فوتوسى. 

شياۋ ماي تاڭەرتەڭ ءبىر شەلپەك جەسە، تۇستە جارتى ۇلەستەن كوبىرەك گويوۋرۋ لاعىمان جەيدى، ودان كەيىن 2 رەت قورەكتىك ۇنتاق جەپ، 2 قۇتى ايران ءىشىپ، بىرنەشە جەمىس-جيدەك جەيدى.....

5-ايدىڭ 10-كۇنى ـــ شياۋ مايدىڭ توسەكتەن ءتۇسىپ، اياق باسىپ شىنىققانىنا 2-كۇن، ۇلىنىڭ جەگەن تاماق مولشەرى قاۋىرت كوبەيگەنىن كورىپ قايران قالعان شەشەسى سۇديمما يمىنتوحتى ۇلىنىڭ اسقازانى قورىتپاي قالۋىنان الاڭداپ، شياۋ مايدى «شومىشتەن قاقپاق» بولدى، الايدا شيپاگەر ونىڭ مۇنىسىنا جول قويمادى.

سۋرەتتە: 5-ايدىڭ 10-كۇنى، شەشەسى شياۋ مايعا تاماق ىشكىزۋدە. انار بۇلت/ شينجياڭ گازەتىنىڭ ءتىلشىسى تاڭ يۇڭ فوتوسى.

«بالانىڭ تاماققا تابەتىنىڭ تارتۋى دەنساۋلىعىنىڭ تەز ارادا قالپىنا كەلە باستاعاندىعىنىڭ بەلگىسى». وسى شيپاحانا بالالار ءبولىمىنىڭ مەڭگەرۋشىسى جاڭ شۋەچيڭ بىلاي دەدى: 7 جاستاعى بالاقاي ەسەيىپ-ەرجەتۋ باسقىشىندا تۇرعاندىقتان، شياۋ مايدى تاماقتان تەجەمەدىك، قايتا جۇڭگوشا ءدارى-دارمەك ارقىلى بالانىڭ اسقازان-ىشەك يقۋاتىن جاقسارتتىق، بالاقاي نەنى ۇناتىپ جەسە، وعان سونى جەگىزدىك، قازىر ونىڭ كوڭىل كۇيى جاقسى، تاماققا دا تابەتى ءتاۋىر.

سۋرەتتە: 5-ايدىڭ 10-كۇنى، سەسترا بالاقايمەن بىرگە ويىن ويناۋدا. انار بۇلت/ شينجياڭ گازەتىنىڭ ءتىلشىسى تاڭ يۇڭ فوتوسى. 

5-ايدىڭ 5-كۇنى، اتى بۇكىل ەلگە ايگىلى جۇڭگوشا ەمشىلىك، ءدارى-دارمەك مامانى، وسى شيپاحانا سۇيەك ءبولىمىنىڭ اعا شيپاگەرى ۋاڭ جيشيان ناۋقاس بولمەلەرىن تەكسەرىپ، شياۋ مايدىڭ اۋىر جارالانعاننان كەيىنگى قان ازدىق جاعدايىن ەسكەرە وتىرىپ، 3 رەت ايۋ بالدىرعان قان تولىقتاۋ ىشىرتكىسىن جاساتىپ بەردى. جۇڭگوشا ەمدەۋ مەن باتىسشا ەمدەۋدى ۇشتاستىرۋ ارقىلى، شياۋ مايدىڭ دەنساۋلىعى تەز ارادا قالپىنا كەلە باستادى. جاراقاتتىڭ تەزىرەك ساقايۋىن جەبەۋ ءۇشىن، ۋاڭ جيشيان شياۋ مايعا ىستەتىلەتىن ءدارىنى تەڭشەپ، 2 ءتۇرلى ءدارى قوسىپ، جاراقاتىنىڭ ساقايۋىن تەزدەتەتىن جۇڭگوشا ءدارى بەردى.

شياۋ مايدىڭ جاۋاپتى شيپاگەرى لي لي بىلاي دەدى: قازىر شياۋ ماي العاشقى قالپىنا كەلۋ مەزگىلىندە تۇر، بالانىڭ توسەك تارتىپ جاتقاندا قورەكتىك جەتىسپەي، سوڭعى مەزگىلدە تومەن بەلوكتى قان اۋرۋى پايدا بولۋىنان ساقتانۋ ءۇشىن، ءبىز تاعى 4 ءتۇرلى سورپا جانە قورعاۋ رولىن وينايتىن دومالاق ءدارى قوسۋ ارقىلى، شياۋ مايدىڭ اسقازان-ىشەك يقۋاتىنىڭ قالپىنا كەلۋىن ونان ارى جەبەدىك، 2 كۇننەن كەيىن شياۋ مايعا تاعى ءبىر رەت شاعىن وپەراتسيا جاساپ، ونىڭ جاراقاتىنىڭ ساقايۋ جاعدايىن كورەمىز.

سۋرەتتە: 5-ايدىڭ 10-كۇنى، شياۋ ماي تاعى دا جاڭا ويىنشىق تاپسىرىپ الدى. انار بۇلت/ شينجياڭ گازەتىنىڭ ءتىلشىسى تاڭ يۇڭ فوتوسى. 

الدىڭعى جاعدايدى ەستەرىڭىزگە سالا كەتەيىك

4-ايدىڭ 30-كۇنى ساعات 20 مولشەرىندە، حوتان اۋدانى لايقا اۋىلى قۇمارىق قىستاعىندا تۇراتىن 7 جاستاعى ۇل بالا شياۋ ماي ابايسىزدا قولىن تراكتوردىڭ تاسپالى دوڭگەلەگىنە سۇعىپ الادى دا، تاسپا ونىڭ وڭ بىلەگىن ءۇزىپ كەتەدى. قوعامداعى ءار سالانىڭ بار كۇشپەن قولداۋىندا، بۇل بالا تىزگىن ۇشىمەن شينجياڭ مەديتسينا داشۋەسىنە قاراستى جۇڭگوشا ەمشىلىك شيپاحاناسىنا جەتكىزىلىپ ەمدەتىلەدى. قازىر ۇزىلگەن بىلەگى قايتا جالعانعان شياۋ ماي حاۋىپ-قاتەردەن قۇتىلىپ، بالنيتسا توسەگىنەن جەرگە ءتۇسىپ شىنىعۋدى باستادى.

سۋرەتتە: 5-ايدىڭ 9-كۇنى، شينجياڭ مەديتسينا داشۋەسىنە قاراستى جۇڭگوشا ەمشىلىك شيپاحاناسىندا شياۋ ماي شەشەسى مەن ەمدەۋ قىزمەتكەرلەرىنىڭ سەرىك بولۋىندا اۋرۋحانا زالىندا ءجۇرىپ ءجۇر. انار بۇلت/ شينجياڭ گازەتىنىڭ ءتىلشىسى تاڭ يۇڭ فوتوسى. 

بىرنەشە كۇننەن بەرى، ۇزىلگەن بىلەگى قايتا جالعانعان 7 جاستاعى حوتاندىق ۇيعۇر ۇل بالانىڭ دەنساۋلىعىنىڭ بىرتىندەپ قالپىنا كەلگەنى جونىندەگى حاباردى تەلەۆيزوردان كورىپ، راديودان ەستىپ، گازەتتەن وقىعان جانە جاڭا مەديا ارقىلى ۇققان جۇرتتىڭ نە ايتقانىن بىرگە ەستىپ كورەلىك: 

جارالانعان بالاقايدىڭ نەبارى 8 ساعاتقا جەتپەيتىن ۋاقىتتا شيپاحانامىزعا جەتكىزىلىپ، 3 ساعات 30 مينۋت وپەراتسيا جاسالىپ، ۇزىلگەن بىلەگىنىڭ قايتا ءساتتى جالعانۋى قوعامداعى ءار سالانىڭ ءبىر جاعادان باس، ءبىر جەڭنەن قول شىعارا تىعىز سايكەسۋىنىڭ ناتيجەسى، شيپاگەر تۇرعىسىنان بالاقايدىڭ دەنساۋلىعىنىڭ تەزىرەك قالپىنا كەلۋىنە شىنايى تىلەۋلەسپىن.

وسىنشا كوپ ادام بىلەگى ۇزىلگەن بالاقايعا كوڭىل ءبولدى، ءمان بەردى. سول ءۇشىن بالاقاي، بارىنشا قايراتتان!

مەن دە ءبىر انامىن، مەنىڭ بالام بار، وسى بالاقايعا قاتىستى حاباردى كورگەندە، ادامداردىڭ ىستىق مەيىرىنەن اسەرلەنگەنىمنەن كوزىمدى جاسپەن جۋدىم، بۇل قوعامىمىز مەيىر-شاپاعاتقا تولى ەكەنىن دالەلدەدى.

ەرەكشە اسەرلەندىم، وپەراتسيا جاساعان شيپاگەرلەر دە ەرەن مىقتى ەكەن، ۇشۋعا ازىرلەنگەن ۇشاقتىڭ قايتا بۇرىلعانى وتە جاقسى بولعان!

بالاقايدىڭ بىلەگىن امان ساقتاپ قالۋ بەرى ايتقاندا وتباسىنىڭ ءۇمىتى، ارى ايتقاندا وتاننىڭ ءۇمىتى، بالاقاي، قايراتتان، سەن ءالى-اق ساقايىپ كەتەسىڭ!

مەن ءبىر وقىتۋشىمىن، تەلەۆيزوردان بالاقايعا قاتىستى حاباردى كورىپ جۇرەگىم پارە-پارە بولدى ءارى ەرەن اسەرلەندىم، بالاقايدىڭ تەزىرەك ساۋىعىپ، ساباقتاستارىنىڭ قاتارىنا، مەكتەپتىڭ قۇشاعىنا ورالۋىن ءۇمىت ەتەمىن. 

باستاۋىش مەكتەپتىڭ ءبىر وقۋشىسىمىن، قۇربىمنىڭ تەزىرەك ساۋىعۋىنا تىلەكتەسپىن، قايراتتان! 

 اۋدارعان: ساعىنبەك رابات ۇلى

来源：新疆日报

监制，审稿：叶力夏提

微信制作：阿依娜