ينفورماتسيا اشكەرەلەۋ: mzjubao@cnr.cn

وزەكتى ماقالالار

شي جينپيڭ ازيا-تىنىق مۇحيت ەكونوميكالىق ماجىلىسىنە قاتىناستى

来源:央广网     |责编:达吾力别克|     发布日期: 2021-07-17 12:29

شي جينپيڭ ازيا-تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ماجىلىسىنە قاتىناستى ءارى ءسوز سويلەدى

ءوز حابارىمىز. مەملەكەت ءتوراعاسى شي جينپيڭ 7-ايدىڭ 16-كۇنى كەشتە ۇسىنىس بويىنشا بەيجيڭدە ازيا تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ماجىلىسىنە بەينە ەكران فورماسىندا قاتىناستى ءارى ءسوز سويلەدى.

 

شي جينپيڭ بىلاي دەپ اتاپ كورسەتتى: جاڭا تيپتى ايدارشا ۆيرۋسىمەن جۇعىمدالعان وكپە قابىنۋ ىندەتى قايتا باس كوتەردى، جۇقپالى اۋرۋدان ساقتانۋ جانە ونى تىزگىندەۋ جاعدايى ءالى دە اۋىر. سونىمەن بىرگە، بەيبىتشىلىك پەن دامۋ ءالى دە ءداۋىردىڭ باستى تاقىرىبى بولۋدا، كوپ جاقتىلىقتى قورعاپ، ىنتىماقتى، سەلبەستىكتى كۇشەيتىپ، سىن سايىستارعا بىرگە توتەپ بەرۋ ءۇنى اناعۇرلىم كۇشەيدى. ءبىز بىلتىر ازيا تىنىق مۇحيت ەكونوميكالىق سەلبەستىك ۇيىمىنىڭ 2040-جىلعا دەيىنگى بولاشاق جوسپارىن ماقۇلداپ، ازيا تىنىق مۇحيت ورتاق تۇلعاسى نىساناسىن العا قويدىق. ازيا تىنىق مۇحيت ءوڭىرى — دۇنيە ءجۇزى ەكونوميكاسىنىڭ ارتۋىنداعى ماڭىزدى رايون. ىندەتتى تىزگىندەپ، ەكونوميكانىڭ ارتۋىن قالپىنا كەلتىرىپ، دۇنيە ءجۇزى ەكونوميكاسىنىڭ قالپىنا كەلۋىن ىلگەرىلەتۋ — ازيا تىنىق مۇحيت وڭىرىندەگى مۇشەلەردىڭ كەزەكتەگى ەڭ ماڭىزدى مىندەتى.

 

ءبىرىنشى، ىندەتكە قارسى حالىقارالىق سەلبەستىكتى كۇشەيتۋ كەرەك. جۇڭگو دامۋ ۇستىندەگى ەلدەرگە 500 ميلليوننان استام ۆاكسينا اتادى، الداعى 3 جىلدا تاعى دا 3 ميلليارد ا ق ش دوللارىندىق حالىقارالىق كومەك بەرەدى. جۇڭگو ۆاكسينا قامداۋ تىزبەگىنىڭ ورنىقتىلىعىن، حاۋىپسىزدىگىن قامتاماسىز ەتۋ، شەشۋشى زات اينالىمىن جەبەۋ سياقتى سەلبەستىك دارىپتەمەلەرىنە بەلسەنە ات سالىسىپ، ۇتىمدى شارالار قولدانىپ، ادامداردىڭ اقاۋسىز، حاۋىپسىز، ءتارتىپتى بارىس كەلىس جاساۋىنا كەپىلدىك ەتۋدى قالايدى. جۇڭگو ازيا-تىنىق مۇحيت ەكونوميكالىق سەلبەستىك ۇيىمىنا جىلۋ اتاپ، «جۇقپالى اۋرۋ جاعدايىنا جانە ەكونوميكانىڭ قالپىنا كەلۋىنە توتەپ بەرۋ» قورىن قۇردى.

 

ەكىنشى، وڭىرلىك ەكونوميكانىڭ ءبىر تۇلعالانۋىن تەرەڭدەتۋ كەرەك. ساۋدا مەن قارجى قوسۋدىڭ ەركىن، قولايلى بولۋىن ىلگەرىلەتىپ، الەمدىك ساۋدا ۇيىمىن وزەك ەتكەن كوپ جاقتى ساۋدا ءتۇزىلىسىن قورعاۋ كەرەك. داۋالدى بۇزۋ، داۋال سالماۋ، اشىق ۇستاۋ، اۋاشالاماۋ، توعىسۋ، دوستىقتان قول ۇزبەۋ كەرەك. ماكرولىق ەكونوميكا ساياساتىن سايكەستىرۋدى كۇشەيتىپ، ۇنامسىز اسەردى تەجەپ، سيفرلى ءوزارا بايلانىس پەن سەلبەستىكتى ىلگەرىلەتىپ، وڭىرلىك ەكونوميكانىڭ ءبىر تۇلعالانۋىن ىلگەرىلەتىپ، جوعارى دەڭگەيدەگى ازيا تىنىق مۇحيت ەركىن ساۋدا رايونىن ەرتەرەك قۇرۋ كەرەك. جۇڭگو جاق وڭىرلىك جالپى بەتتىك ەكونوميكالىق سەرىكتەستىك قاتىناس كەلىسىمىن تەكسەرىپ بەكىتۋ قىزمەتىن الدىمەن ورىنداپ، كەلىسىمنىڭ جىل ىشىندە رەسمي كۇشكە يە بولۋىن ءۇمىت ەتەدى.

 

ءۇشىنشى، سيىسىمدى، باياندى دامۋعا تاباندى بولۋ كەرەك. ادامدى نەگىز ەتۋگە تاباندى بولىپ، جاسىل ارتۋدى جۇزەگە اسىرۋ قاجەت. جۇڭگو كليمات وزگەرىسىنە توتەپ بەرۋگە ايرىقشا ءمان بەرەدى، 2030-جىلدان بۇرىن كومىرتەگىنىڭ ءبولىپ شىعارىلۋىن جوعارى شەكتە تەجەۋگە، 2060-جىلدان بۇرىن كومىرتەگىنىڭ بەيتاراپتانۋىن جۇزەگە اسىرۋعا كۇش سالادى. جۇڭگو ازيا تىنىق مۇحيت ەكونوميكالىق سەلبەستىك ۇيىمىنىڭ باياندى دامۋىن جانە ەكونوميكالىق، تەحنيكالىق سەلبەستىكتى قولدايدى، ەنەرگيانىڭ جوعارى ءونىمدى، تازا، كوپ نەگىزدى دامۋىن ىلگەرىلەتەدى، قامتىمدى ساۋداعا قارجى قوسۋدى جەبەيدى، ورتاشا، شاعىن كاسىپورىنداردىڭ دامۋىن قولدايدى، ايەلدەر سياقتى ءالسىز قاۋىمدى سۇيەمەلدەۋ تەبىنىن ارتتىرىپ، 2030-جىلعا دەيىنگى باياندى دامۋ كۇن ءتارتىبىن قۇلشىنا تياناقتاندىرادى.

 

ءتورتىنشى، عىلىم تەحنيكادا جاڭالىق اشۋ ورايىن مىقتى يگەرۋ كەرەك. الەمدىك سيفرلى ەكونوميكا — اشىق جانە تىعىز بايلانىستى تۇتاس تۇلعا، سەلبەسىپ تەڭ يگىلىككە كەنەلۋ — بىردەن ءبىر دۇرىس جول، توماعا تۇيىق، قاقپايلاۋ، قاراما قارسى بولشەكتەۋشىلىك سياقتى پيعىلدار تەك تۇيىققا تىرەلەدى. سيفرلى نەگىزدىك قۇرىلعى قۇرىلىسىن كۇشەيتىپ، اشىق، ءادىل، كەمسىتپەيتىن سيفرلى ساۋدا ورتاسىن قۇلشىنا قالىپتاستىرۋ كەرەك. جۇڭگو سيفرلى قابىلەت قۇرىلىسى جونىندەگى زەرتتەۋ تالقى ءماجىلىسىن اشىپ، سيفرلى تەحنيكانىڭ ساياحاتتىڭ قالپىنا كەلۋىنە دەم بەرۋى سياقتى سەلبەستىك دارىپتەمەلەرىن ىلگەرىلەتەدى.

 

شي جينپيڭ مىنالاردى باسا دارىپتەدى: جۇڭگو جاپپاي سوتسياليستىك وسىزاماندانعان مەملەكەت قۇرۋدىڭ جاڭا ساپارىن باستادى، اناعۇرلىم جوعارى دەڭگەيدەگى اشىق ەكونوميكانىڭ جاڭا ءتۇزىلىسىن ورناتىپ، اناعۇرلىم تارتىمدى تيجارات ساۋدا ورتاسىن جاراتىپ، ءبىر بەلدەۋ، ءبىر جولدى  جوعارى ساپامەن بىرگە قۇرۋدى ىلگەرىلەتىپ، دۇنيە جۇزىندەگى جانە ازيا تىنىق مۇحيت وڭىرىندەگى ءار ەلمەن اناعۇرلىم جوعارى دەڭگەيدەگى ءوزارا پايدا جەتكىزىپ، تەڭ يگىلىككە كەنەلۋدى جۇزەگە اسىرادى.

 

شي جينپيڭ سوڭىندا بىلاي دەدى: جاڭا زەلانديادا  سەن كۇنگە بەت الساڭ، كولەڭكە تۇبىندە عايىپ بولادى. دەگەن ءتامسىل بار. ءبىز ادامزات سەلبەستىگىنىڭ جۇقپالى اۋرۋ جاعدايىن جەڭۋىنە، دۇنيە ءجۇزى ەكونوميكاسىنىڭ قالپىنا كەلۋ بولاشاعىنا، ادامزاتتىڭ ورتاق كوركەم بولاشاعىنا كامىل سەنەمىز. ءبىر جاعادان باس، ءبىر جەڭنەن قول شىعارىپ، جۇقپالى اۋرۋعا قارسى تۇرۋ سەلبەستىگى مەن ەكونوميكانىڭ قالپىنا كەلۋىن قول ۇستاسا ىلگەرىلەتىپ، ازيا تىنىق مۇحيت ءوڭىرىنىڭ گۇلدەنىپ كوركەيۋىنىڭ كوركەم بولاشاعىن بىرگە جاراتايىق!

 

وسى رەتكى ءماجىلىس بيىلعى ازيا تىنىق مۇحيت ەكونوميكالىق سەلبەستىك ۇيىمىنىڭ وتاعاسى ەلى جاڭا زەلانديانىڭ دارىپتەمەسىندە بەينە ەكران فورماسىندا اشىلدى، «ىندەت جاعدايىندا ازيا تىنىق مۇحيت ءوڭىرى ورايدى قالاي يگەرىپ، دەنساۋلىق ساقتاۋ داعدارىسىنا سەلبەسىپ توتەپ بەرىپ، ەكونوميكانىڭ قالپىنا كەلۋىن جەدەلدەتىپ، بولاشاق دامۋعا اناعۇرلىم جاقسى نەگىز قالايدى» دەگەن ءماجىلىستىڭ باستى تاقىرىبى بولدى.

 

 

 

    中央广播电视总台 央广网 版权所有

    شي جينپيڭ ازيا-تىنىق مۇحيت ەكونوميكالىق ماجىلىسىنە قاتىناستى

    شي جينپيڭ ازيا-تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ماجىلىسىنە قاتىناستى ءارى ءسوز سويلەدى