ەرسىننىڭ ەرشىمدى ەڭبەگى، «باۋىرساقتىڭ» بال ٴدامى

تاياۋدا ٴۇرىمجى قالاسىنىڭ تيانشان ۋانكى الاڭىندا جاڭادان اشىلعان باۋىرساق تاعامجايى كوپتەگەن تۇرعىنداردىڭ، اسىرەسە ىشكى ولكەدەن شينجياڭعا ساياحاتتاپ كەلگەن ادامداردىڭ مىندەتتى تۇردە باراتىن ورنىنا اينالدى.

باۋىرساق تاعامجايىنىڭ زاماناۋي اشەكەي ۇلگىسى مەن ٴتۇرلى ٴدامدى تاعامدارى، سونداي-اق، قاريدارلارعا دەگەن ىستىق ىقىلاستى قىزمەت وتەۋى ونىڭ اشىلا سالۋمەن ادامدار كوڭىلىنەن تەرەڭ ورىن الۋىنا سەبەپشى بولدى. باۋىرساق تاعامجايىنىڭ جاۋاپتىسى ەرسىن بۇيىمبەك ۇلى تانىستىرىپ بىلاي دەدى: «تاعامجايىمىزدىڭ اشىلعانىنا ۇزاق ۋاقىت بولمادى، كوپتەگەن جۇمىستار ٴالى دە كەمەلىنە كەلگەن جوق. دەسەدە قازىرگە دەيىن قاريدارلاردىڭ اياعى ۇزىلمەي كەلەدى، اۋەلى ىشكى ولكەلەردەن ارنايى تاعامجايىمىزعا ىزدەپ كەلگەندەر دە بولدى».

ٴىس جۇزىندە بۇل ەرسىننىڭ اشقان تۇڭعىش باۋىرساق تاعامجايى ەمەس-تى. ەرسىن قازاق ۇلتىنىڭ تاڭعى اس مادەنيەتىن ٴتىپتى دە كوپ ادامدارعا تانىتۋدى كوزدەپ، 2018-جىلى ٴۇرىمجى قالاسى تيانشان رايونىنىڭ فۋچۋان كوشە جولىندا تۇڭعىش باۋىرساق تاعامجايىن اشادى. ول: «بۇرىن ساۋدا بابىمەن ىشكى ولكەلەردە جۇرگەنىمدە اۋىلدىڭ ٴدامىن ساعىنۋشى ەدىم. بالا كەزىمنەن باۋىرساقتى ٴسۇيىپ جەيتىنمىن. سوندىقتان دا ۇرىمجىگە قايتىپ كەلگەنىمدە، ەڭ العاش ۇلتىمىزدىڭ تاڭعى اس مادەنيەتىن نەگىز ەتكەن تاعامجاي اشۋعا بەكىپ، ونىڭ اتىن <باۋىرساق> دەپ قويۋدى لايىق كوردىم»،-دەدى.

باۋىرساقتىڭ شاعىن تيجاراتى كۇن سايىن جاندانىپ، بيىل 6-ايدا تيانشان ۋانكى الاڭىنا ىرگە تەۋىپ، ساۋدا كولەمى ۇلعايا ٴتۇستى. بۇل بارىستا ەرسىن بۇيىمبەك ۇلى تاۋار ماركاسىن تىركەپ، تاعام تۇرلەرىن العاشقى تاڭعى اس تاعامدارىنان تۇسكى، كەشكى اس تاعامدارىنا دەيىن مولايتىپ، تاعامجايدى ٴداۋىر اعىمىنا ساي اشكەيلەپ، قاريدارلاردىڭ تالابىنان شىعۋعا بارىنشا ۇمتىلدى. 

كاسىپ جاراتۋ بارىسىندا ەرسىن كەزدەسكەن ماسەلەلەرگە دە ۇڭىلە ٴبىلدى، ايتالىق ادامدى قالاي ىستەتۋ، قالاي مامىلە جاساۋ، تاماقتى قالاي ۋاعىندا جەتكىزۋ دەگەندەردى زەردەلەدى. ەرسىن: «قيىنشىلىقتار بولعانىمەن قول ۇشىن بەرگەندەر كوپ بولدى. ۋانكى توبى بولسىن، الەۋمەتتىك اۋماقتاعى قىزمەتكەرلەر بولسىن، ٴبىزدى قولداپ-قۋاتتاپ كوپتەگەن كومەكتەر كورسەتتى»،-دەدى.

قيىنشىلىققا مويىمايتىن ەڭبەكشىل قاسيەتىنەن بولسا كەرەك، ەرسىن ٴوزى سياقتى كاسىپ جاراتپاقشى بولعان جاستاردى وزىنە باۋراپ، اعا-اپەكەلەرىنىڭ قارجى قوسۋىنا يە بولىپ، باۋىرساق تاعامجايىنىڭ يگى جۇمىستارىن ساتىمەن جۇرگىزۋدە. الدا ولاردىڭ بولىمشە تاعامجايى ىلە وبلىسى قۇلجا قالاسىنىڭ ليۋشيڭجيە كوشەسىندە اشىلماق. ەرسىننىڭ سەرىكتەسى ايدىن تۇرسىن ۇلى بىلاي دەدى: «ەرسىننىڭ قىزمەتكە دەگەن جاۋاپكەرشىلىگى، ٴارقانداي ٴبىر جۇمىستى تەرەڭىنەن ويلايتىن ەرەكشەلىگى ٴبىزدى وزىنە باۋراپ، باۋىرساق تاعامجايىنىڭ جۇمىستارىن ورتاق جۇرگىزۋگە جۇمىلدىردى. قازىرگە دەيىن كوپشىلىكتىڭ جاقسى باعاسىنا يە بولىپ كەلەمىز. ورتاق وي جانە ونى ىسكە اسىراتىن سەنىم بولعاندا تالاي بەلەستەردەن كورىنۋگە بولادى دەپ ويلايمىن».

جينجوۋ مەديتسينا ۋنيۆەرسيتەتى 1-جىلدىعىنىڭ وقۋشىسى مەرەۋەرت سولتان قىزى جازدىق دەمالىس ۋاقىتىنان پايدالانىپ، باۋىرساق تاعامجايىندا جۇمىسقا تۇرىپ، كاسىپ جاراتۋداعى امالي تاجىريبەلەردى ۇيرەندى. ول بىلاي دەدى: «باۋىرساق تاعامجايىندا ۇلتىمىز اس-سۋ مادەنيەتىن ەلگە قالاي تانىتۋ جونىندە، كاسىپ جاراتۋعا قاتىستى ناقتى تاجىريبەلەرگە يە بولدىم».

باۋىرساق تاعامجايىندا مەرۋەرت سياقتى جاستاردىڭ قاتارى جالپى قىزمەتكەرلەردىڭ 50 دە 60 پايىزىن ۇستايدى. ەرسىن بۇيىمبەك ۇلى ۇيرەنەمىن، ىستەيمىن دەگەن جاستاردى قارسى الىپ، قولىنان كەلگەنىنشە ولارعا كاسىپتەنۋ ورايىن جاراتىپ بەردى. ول جاستارعا ٴبىر كاسىپتى قىزىعىپ، ونى باسىنا جەتكەنشە تالپىنا ىستەپ، قيىنشىلىققا جولىققاندا تاباندىلىق پەن توزىمدىلىك كورسەتىپ، ىستەگەن جۇمىستاردى قورىتىندىلاي بىلگەندە تابىسقا جەتۋگە بولاتىندىعىن ايتادى.

来源：原创

记者：玛哈帕尔，美锐

微信制作：阿依娜