ۇكىمەت اقشاسىن يەمدەنىپ الىپ، 13 جىل جاسىرىن قاشىپ جۇرگەن قىلمىستىنى الاڭ ءبيىن بىرگە بيلەيتىن ساپتاسى اشكەرەلەپ، قولعا ءتۇستى

«تۇراقتاندىرۋعا ابدەن بولادى، بۇل ادام 13 جىلدىڭ الدىندا اقشا الىپ قاشىپ كەتكەن لي گۋوجىننىڭ ءوزى»! جۋىقتا داليان قالاسى شاحىكوۋ رايونى جۇڭشان باقشاسى الاڭىندا، كىسىلەر توبىنىڭ ىشىندە الاڭ ءبيىن بيلەپ جاتقان ورتا جاستارداعى ايەلدى حيلۇڭجياڭ ولكەسى داچيڭ قالالىق قاشقىنداردى قۋعىنداۋ ارناۋلى گرۋپپاسىنداعىلار تانىپ قويدى.

لي گۋوجىن، ايەل، 1965-جىلى 10-ايدا تۋعان، بۇرىن لينديان اۋداندىق مۇناي سەرىكتەستىگىنىڭ كاسسىرى بولعان. 2008-جىلى 2-ايدا، لي گۋوجىن ماي قۇيۋدان كەلگەن اقشانى ساقتاۋعا جاۋاپتى بولۋداي قىزمەت قولايلىلىعىنان پايدالانىپ، جالعاننان تالون جاساپ ۇكىمەت اقشاسىن يەمدەنىپ الادى ءارى اقشانى الىپ قاشىپ كەتەدى. دەلو تۋىلعاننان كەيىن لينديان اۋداندىق قوعام حاۋىپسىزدىگى مەكەمەسى قىزمەت مىندەتىنەن پايدالانىپ يەمدەنىپ الۋ قىلمىسىن وتكىزدى دەگەن كۇمانمەن لي گۋوجىندى دەلو تۇرعىزىپ تەكسەرەدى ءارى سول جىلى 3-ايدا وعان توراپتا قۋعىن سالادى. 2010-جىلى 7-ايدا، لي گۋوجىننىڭ قىزمەت مىندەتىنەن پايدالانىپ يەمدەنىپ الۋ دەلوسى لينديان اۋداندىق حالىق پروكۋراتۋراسىنا تاپسىرىلادى ءارى تاعى ءبىر رەت توراپتا قۋعىن سالىنادى. 2018-جىلى باقىلاۋ-تەكسەرۋ ءتۇزىلىسى رەفورماسى اتقارىلعان سوڭ، بۇل دەلو لينديان اۋداندىق ءتارتىپ تەكسەرۋ كوميتەتىنىڭ، باقىلاۋ-تەكسەرۋ كوميتەتىنىڭ ءبىر جاقتى ەتۋىنە تاپسىرىلادى.

«ءوزىمنىڭ مەكەمەنىڭ اقشاسىن قىمقىرىپ العانىمدى بىلەمىن، قاشىپ شىققاننان كەيىن جول بويى جاسىرىنۋمەن، بۇقپانتايلاۋمەن بولدىم. وتباسىمداعىلارمەن دە، دوس-جارانىممەن دە حابارلاسۋعا شاراسىز قالدىم. پويەزبەن داليانعا باردىم دا، ‹جاڭ جيە› دەگەن جالعان ازاماتتىق كۋالىكتى ىستەتىپ ءجۇردىم». لي گۋوجىننىڭ ايتۋىنشا، ول داليانعا بارعان سوڭ ءبىر اۆتوموبيل كلەتىن ساتىپ الىپتى. مۇنىڭ جارتىسىندا ءوزى تۇرىپتى دا، جارتىسىن باسقالارعا مايعا بەرىپتى. جايشىلىقتا ۇساق-تۇيەك جۇمىس ىستەپ تاپقان ازىناۋلاق اقشاسىمەن كۇنەلتەدى ەكەن. ونىڭ تۇرمىستاعى بىردەن-ءبىر اۋەسى الاڭ ءبيىن بيلەۋ بولعان. «سول كەزدەگى مەزەتتىك نىساپسىزدىق ومىرلىك وكىنىش ارقالاتتى عوي، ءومىر بويى قاسىرەت شەگۋمەن كەلەمىن»،ـ دەدى ول.

حيلۇڭجياڭ گازەتىنىڭ حابارىنا قاراعاندا، وسى رەت لي گۋوجىن دالياندا تۇراتىن ءبىر اق كوڭىل بۇقارا اشكەرەلەۋ دەرەگىمەن قامداعاندىقتان قولعا تۇسكەن ەكەن. بۇل كىسى قاشقىنداردى قۋعىنداۋ ارناۋلى گرۋپپاسىنداعىلارعا: «سيلىق اتاپ قۋعىنداۋ قۇلاقتاندىرۋىنداعى ادام مەنىمەن بىرگە الاڭ ءبيىن بيلەيتىن ءبىر ساپتاسىمىزعا توتەنشە ۇقسايدى»،ـ دەگەندى اڭىس ەتكەن. قازىر لينديان اۋداندىق ءتارتىپ تەكسەرۋ كوميتەتى، باقىلاۋ-تەكسەرۋ كوميتەتى لي گۋوجىنعا ۇستاپ قالۋ شاراسىن اتقاردى. بۇل دەلو ىشكەرىلەي تەكسەرىلۋ ۇستىندە.

ءىس جۇزىندە، لي گۋوجىننىڭ قاشىپ كەتكەنىنە توتەنشە ۇزاق ۋاقىت بولعاندىقتان ءارى ەشقانداي قۇندى دەرەك قالدىرماعاندىقتان، ونىڭ ۇستىنە ول لينديان اۋداندىق مۇناي سەرىكتەستىگىندە قىزمەت ىستەگەن كەزدەگى نەگىزگى باسشىسى الدەقاشان قايتىس بولىپ كەتكەندىكتەن، قۋعىنداۋ قىزمەتىنىڭ قيىندىعىن ونان ارى ارتتىرا تۇسكەن بولاتىن.

«لي گۋوجىن قاشىپ كەتۋدىڭ الدىندا عانا اكەسى قايتىس بولعان، بۇل وعان اۋىر سوققى بولىپ ءتيدى. ونىڭ ۇستىنە جۇبايىمەن اراداعى سۇيىسپەنشىلىككە دە سىزات تۇسكەن سوڭ، مۇنداي تىرلىكتىڭ ەش ماعىناسى جوق دەگەن ويعا كەلىپ، كەرباقپالىققا سالىنۋدان تەرىس جولعا ءتۇسىپ كەتتى». وسى دەلونى ىستەگەن قىزمەتكەردىڭ تانىستىرۋىنا قاراعاندا، لي گۋوجىن قاشىپ كەتۋدەن ىلگەرى تولىق ورتانىڭ 3-جىلدىعىندا وقىپ جاتقان قىزىن ءبىر تۋىسىنىڭ قارايلاسا جۇرۋىنە تاپسىرعان. وسىدان كەيىن وتباسىنداعىلارمەن جانە بارلىق قوعامدىق قارىم-قاتىناسىمەن ات كەكىلىن كەسىسكەن.

دەلوداعى قيىن تۇيىندەردى شەشۋ ءۇشىن، قۋعىنداۋ ارناۋلى گرۋپپاسى ارحيۆ اقتارۋدان باستاپ ىسكە كىرىسىپ، نوپوس داپتەرىنىڭ تۇبىرشىگىنە سارالاۋ جۇر‍گىزۋ، قاتىستى ەستەلىكتەردى تاۋىپ شىعۋ قاتارلى تاسىلدەر ارقىلى لي گۋوجىننىڭ ءجۇرىس-تۇرىسىنا تۇجىرىم جاسادى. بىرنەشە اي ىشىندە، قاشقىنداردى قۋعىنداۋ ارناۋلى گرۋپپاسى ىلگەرىندى-كەيىندى بولىپ بەيجيڭ، تيانجين، حىبەي، لياۋنيڭ قاتارلى 24 ولكە مەن توتە قاراستى قالاعا بارىپ، مەديالاردان پايدالانا وتىرىپ سيلىق اتاپ قۋعىن سالۋ قۇلاقتاندىرۋىن كەڭ كولەمدە جاريالاپ، بۇقارانى تولىق اتتانىسقا كەلتىردى ءارى بۇقاراعا سۇيەندى.

بيىل 4-ايدا، 5-ايدا جانە 9-ايدا، داچيڭ قالالىق قوعام حاۋىپسىزدىگى مەكەمەسى لي گۋوجىنعا 3 رەت سيلىق اتاپ قۋعىن سالۋ قۇلاقتاندىرۋىن جاريالاعان بولاتىن، سيلىق سوماسى اۋەلگى 50 مىڭ يۋاننان 100 مىڭ يۋانعا جوعارىلاتىلىپ، كەيىن 200 مىڭ يۋانعا جەتكىزىلگەن ەدى.

اۋدارعان: نۇرگۇل قۇمارقان قىزى

来源：人民日报

翻译 : 努尔古丽

微信制作：古丽美热