حابار-وشارسىز كەتكەن 13 ادام تۇگەل امان تابىلدى

ورتالىق تەلەۆيزيا ءتىلشىسىنىڭ الدىڭعى شەپتەگى قۇتقارۋ قىزمەتكەرلەرىنەن ۇعىسۋىنا قاراعاندا، 5-ايدىڭ 15-كۇنى تاڭەرتەڭ ساعات 8:50 وتكەندە، قۇتقارۋ قىزمەتكەرلەرى دەرەكسىز كەتكەندەردەن 7 ادامدى تاۋىپ العان، قازىر ولاردىڭ دەنساۋلىق جاعدايى جاقسى بولىپ، تاۋدان تۇسۋدە ەكەن. تانىستىرۋعا قاراعاندا، كەشە (14-كۇنى) قۇتقارۋشىلار تاۋىپ الىپ تاۋدان الىپ تۇسكەن 7 ادامنىڭ ىشىندەگى بىرەۋى سول كۇنى تاۋداعىلارعا ازىق-تۇلىك، كەرەك-جاراق تاسىمالداۋعا كومەكتەسكەلى كەتىپ بارا جاتقان ادام بولىپ، جولشىباي ىزدەۋ-قۇتقارۋ قىزمەتكەرلەرىنە جولىعىپ، سولاردىڭ ناسيحاتتاۋىمەن كەرى قايتقان. 

5-ايدىڭ 14-كۇنى، يۇننان ولكەسىنىڭ دالي وبلىسى، قۇتقارۋ قىزمەتكەرلەرى ساڭشان تاۋىندا قۇتقارۋ قىزمەتىن جۇرگىزۋدە. سۋرەتتى جۇڭگو اقپارات اگەنتتىگىنىڭ ءتىلشىسى لي جياشان تارتقان.

ىزدەۋ-قۇتقارۋ ىسىنە 490 ادام ات سالىستى، دالي وبلىسى ساڭشان تاۋىندا حابار-وشارسىز كەتكەن 13 ادام امان-ەسەن تابىلدى

يۇننان ولكەسى دالي وبلىسى ياڭبي يزۋ اۆتونوميالى اۋداندىق حالىق ۇكىمەتىنىڭ اقپارات كەڭسەسى 5-ايدىڭ 15-كۇنى حابارلاندىرۋ جاريالاپ بىلاي دەدى: ولكە، وبلىس، اۆتونوميالى اۋدان قاتارلى 3 دارەجەلى ورىنداعى قوعام حاۋىپسىزدىگى، شۇعىل جاعدايعا توتەپ بەرۋ، ورمان شارۋاشىلىعى جانە جايىلىم، ورمان-توعايدى ورتتەن ساقتاۋ، ءورت ءسوندىرۋ، ورتتەن ساقتانۋ قاتارلى تاراۋلاردان كەلگەن 490 كاسىپتىك قىزمەتكەر، 12 قۇتقارۋشى ءيت، 8 ۇشقىشسىز ۇشاقتىڭ بار كۇشپەن ىزدەۋ-قۇتقارۋىنىڭ ارقاسىندا، 5-ايدىڭ 15-كۇنى 8:50 وتكەنگە دەيىن، 5-ايدىڭ 12-كۇنى ساڭشان تاۋى ىرحاي مەملەكەت دارەجەلى جاراتىلىستىق قورىق رايونىنا كىرگەن سوڭ حابار-وشارسىز كەتكەن 13 ادام تۇگەل امان تابىلدى، ءولىم-ءجىتىم احۋالى بولمادى.

ورتالىق تەلەۆيزياسىنىڭ حابارىنا قاراعاندا، جوعارىدا اتالعان 13 ادام يۇننان ولكەسى ياڭبي اۋدانى پيڭپو قالاشىعى پيڭپو قىستاعى شاڭباتيان كەزەكشىلىك تەكسەرۋ تۇيىنەن اينالىپ ءوتىپ، دالي وبلىىسىنداعى ساڭشان تاۋىنا ءوز بەتتەرىمەن كىرگەن سوڭ، حابار-بايلانىستارى ءۇزىلىپ ءىز-دەرەكسىز كەتىپ، جۇرت نازارىن جاپپاي اۋدارعان بولاتىن. ۇعىسۋعا قاراعاندا، بۇل ادامداردىڭ التاۋى جەرگىلىكتى جول باستاۋشى، ەكەۋى داليدەگى لانتيان قۇتقارۋ اترەتىنىڭ مۇشەلەرى ەكەن، ال، قالعان بەس ادام سىرت جەردەن كەلگەندەر.

اۋدارعان: نۇرگۇل قۇمارقان قىزى

来源：中国新闻网

编辑、制作：古丽美热