ناشار كوڭىل كۇيدەن ايىعۋدىڭ 7 ءتۇرلى ءتاسىلى

تۇرمىسىم شۋاققا تولى بولسىن دەسەڭ، كوڭىل بۇلتىن ارەكەتىڭمەن ايىقتىرۋدى ۇيرەنىپ ال. كوپشىلىككە ءبىرقانشا شاعىن امال تانىستىرامىز، كوڭىلسىزدىكتەن اۋلاق بولىپ، شات-شادىمان جۇرۋىڭە كومەگى تيسە ەكەن دەگەن ۇمىتتەمىز. 

1.قىزمەت پەن دەمالىس ءتارتىپتى بولسىن

كوپ جاعدايلاردا، ادامداردىڭ قاراداي شارشاپ، ەڭسەسى ءتۇسىپ جۇرەتىن سەبەبى، كۇن مەن ءتۇننىڭ ورنىن اۋىستىرىپ، قىزمەت پەن دەمالىستى تارتىپكە تۇسىرە الماۋىنان بولادى. ۇيقىنى قاندىرىپ ءجۇرۋ ساۋ دەنەلى بولۋدىڭ، شات-شادىمان ءجۇرۋدىڭ العى شارتى. كۇندىز قانشا شارشاپ جۇرسەڭدە، تۇندە ۋاعىمەن ۇيىقتايتىن بولساڭ، ەرتەسى جىگەرلى جۇرەسىڭ. قىزمەت پەن دەمالىس ءتارتىپتى بولعان سايىن، تۇرمىستا ءتارتىپتى ارناعا تۇسەدى، ادام قانشا سەرگەك بولعان سايىن، سولعۇرلىم شات-شادىمان جۇرەدى.

2. كۇلىمسىرەپ جۇرەتىن بول

كۇلىمسىرەۋ ءبىر ءتۇرلى ميميكا عانا بولعانمەن، كەيدە ونىڭ قۇدىرەتى سوزدەندە كۇشتى بولادى. سەنىڭ كۇلكىڭ باسقالاردى اسەرلەندىرىپ قالماستان، ٴوزىڭدى دە ەمدەيتىن بولادى. دۇنيەنى كۇلىمسىرەۋ ارقىلى وزگەرت، استە دۇنيە سەنىڭ كۇلكىڭدى مەڭگەرىپ الماسىن. قيىندىققا كۇلە قاراي ءبىل، قيىن ماسەلەنى كۇلە ءجۇرىپ شەش، كۇلىپ جۇرەتىن ادامنىڭ تالەيى تىم ناشار بولمايدى.

3.ءۇيدىڭ ءىشىن جيناستىرا ءبىلۋ

مىنانى بايقادىما ەكەنسىڭ،ءۇيىڭنىڭ بەينەسى قۇددى تۇرمىسىڭنىڭ بەينەسى سپەتتى.ءۇيدى جيناستىرۋ بارىسى كۇردەلىلىكتەن قاراپايىمدىلىققا ءوتۋ بارىسى بولۋمەن بىرگە، ىشكى دۇنيەنىڭ جۇگىن جەڭىلدەتۋ بارىسى ەسەپتەلەدى. قازىردان باستاپ، قاربالاسپىن دەپ تۇرمىسقا پەيىلسىز بولما.ءۇيدى ءار ۋاقىت تازالاپ تۇرۋعا داعدىلان، تازا دا رەتتى ورتا ساعان شات-شادىمان كوڭىل كۇي سيلايتىن بولادى.

4.ءوزىڭدى كوڭىلدەندىرە ءبىل

ەرەسەك ادامداردىڭ تۇرمىستا شارشاپ-شالدىعىپ جۇرەتىنى شىندىق، الايدا دەنەدەن شارشاۋعا قاراعاندا كوڭىلدەن شارشاۋ اناعۇرلىم قورقىنىشتى بولادى. تۇرمىستىڭ قيىندىعىن ايتىپ كۇرسىنە بەرگەننەن كورى، تۇرمىستى كوڭىلدى وتكىزۋگە قۇلشىنعان ءجون. جاقسى كورەتىن ءانىڭدى تىڭدا، ءسۇيىپ جەيتىن تاماعىڭدى ءىش، نە بولماسا ورايى كەلمەي جۇرگەن ساياحاتقا اتتانىپ كەت. سونان سوڭ وزىڭە بۇگىنگى كۇنىم دە شات-شادىمان ءوتتى عوي دەپ ايت.

5. ىشكى دۇنيەڭدى بايىتىپ وتىر

اۋەستىكتەن ايىرىلىپ قالعان ادام رۋحي جاقتان جۇداپ، جان دۇنيەسى قۇلازىپ قالادى. سوندىقتان، قاي كەزدەدە بولسىن ءوزىمىزدى رۋحاني ازىقپەن قامداپ وتىرۋىمىز كەرەك. ۋاقىت شىققاندا ۇيرەنۋ، قول بوساي قالعاندا كىتاپ وقۋ كەرەك، سوندا عانا جان دۇنيەمىز ارلەنىپ، كۇيبىڭى كوپ تۇرمىسقا رومانتيكالى بوياۋ بەرە الامىز. اۋەسىڭ بولسا عانا، دۇنيە قىزىقتى سەزىلەدى، ءلاززات الا بىلسەڭ، دۇنيە سوندا عانا سىرلى سەزىلەدى.

6. وڭ ەنەرگيالى ءسوز سويلەۋ كەرەك

كوپ ادامدار كوڭىل كۇيى جاقسى بولماعان كەزدە،ءوزىن تەرىستەيتىن سوزدەردى ايتۋعا ادەتتەنگەن، بۇل وز-وزىنە تەرىس جاقتان پسيحيكالىق يشارات جاساعانمەن تەڭ بولادى. ۋاقىت ۇزارا كەلە، كوڭىل كۇي بارعان سايىن كەرەناۋ، ۋايىمشىل بولىپ وزگەرەدى. جاقسى لەپەس جارىم ىرىس، ءسوز سۇيەكتەن وتەدى. ۇنامدى سوز-سويلەمدەردى كوبىرەك پايدالانىپ، وڭ ەنەرگيالى سوزدەردى كوبىرەك سويلەۋ كەرەك، سوندا عانا وزىڭە سەنىمىڭ ارتادى، باسقالارعا مەيىر سيلاي الاسىڭ.

7. كوڭىلسىز ىستەردى كاپەرگە الماۋ كەرەك

كوپتەگەن كوڭىلسىزدىكتەر كوپ ويلاي بەرۋدەن تۋىندايدى. شىنتۋايتىندا، كوڭىلدى كەڭگە سالا بىلسەك، باياۋ جىلجىپ جاتقان ومىردە، وز-وزىمىزگە قول ۇشىن بەرۋدى ۇيرەنىپ الۋىمىز كەرەكتىگىن اڭعاراتىن بولامىز. پالەندەي ماڭىزى جوق ادام مەن ىسكە بولا باس قاتىرىپ ازاپتانعانشا، كاپەرگە الماي، ميدان ءوشىرىپ جىبەرگەب ءجون. ۇمىتۋعا ءتيىستىنى ۇمىتىپ، قيۋعا ءتيىستىنى قيۋ كەرەك. بۇگىنگى كوڭىلسىزدىك وسى جەردە اياقتاسىن، ەرتەڭ شىت-جاڭا ءومىر باستالادى.

اۋدارعان: جەڭىس جىكباس ۇلى

来源：人民日报

翻译：金额斯

编辑、制作：阿依娜