500 جىلدان بەرگى ەڭ اۋىر قۋاڭشىلىق ءجۇز بەردى، يتالياداعى ەڭ ۇزىن وزەننىڭ سۋى دەرلىك تارتىلىپ قالىپ، «شۇعىل كۇيگە» قادام تاستادى

بيىلعى جاز ماۋسىمىندا، تاريحي رەكورد جاراتقان جوعارى تەمپەراتۋرالى اۋا رايى ەۆروپانى شارپىدى. ەۆروپانىڭ باتىس بولەگى مەن ورتا وڭتۇستىك رايوندارىندا ەكى ايعا جۋىق ۋاقىتتان بەرى كورنەكتى جاۋىن-شاشىن بولمادى. اۋا رايى ماماندارىنىڭ مەجەلەۋىنشە، جاۋىن-شاشىن مولشەرى از بولاتىن، ءتىپتى جاۋىن-شاشىن جاۋمايتىن جاعداي ءالى دە ءبىر مەزگىل جالعاسادى ەكەن. 

فرانسيادا قۋاڭشىلىق اۋىر بولىپ، بورگۇندي وزەنى دەرلىك تارتىلىپ قالدى

فرانسيانىڭ بورگۇندي رايونىندا، جەرگىلىكتى ورىنداعى كوپتەگەن وزەن سۋى ءۇرتىس قۋاڭشىلىق سەبەبىنەن دەرلىك تارتىلىپ قالىپ، جەرگىلىكتى اۋىل شارۋاشىلىق وندىرىسىنە اۋىر ىقپال جاسادى. 

ەۆروپاداعى باسقا كوپتەگەن ەل سياقتى فرانسيا دا تاريحتا بولىپ كورمەگەن قۋاڭشىلىق اپاتىنا تاپ بولدى، مۇنداي قۋاڭشىلىق اپاتى فرانسيانىڭ شەشۋشى ەكونوميكالىق سالاسىنا، اسىرەسە، اۋىل شارۋاشىلىق وندىرىسىنە توتەنشە اۋىر ىقپال جاسادى. 

فرانسيانىڭ بورگۇندي اۋىل، قىستاق وڭىرىندەگى شاعىن قىستاق لەكس، لەكس قىستاعىنىڭ جانىنان اعىپ وتەتىن تيللەر وزەنى دەپ اتالاتىن ءبىر وزەن بار، قالىپتى جاعدايدا وزەن سۋىنىڭ كەڭدىگى 15 مەترگە دەيىن باراتىن. الايدا، قازىر بۇل وزەن ءۇرتىس قۋاڭشىلىق بولۋ سەبەبىنەن دەرلىك تارتىلىپ قالدى، سۋى تارتىلىپ قۇرعاپ قالعان وزەن ارناسىنان كەپكەن بالىق ولەكسەسىن كوپ كەزىكتىرۋگە بولادى. 

بورگۇندي پاريجدى كەسىپ وتەتىن سەنا وزەنىنىڭ قاينار كوزى، ادەتتە جاز ماۋسىمىنىڭ وسى مەزگىلىندە، بۇل ارا جاسىل جەلەك جامىلىپ تۇرۋشى ەدى. الايدا، بيىل بورگۇنديدا تاعى ءبىر ءتۇرلى كورىنىس جارىققا شىقتى، ياعني ءشوبى سارى تۇسكە ەنىپ، مال تۇلىگى تىلىمەن ءۇيىرىپ جەيتىن بالاۋسا ءشوپ بولماي قالدى، ديقاندار شاڭى شىققان اتىزدا ەڭبەك ىستەۋمەن ابىگەر بولۋدا، تراكتوردىڭ دوڭگەلەگىنەن شىققان شاڭ-توزاڭ اۋانى لاستاۋدا. فرانسيا مەملەكەتتىك اۋا رايى مەكەمەسىنىڭ مەجەلەۋىنشە، قازىرگى جاۋىن-شاشىنى از، قۇرعاق ىستىق بولعان اۋا رايى 10-ايدىڭ ورتا شەنىنە دەيىن جالعاسادى ەكەن.

فرانسيا بورگۇندي التىن ادىر جاستار ەگىس الاڭى يەگەرلەرى وداعىنىڭ ءتوراعاسى كورسون بىلاي دەدى: قازىر ەڭ الاڭدايتىنىمىز كۇنباعىس پەن جۇگەرى سياقتى ەگىس داقىلدارى ءوندىرىسى، ال جۇگەرى ساۋىن سيىردىڭ ەڭ باستى نەگىزدىك ازىعى. كورسوننىڭ مەجەلەۋىنشە، بيىل ولاردىڭ جۇگەرى ءونىمى از دەگەندە %30 كەمەيەدى، ونىڭ ۇستىنە ساپاسى دا ادامدى الاڭداتادى، كراحمال قۇرامى بۇرىنعى جىلدارعا مۇلدە جەتپەيدى ەكەن. كەزى كەلگەندە، ولار سىرتتان جۇگەرى ساتىپ الىپ، جەم مانەرلەۋگە ءماجبۇر بولۋى مۇمكىن، وندا وزىندىك قۇنى بارىنشا ارتادى دەگەن ءسوز. سونىمەن بىرگە، اۋا تەمپەراتۋراسى وتە جوعارى بولعانى ءۇشىن، سيىر ءسۇتىنىڭ سانى مەن ساپاسى دا تومەندەيدى ەكەن. 

تاياۋدا، «ولشەمدى پۋردىڭ» (اقشا اينالىمىنا تالداۋ جاسايتىن الەمگە ىقپالدى قۇرىلىم، باس شتابى ا ق ش-تىڭ نيۋ-يورك قالاسىندا — اۋدارۋشىدان) قاتىستى تاراۋلارى ەۆروپا وداعىنىڭ بيىلعى جۇگەرى جانە كۇنباعىس ءونىمىن زور مولشەردە تومەندەتتى. قاتىستى مالىمەتتەردىڭ مەجەلەۋىنشە، بيىل ەۆروپا وداعىنىڭ جۇگەرى ءونىمى بىلتىرعىدان 12 ميلليون 500 مىڭ توننا، كۇنباعىس ءونىمى ءبىر ميلليون 600 مىڭ توننا كەمەيەدى ەكەن. 

ءۇرتىس قۋاڭشىلىق بولۋ سەبەبىنەن، يتالياداعى ەڭ ۇزىن وزەن — پو وزەنى دەرلىك تارتىلىپ قالدى

ءۇرتىس قۋاڭشىلىق بولۋ سالدارىنان يتالياداعى ەڭ ۇزىن وزەن — پو وزەنىنىڭ سۋ دەڭگەيى 70 جىلدان بەرگى ەڭ تومەنگى دەڭگەيگە ءتۇستى. كەيبىر ماماندار بىلاي دەدى: پو وزەنىنىڭ قازىرگى جاعدايىنان الىپ قاراعاندا، ەۆروپانىڭ ءىشىنارا رايوندارىندا بيىلعى قۋاڭشىلىق 500 جىلدان بەرگى ەڭ اۋىر قۋاڭشىلىق بولۋى ابدەن مۇمكىن. 

ادەتتە، ءار جىلدىڭ وسى مەزگىلىندە، يتالياداعى ەڭ ۇزىن وزەن — پو وزەنىنىڭ جاعاسىنا ادام تولىپ، كوپتەگەن ساياحاتشى مەن جەرگىلىكتى تۇرعىن جازدا وسى اراعا كەلىپ ىستىقتان تاسالانىپ، سالقىنداتىپ، ساياحات كەمەسىنىڭ ۇستىندە وتىرىپ ءتۇرلى ءدامدى عۇجىردان ءدام تاتاتىن.

الايدا، بيىلعى سيرەك كەزدەسەتىن جوعارى تەمپەراتۋرالى اۋا رايى كۇنى بۇرىن جەتىپ، ونىڭ ۇستىنە جاۋىن-شاشىن كورنەكتى ازايىپ، پو وزەنىنىڭ سۋ دەڭگەيى 70 جىلدان بەرگى ەڭ تومەنگى دەڭگەيگە ءتۇسىپ، وزەن الابىنداعى كوپتەگەن وزەن ارناسى قۇرعاپ، تەڭىزگە قۇيار اۋىزداعى تەڭىز سۋى كەرى قايتتى. ءبىر ءبولىم وزەن ارناسىندا، ادامدار ءتىپتى تاياز وزەن سۋىن كەشىپ جۇرە بەرەدى، ءبىراق مالتاي المايدى نەمەسە قايىقپەن جۇزە المايدى.

يتالياداعى ەڭ ۇزىن وزەن بولعان پو وزەنىنىڭ جالپى ۇزىندىعى 650 كيلومەتردەن اسادى، باتىستان شىعىسقا قاراي يتاليانىڭ سولتۇستىك ءوڭىرىن ەندەي وتەدى، وزەن الابىندا تارماق اعار، كول كوپ بولعانى ءۇشىن، اۋىل شارۋاشىلىق ءوندىرىسى ەرەن دامىعان ءوڭىر ەسەپتەلەدى. 

الايدا، 7-ايدان بەرى يتاليا ۇكىمەتى پو وزەنىنىڭ جاعالاۋىنداعى رايونداردىڭ ءۇرتىس قۋاڭشىلىق بولۋ سەبەبىنەن شۇعىل كۇيگە وتكەندىگىن جاريالادى، ال پو وزەنىنىڭ جاعالاۋىنداعى ءوڭىر بۇكىل يتاليا اۋىل شارۋاشىلىق ءونىم مولشەرىنىڭ ۇشتەن بىرىنەن استامىن ۇستايدى. 

تاياۋ مەزگىلدە، ەۆروپاداعى قۋاڭشىلىقتى باقىلاۋ توراپ بەكەتىنىڭ ەڭ جاڭا ساندى مالىمەتىندە كورسەتىلۋىنشە، 7-ايدىڭ 21-كۇنىنەن 30-كۇنىنە دەيىنگى 10 كۇندە ەۆروپاداعى %47 رايون قۋاڭشىلىق «ەسكەرتۋى» كۇيىنە وتكەن. ال ۇقساس ۋاقىت ىشىندە ەۆروپاداعى %17 رايون ەڭ اۋىر قۋاڭشىلىق «ساقتىق» كۇيىنە وتكەن، بۇل قالىپتى جاۋىن-شاشىننىڭ توپىراقتىڭ قۇرعاپ قالۋ جاعدايىن باسەڭدەتە المايتىندىعىنان، وسىمدىك پەن ەگىس داقىلدارىنىڭ ءوسۋى دە اۋىر ىقپالعا ۇشىراعاندىعىنان دەرەك بەرەدى. ال اۋا رايى تاراۋلارىنىڭ مەجەلەۋىنشە، وسى ايدا ەۆروپاداعى كوپتەگەن ەلدىڭ قۋاڭشىلىق جاعدايى اناعۇرلىم اسقىنا تۇسەدى ەكەن.

اۋدارعان: ساعىنبەك رابات ۇلى

来源： 中国经济网

微信制作：阿依娜