ٴوز ٴتىلشىمىز ماقپال كوممۋنيسقان قىزى ۇرىمجىدەن حابارلاريدى: 3-ايدىڭ 15-كۇنى __ 41-رەتكى «15-ناۋرىز» حالىقارالىق تۇتىنۋشىلاردىڭ ۇقىق-مۇددەسىن قورعاۋ كۇنى. شينجياڭ ۇيعۇر اۆتونوميالى رايوندىق بازاردى باقىلاۋ-باسقارۋ مەكەمەسى ٴۇرىمجى قالالىق بازاردى باقىلاۋ-باسقارۋ مەكەمەسى قاتارلى ورىندارمەن بىرلەسىپ، ٴۇرىمجى قالاسىنىڭ مەي-مەي ساۋدا ورتالىعىندا شينجياڭ ۇيعۇر اۆتونوميالى رايونى جانە ٴۇرىمجى قالاسىنىڭ تۇتىنۋ سەنىمىن سەرپىلتۋ «15-ناۋرىز» تۇتىنۋشىلاردىڭ ۇقىق-مۇددەسىن قورعاۋ جينالىسىن وتكىزدى. 

2023 تۇتىنۋشىلاردىڭ ۇقىق-مۇددەسىن قورعاۋ جىلىنىڭ باستى تاقىرىبى «تۇتىنۋ سەنىمىن سەرپىلتۋ». وسى نەگىزدە شينجياڭ ۇيعۇر اۆتونوميالى رايوندىق بازاردى باقىلاۋ-باسقارۋ مەكەمەسى 2023-جىلعى تۇتىنۋشىلاردىڭ ۇقىق-مۇددەسىن قورعاۋ قىزمەتىندەگى ٴتۇيىندى مازمۇنداردى تۇراقتاندىردى. اۆتونوميالى رايوندىق بازاردى باقىلاۋ-باسقارۋ مەكەمەسى توراپ ساۋداسىن باقىلاۋ-باسقارۋ ٴبولىمىنىڭ قىزمەتكەرى مارال باعدال قىزى تانىستىرىپ بىلاي دەدى: بيىلعى ٴتۇيىندى قىزمەتتەرىمىزدىڭ ٴبىرى، الاڭسىز تۇتىنۋ جونىندە ۋادە بەرۋ جانە جەلىدەن تىس ساتىپ الىنعان تاۋارلاردى سەبەپسىز قايتارۋ قىزمەتىن جالعاستى جالپىلاستىرۋ؛ جەلىدەن تىس ساتىپ الىنعان تاۋارلاردى سەبەپسىز قايتارۋ قىزمەتى 2021-جىلى ىسكە قوسىلعان، قازىرگە دەيىن تۇتاس رايونىمىزدا ساۋدا ورتالىعى، كاسىپورىن جانە ساۋدا دۇكەنىنەن جيىنى 1037 ورىن ۋادە بەرۋشى ورىن بولىپ بەكىتىلىپ، جالپى قۇنى 65 ميلليون يۋاننان اساتىن 21.5 مىڭ دانا تاۋار قايتارىلدى. ەكىنشىدەن، شينجياڭ تۇتىنۋ ارىز-شاعىمى ينفورماتسيالارىن اشىق جاريالاۋ تورابى ىسكە قوسىلدى، بۇعان قاتىستى ينفورماتسيالاردى توراپقا شىعىپ كورۋگە بولادى.

«15-ناۋرىز» كۇنى بايلانىسىمەن شينجياڭداعى بازاردى باقىلاۋ-باسقارۋ تاراۋلارى قوعام حاۋىپسىزدىگى قاتارلى تاراۋلارمەن بىرلەسىپ ۇقىققا قول سۇققان، جالعان، جارامسىز تاۋارلاردى شوعىرلى ورتەۋ قيمىلىن ورىستەتتى. مۇندا شينجياڭداعى 42 شوعىرلى ورتەۋ ورنىندا ٴدارى-دارمەك، اجارلاندىرۋ بۇيىمدارى، كيىم-كەشەك، اراق-تەمەكى سىندى 19 توپتاعى 70 نەشە تۇرلىدەن اساتىن جالعان، جارامسىز تاۋارلار ٴبىر جاقتى ەتىلىپ، جالپى تاۋار سوماسى 4 ميلليون يۋاننان استى.

بۇدان تىس، جينالىستا شينجياڭ ۇيعۇر اۆتونوميالى رايوندىق تۇتىنۋشىلاردىڭ ۇقىق-مۇددەسىن قورعاۋ كوميتەتى تۇتىنۋ ۇقىعىن قورعاۋ قىزمەت پۋنكىتىنە ماڭدايشالىق بەرۋ قيمىلىن وتكىزىپ، اۆتونوميالى رايوندىق قامسىزداندىرۋ كاسىبى قوعامى، جەدەل جەتكىزۋ كاسىبى قوعامى، بەيجيڭ داچىڭ ادۆوكاتتىق ىستەر باسقارماسى قاتارلى تۇڭعىش توپتاعى 7 ورىنعا ماڭدايشالىق بەردى.

ۇعىسۋعا قاراعاندا، 2022-جىلى شينجياڭداعى قاتىستى ورىندار تۇتىنۋشىلاردىڭ ۇقىق-مۇددەسىن قورعاۋ قىزمەتىن بارىنشا كۇشەيتىپ، 12315 شاعىم ايتۋ، مالىمدەۋ ارناسىن ىركىلىسسىزدەندىرىپ، جيىنى 123 مىڭ 800 دانا ارىز-شاعىم قابىلداپ، ونى ٴبىر جاقتى ەتىپ، تۇتىنۋشىلاردىڭ 71 ميلليون يۋاننان استام ەكونوميكالىق زيانىن قايتارىپ العان.

来源：中央广播电视总台

记者：玛哈帕尔

微信制作：古丽美热