9-ايدىڭ 11-كۇنى، توراپتا تارالعان ءبىر بەينە باياندا گۋاڭدۇڭ ولكەسى ماۋميڭ قالاسى پىڭسۇنتاڭ كولىنىڭ ماڭىنداعى، ءمالىم ءبىر تىمساق باعىمشىلىق الاڭىنىڭ 70 تەن استام تىمساعى قاشىپ كەتتى دەلىنگەن. 

سۋرەتتە: توراپتا تاراعان بەينە باياننىڭ قيما سۋرەتى

بەينە باياندا كورسەتىلۋىنشە، تاسقىن سۋ جول بەتىنە شىعىپ، جول كورسەتكىش تاقتادان الدىڭعى جاق ماۋميڭ باعىتى ەكەنى كورىنىپ تۇر، سۋ ىشىنەن بىرنەشە قىزىل شەڭبەر شىققان. بەينە بايانعا كىرىستىرىلگەن جازۋدا بىلاي دەلىنگەن: پىڭسۇنتاڭ كولى اينالما جولىنىڭ جانىندا تىمساق پايدا بولىپتى، بۇل جاقىن ماڭداعى باعىمشىلىق الاڭىنان قاشىپ شىققان تىمساق بولۋى مۇمكىن، قىستاق تۇرعىندارى ۋاكىلى سول ماڭداعى قىستاق تۇرعىندارىنا سۋ ايدىنىنان اۋلاق بولىپ، سۋعا ءتۇسىپ بالىق اۋلاۋعا تيىم سالىنعانىن، ەرەكشە جاعداي بولعاندا دەر كەزىندە مالىمدەۋدى وتىنگەن حابارىن تاپسىرىپ الدىق. 

ءبىر ءبولىم تىمساقتى ۇستاپ الدى

9-ايدىڭ 12-كۇنى تۇستەن بۇرىن، ماۋميڭ قالالىق شۇعىل جاعدايعا توتەپ بەرۋدى باسقارۋ مەكەمەسى كەزەكشىلىك كەڭسەسىنىڭ ءبىر قىزمەتكەرى تىلشىگە بىلاي دەدى: قازىر ءبىر ءبولىم تىمساقتى ۇستاپ الدىق، قالعاندارىن جالعاستى ۇستاۋ ۇستىندەمىز. وسى ەكى كۇندە، جەرگىلىكتى ورىننىڭ شۇعىل جاعدايعا توتەپ بەرۋدى باسقارۋ مەكەمەسى، ءورت ءسوندىرۋ، ورتتەن ساقتانۋ، قوعام حاۋىپسىزدىگى جانە قالاشىق ۇكىمەتى قاتارلى تاراۋلار تىمساق ۇستاۋعا قاتىناستى، قازىرگە دەيىن تىمساق كىسى زاقىمدادى دەگەن سياقتى مالىمەتتى تاپسىرىپ المادىق.

بۇل قىزمەتكەر بىلاي دەدى: 9-ايدىڭ 11-كۇنى جاۋىن-شاشىن ءبىرشاما مول، سۋ اعىسى كۇشتى بولىپ، تىمساق ۇستاۋ قيىنعا ءتۇستى. 9-ايدىڭ 12-كۇنى جاڭبىر توقتادى، جينالعان سۋ دا بىرتىندەپ قايتتى، جەرگىلىكتى ورىن ادام كۇشى مەن زاتتىق كۇشتى تىمساق ۇستاۋعا شوعىرلاندىردى. كەيىنگى تىمساق ۇستاۋ جاعدايىنا توقتالعاندا، ول ۇكىمەت جاقتىڭ حابارلاندىرۋىنا نازار اۋدارۋ كەرەكتىگىن ايتتى.

جەرگىلىكتى ورىن ماڭىنداعى تۇرعىنداردىڭ مۇمكىندىكتىڭ بارىنشا سىرتقا شىقپاۋىن ۇسىنىس ەتتى

9-ايدىڭ 11-كۇنى، ءتىلشىنىڭ ماۋنان رايوندىق شۇعىل جاعدايعا توتەپ بەرۋدى باسقارۋ مەكەمەسىنەن ۇعىسۋىنشا، جاقىن ماڭداعى تۇرعىندارعا حاۋىپسىزدىككە كوڭىل ءبولۋدى، سىرتقا شىقپاۋدى ەسكەرتكەن. ءبىر قىزمەتكەر تىلشىگە بىلاي دەدى: قازىر تىمساقتى تىزگىندەۋ ۇستىندەمىز، ءبىراق قاشىپ شىققان تىمساقتىڭ سانى ءبىرشاما كوپ. ساناققا قاراعاندا، قاشىپ كەتكەن تىمساق اراسىندا ەرەسەك تىمساقتان 69 ى، جاس تىمساقتان 6 سى بار ەكەن، ولار قازىر تۇگەلدەي پىڭسۇنتاڭ كولىندە. كەزەكتە ماۋنان رايونى، شۇعىل جاعدايعا توتەپ بەرۋ باسقارۋ مەكەمەسى، قوعام حاۋىپسىزدىگى جانە ءورت ءسوندىرۋ، ورتتەن ساقتانۋ تاراۋلارىنىڭ باسشىلارى ناق مايداندى ءبىر جاقتى ەتۋدە.

جەرگىلىكتى ورىن دىبىس تارتۋ جابدىعىمەن قاشىپ كەتكەن تىمساقتى ءتىنتىپ ۇستاۋعا كىرىسىپ، بىرنەشە تىمساقتى ۇستاپ الدى، ءبىراق سۋ تەرەڭ بولعاندىقتان تىمساق ۇستاۋ ءبىرشاما قيىنعا ءتۇسىپ وتىر، بۇل مەكەمە توڭىرەكتەگى تۇرعىندارعا مۇمكىندىكتىڭ بارىنشا سىرتقا شىقپاۋدى ۇسىنىس ەتتى.

اعىپ شىققان تىمساق اتىپ تاستالادى

ءتىلشى پىڭسۇن ماڭىنداعى قىستاق تۇرعىندارىنىڭ نۇسقاۋىمەن جاڭجيۋپو قىستاق تۇرعىندار كوميتەتىنىڭ سولتۇستىك جيەلو قىستاعىنا بارعاندا، ەگىس اتىزدارىن سۋ باسىپ كەتكەنىن، توڭىرەگىندەگى سۋعا شىلانعان جەرلەرگە ساقتىق سىزىعى ورناتىلعانىن كوردى. ءتىلشى تاعى وسى وڭىردە كوپتەگەن باعىمشىلىق الاڭى جانە گۋاڭدۇڭ ولكەسىنىڭ ءتۇيىندى باستاماشى كاسىپورىندارى بار ەكەنىن كوردى. 

ءبىر قىستاق تۇرعىنى تىلشىگە بىلاي دەدى: مەن وسىدان بۇرىن جاقىن ماڭداعى باعىمشىلىق الاڭىنان تىمساقتى كورگەن ەدىم، سالماعى كەمىندە 200 جىڭ تارتادى.

ناق مايداندا بولعان حالىق جاساعىنىڭ ايتۋىنشا، قازىر كەيبىر تىمساق تەرەڭ سۋدا بولىپ، حاۋىپسىزدىك تالابى تۇرعىسىنان، اعىپ شىققان تىمساق اتىپ تاستالادى ەكەن. كوپتەگەن تاراۋدىڭ قاتىستى قىزمەتكەرلەرى ناق مايداندا كۇزەتتە تۇرىپ، تۇرعىنداردىڭ باس اماندىعىنا كەپىلدىك ەتكەن.

اۋدارعان: ساعىنبەك رابات ۇلى

来源：央广网

翻译：萨恒别克

审稿、制作：古丽美热