135-كەزەكتى جۇڭگو يمپورت-ەكسپورت تاۋارلارى جارمەنكەسىنە قاتىناسقان كاسىپورىن 29 مىڭنان استى

 

ءوز حابارىمىز. 135-كەزەكتى جۇڭگو يمپورت-ەكسپورت تاۋارلارى جارمەنكەسى 4-ايدىڭ 15-كۇنى گۋاڭجوۋدا اشىلدى، كورمەگە قاتىناسقان كاسىپورىندار 29 مىڭنان اسىپ، سانى جاعىنان تىڭ رەكورد جاراتىلدى. 

 

وسى كەزەكتى گۋاڭجوۋ جارمەڭكەسىندە كورمەنىڭ جالپى اۋدانى ءبىر ميلليون 550 مىڭ شارشى مەترگە جەتتى، العاشقى كورمەدە «وزىق جاساۋ كاسىبى» نەگىزگى تاقىرىپ ەتىلىپ، 5 بولەككە بولىنگەن 19 كورمە رايونى ورنالاستىرىلىپ، ەلەكتروندى ءۇي ەلەكتر جابدىقتارى، ونەركاسىپ جاساۋ كاسىبى، جارىقتاندىرۋ، ەلەكتر، مەتال قۇرالدار، جاڭا ەنەرگيالى اۆتوموبيل جانە زەردەلى ساپار بۇيىمدارى سياقتى سالالارداعى جاڭا ونىمدەر شوعىرلى كورسەتىلدى. سەميا ەلەكتر جابدىقتار كورمە رايونىندا جارىقتىق ۆولت پەن ەنەرگيا ساقتاۋ ءبىر تۇلعالاستىرىلعان «اۋانى ىلاستامايتىن» اۋا تەڭشەگىش ءونىمى جۇرت نازارىن اۋداردى. يتاليالىق ساۋداگەر نيكولو نەرەلو بىلاي دەدى: ءۇي ەلەكتر جابدىقتارىن ساتىپ الامىز، قازىر جۇڭگودا جاسالعان ونىمدەردىڭ ساپاسى جوعارى ورەگە جەتتى، توۆاردىڭ جاڭاشا ەرەكشەلىكتەرىنىڭ بارلىعىن جۇڭگو زەرتتەپ جاساعان، جوبالانۋى دا وتە جاقسى. ءبىز كوبىرەك ساتىپ الۋعا پەيىلدىمىز. 

وسى كەزەكتى گۋاڭجوۋ جارمەنكەسىنە قاتىناسقان كاسىپورىنداردىڭ تەڭ جارتىسىنان استامى جاساندى زەردە، ءىرى ساندى مالىمەتتەرگە تالداۋ جاساۋ سياقتى سيفرلانعان تەحنيكالاردان پايدالانىپ ءوندىرىس اينالىمىن وزگەرتىپ، ءونىمنىڭ ساپاسى مەن باسەكەلىك قۋاتىن جوعارىلاتتى. 

 

كورمەگە قاتىناسقان ساۋداگەر شيا گۋاڭحۇي بىلاي دەدى: بىرنەشە جىلدىق ۇزدىكسىز جاڭالىق اشۋ ارقىلى اناعۇرلىم زەردەلى، اناعۇرلىم ەنەرگيا ۇنەمدەيتىن ونىمدەر شەتەل بازارىنا شىعارىلىپ، ەل ءىشى-سىرتىنداعى تۇتىنۋشىلاردى باۋرادى، ءبىرىنشى توقساننان قاراعاندا، ءبىزدىڭ ەكسپورتىمىزدىڭ ارتۋ مولشەرى وراسان زور بولىپ، %40 تەن استى، قازىر زاۆوتتاردىڭ ءوندىرىسى توتەنشە قاربالاس، گۋاڭجوۋ جارمەنكەسىنەن كەيىن، ءبىزدىڭ ءوندىرىسىمىزدىڭ ارتۋ مولشەرى ءتىپتى دە زور بولادى. قازىر دۇنيە جۇزىندەگى 100 دەن استام مەملەكەت پەن رايون، 400 دەن استام قاريدار ناق مايداندا توقتامداسۋعا كەلىستى. 

 

وسى كەزەكتى گۋاڭجوۋ جارمەڭكەسىنىڭ 1-كەزەكتى يمپورت كورمەسىنە 30 مەملەكەت پەن رايوننان كەلگەن 197 كاسىپورىن قاتىناستى، مۇنىڭ ىشىندە «ءبىر بەلدەۋ، ءبىر جولدى» بىرگە قۇرۋشى مەملەكەتتەردىڭ كاسىپورىندارى شامامەن %74 تى ۇستايدى. وسى كەزەكتى گۋاڭجوۋ جارمەڭكەسىندە شەكارا اتتاعان ەلەكتروندىق ساۋدا جانە شەتەل قامبا كورمە رايونى تۇڭعىش رەت قۇرىلىپ، 158 كاسىپورىن كورمەگە قاتىناستى. 

 

جۇڭگو سىرتقى ساۋدا ورتالىعىنىڭ مەڭگەرۋشىسى چۋ شىجيا بىلاي دەدى: گۋاڭجوۋ جارمەڭكەسى جۇڭگونىڭ سىرتقا ەسىك اشۋداعى تەرەزەسى، كورمەگە قاتىناسقان كاسىپورىندار جاڭا ونىمدەردى، جاڭا تەحنيكالاردى، جاڭا ماتەريالداردى، جاڭا تەحنولوگيالاردى كورمەگە قويىپ، ەلىمىزدىڭ جاڭا ساپالى وندىرگىش كۇشتەرىنىڭ دامۋىنداعى ەڭ جاڭا جەتىستىكتەردى تولىق ايگىلەدى. جۇڭگونىڭ جاساۋ كاسىبى الەمدىك كاسىپ تىزبەگىن، قامداۋ تىزبەگىن قامتاماسىز ەتىپ، الەمدىك بازاردىڭ قاجەتىن قاناعاتتاندىردى. الەمنىڭ تۇكپىر تۇكپىرىندەگى ساۋداگەرلەر گۋاڭجوۋ جارمەنكەسىنە جەلىدە جانە جەلىدەن تىس قاتىناسىپ، جۇڭگونىڭ جاساۋ كاسىبىنە دەگەن سەنىمىن، جۇڭگو ەكونوميكاسىنىڭ دامۋىنا دەگەن سەنىمىن ايگىلەدى.