ءوز حابارىمىز. 4-ايدىڭ 30-كۇنى ساعات 17 دەن 46 مينۋت وتكەندە، شىنجوۋ 17-ءنومىرلى ادام الىپ ۇشاتىن الەم كەمەسىنىڭ قايتىمدى كابيناسى دۇڭ فىڭ قونۋ الاڭىنا ءساتتى قوندى، ۇشۋ مىندەتىن اتقارعان عارىشكەرلەر: تاڭ حۇڭبو، تاڭ شىڭجيە جانە جياڭ شينليننىڭ دەنساۋلىق جاعدايى جاقسى بولىپ، شىنجوۋ 17-ءنومىرلى الەم كەمەسىنىڭ ۇشۋ مىندەتى تولىق تابىسپەن ورىندالدى. 

شىنجوۋ 17-ءنومىرلى ادام الىپ ۇشاتىن الەم كەمەسى 2023-جىلى 10-ايدىڭ 26-كۇنى جيۋچۋان جاساندى سەرىك ۇشىرۋ ورتالىعىنان ۇشىرىلعان، سوڭىنان تيانحى وزەكتى بولمەسىمەن ءتۇيىلىسىپ قۇراما تۇلعا قالىپتاستىردى. 3 عارىشكەر وربيتادا 187 كۇن ۇشتى، وسى بارىستا ولار 2 رەت كابينادان شىعىپ، كەڭىستىك پۋنكتىندە كوپ رەت زاتتى كابينادان شىعارۋ مىندەتىنىڭ ورىندالۋىنا سايكەسىپ، ىلگەرىندى-كەيىندى كابينا ءىشى-سىرتىنداعى جابدىقتاردى ورناتۋ، رەتتەۋ، قورعاۋ، جوندەۋدەي قىزمەتتەردى ورىستەتىپ، وربيتاداعى عارىش جابدىعىنىڭ كابينا سىرتىنداعى قۇرىلعىلارىن جوندەۋ مىندەتىن تۇڭعىش رەت ورىنداپ، كەڭىستىك پۋنكتىنىڭ وربيتادا ۇزاق ۋاقىت ورنىقتى اينالىمعا تۇسۋىنە قىمباتتى ساندى مالىمەت جانە تاجىريبە توپتادى؛ سونىمەن بىرگە، جەر بەتىندەگى عىلمي زەرتتەۋ قىزمەتكەرلەرىنىڭ تىعىز سايكەسۋىندە، ميكرو اۋىرلىق كۇش نەگىزدىك فيزيكاسى، كەڭىستىك ماتەريال عىلىمى، كەڭىستىك تىرشىلىك عىلىمى، عارىش مەديتسيناسى، عارىش تەحنيكاسى سياقتى سالالارعا ساياتىن قىرۋار كەڭىستىك عىلمي تاجىريبەلەرى مەن سىناقتارىن جاسادى.

اۋدارعان: امانتاي مۇسايىپ ۇلى