مەملەكەت بويىنشا كۇزگى استىق ساتىپ الۋ مولشەرى 120 ميلليون تونناعا جەتتى

ءوز حابارىمىز. مەملەكەتتىك استىق جانە زات زاپاسى مەكەمەسىنىڭ ساندى مالىمەتىنە نەگىزدەلگەندە، بۇكىل ەل بويىنشا كۇزگى استىق ساتىپ الۋ جوعارى ورلەۋگە كوتەرىلىپ، جالپى ساتىپ الىنعان استىق 120 ميلليون تونناعا جەتكەن. حىنان، جياڭسۋ، حيلۇڭجياڭ، انحۇي قاتارلى ءتورت ولكە ورتا جانە جاي پىساتىن كۇرىشتىڭ ەڭ تومەنگى باعادان تۇسىرمەي ساتىپ الۋ باعاسىن اتقارۋ جوباسىن جولعا قويدى، كەزەكتە 200 دەن استام استىق ساتىپ الۋ قامباسى قۇرىلىپ، ديقانداردىڭ استىق ساتۋىنا قولايلىلىق جاراتىلدى. 

قالىڭ قار جاۋعاننان كەيىن، حيلۇڭجياڭ ولكەسى فۋجين قالاسى شۇعىل جاعدايعا توتەپ بەرۋ جوباسىن دەرەۋ ىسكە قوسىپ، استىق جيناۋ، ساقتاۋ قىزمەتىنىڭ حاۋىپسىز، ءتارتىپتى جۇرگىزىلۋىنە كەپىلدىك ەتتى، جەرگىلىكتى ورىنداعى بەلگىلى استىق قامباسىنىڭ قىزمەتكەرى جاڭ جينلۇڭ بىلاي دەدى: ءبىز دەر كەزىندە قار تازالاۋمەن بىرگە، كەپتىرۋ الاڭىن شارلاۋدى، باسقارۋدى كۇشەيتىپ، استىقتىڭ تەمپەراتۋراسىن، ىلعالدىعىن باقىلاۋ-مەڭگەرۋدى مەرزىم بويىنشا ويداعىداي ىستەپ، استىق ءۇيىندىسىنىڭ كوگەرۋىنەن ساقتانىپ، استىق ساقتاۋ حاۋىپسىزدىگىنە كەپىلدىك ەتەمىز. 

حيلۇڭجياڭ ولكەسىنىڭ جيامۋس قالاسىندا جۇڭگو قامداۋ-ساتۋ استىق-ماي حۋانان استىق قامباسى تاڭەرتەڭ ساعات 7 دە اشىلىپ، كەشكى ساعات 10 دا جابىلىپ، بۇكىلدەي اۆتوماتتاندىرىلعان تىزىمدەۋ، ۇلگى الۋ، تارازىدان ءوتۋ، استىق ءتۇسىرۋ، ەسەپ جابۋ ارقىلى شارۋالاردىڭ قاتارعا از تۇرۋىنا، استىقتى تەز ساتۋىنا دەم بەردى. قامداۋ-ساتۋ استىق، ماي حۋانان شەكتى سەرىكتىگىنىڭ جاۋاپتىسى تاڭ حۇڭيۇي بىلاي دەدى: جيىنى 117 مىڭ توننا قامبا سيىمدىلىعىن بوساتىپ، 37 مىڭ توننا كۇرىش ساتىپ الىپ، 60 مىڭ توننا جۇگەرى، 100 مىڭ توننا ساۋدا استىعىن رەتتەپ، اۋدان كولەمىندەگى شارۋالاردىڭ قولىنداعى استىق قاينارىن ەڭ زور دارەجەدە ساتىپ الۋدى جوسپارلادىق.

قازىر جۇڭگو زاپاس استىق توبى 900 دەن استام زەيىندەستىرىلگەن استىق قامباسى جۇيەسىنىڭ دارەجەسىن جوعارىلاتىپ، حىناننىڭ شينياڭ، نانياڭ سياقتى جەرلەرىندە 60 جيناۋ-ساقتاۋ قامباسىن قۇرىپ، 165 جۇمىس جەلىسىن ساپالاندىرىپ، كۇنىنە 40 مىڭ توننادان استام استىقتى قامباعا كىرگىزەدى. جۇڭگو زاپاس استىق توبى حۋاڭچۋان گۋشى بولىمشە قامباسىنىڭ جاۋاپتىسى جاڭ جينسۇڭ بىلاي دەدى: استىق ءتۇسىرۋ كەزىندە ەرتە تارازىلاۋ، جۇمىس ۋاقىتىن ۇزارتۋ جانە استىق جيناۋ جابدىقتارىن كوبەيتۋ ارقىلى استىقتى ءتۇن اسىرۋدان ساقتاندىق. استىق ساتاتىن قاريدارلارعا ماسكى، قولعاپ سياقتى سۋىقتان ساقتانۋ، جىلۋ ساقتاۋ بۇيىمدارىن تاراتتىق. 

جەر-جەر ءتۇرلى شارا قولدانىپ، استىق زيانىن ازايتۋدى شىن مانىندە تياناقتاندىردى. شاندۇڭ ولكەسى دىجوۋ قالاسى ۋچىڭ اۋدانىنداعى ديقان رىن جاۋتۇڭ تاياۋدا ەكى جىلجىمالى كەپتىرۋ ماشيناسىن ساتىپ الدى، وسى ماشينا شاندۇڭ ولكەسىنىڭ اۋىل شارۋاشىلىق ماشينالارىن ساتىپ الۋعا قوسىمشا قاراجات بەرەتىن ماشينا تۇرلەرىنىڭ تىزىمدىگىنە ەنگىزىلىپ، شارۋالار مەملەكەتتىڭ اۋىل شارۋاشىلىق ماشينالارىن ساتىپ الۋ قوسىمشا قاراجاتىنان 50 مىڭ يۋاننان استام يگىلىكتەنەدى، كەپتىرۋ ماشيناسى استىقتى كوگەرىپ كەتۋدەن ساقتايدى.