شي جينپيڭ مەن حوندۋراستىڭ زۇڭتۇڭى ەكى ەل ديپلوماتيالىق قاتىناس ورناتقاندىعىنىڭ ءبىر جىلدىعى بايلانىسىمەن ءوزارا قۇتتىقتاۋ تەلەگرامما جولدادى

ء وز حابارىمىز. مەملەكەت ءتوراعاسى شي جينپيڭ مەن حوندۋراستىڭ زۇڭتۇڭى كاسترو 3-ايدىڭ 26-كۇنى ءوزارا تەلەگرامما جولداپ، ەكى ەل ديپلوماتتىق قاتىناس ورناتقاندىعىنىڭ ءبىر جىلدىعىن قۇتتىقتادى.

شي جينپيڭ بىلاي دەپ انىق ايتتى: بىلتىر 3-ايدا جۇڭگو حوندۋراسپەن ديپلوماتيالىق قاتىناس ورناتىپ، ەكى جاقتى قاتىناستا جاڭا پاراق اشىلدى. بىلتىر 6-ايدا زۇڭتۇڭ كاسترو جۇڭگودا مەملەكەتتىك ساپاردا بولدى، ءبىز كەڭەس وتكىزدىك ءارى ماڭىزدى ورتاق تانىمعا كەلىپ، ەكى جاقتى قاتىناستىڭ دامۋىنا ايقىن باعدار كورسەتىلدى. ديپلوماتيالىق قاتىناس ورناعان ءبىر جىلدان بەرى، ەكى جاق ءوزارا قۇرمەت ەتۋ، تەڭ تۇرعىدا ءوزارا پايدا جەتكىزۋ، ورتاق دامۋ پرينسيبىن ۇستانىپ، ەكى جاقتى قاتىناستىڭ جوعارى دەڭگەيدە باستالۋىن ىلگەرىلەتتى. حوندۋراس جاق ءبىر جۇڭگو پرينسيبىن باتىل اتقاردى، مەن مۇنى ايرىقشا القايمىن.

شي جينپيڭ بىلاي دەپ باسا دارىپتەدى: اماليات جۇڭگو مەن حوندۋراستىڭ ديپلوماتيالىق قاتىناس ورناتۋى تاريح اعىمىنا سايكەسىپ جاساعان دۇرىس ساياسي شەشىم ەكەندىگىن، ەكى ەلدىڭ جانە ەكى ەل حالقىنىڭ ءتۇبىرلى مۇددەسىنە ۇيلەسەتىندىگىن دالەلدەدى. مەن جۇڭگو-حوندۋراس قاتىناسىن دامىتۋعا ايرىقشا ءمان بەرەمىن، كاسترو زۇڭتۇڭمەن بىرلىكتە قۇلشىنىپ، ەكى ەلدىڭ ديپلوماتيالىق قاتىناس ورناتقاندىعىنىڭ ءبىر جىلدىعىن وراي ەتىپ، ءوزارا قولداۋدى بەكەمدەپ، جالپى بەتتىك سەلبەستىكتى كەڭەيتىپ، ورتاق كۇش سالا جۇڭگو-حوندۋراس قاتىناسىندا اناعۇرلىم كوركەم بولاشاق اشۋدى قۇپتايمىن.

كاسترو مىنالاردى ءبىلدىردى: جۇڭگودا مىڭداعان جىلدىق وركەنيەت بار، تاريحتىڭ العا باسۋ بارىسىندا باستى رول اتقارىپ كەلەدى، جۇڭگو دۇنيە ءجۇزىنىڭ ۇلگىسى، سونداي-اق حوندۋراستىڭ ماڭىزدى سەرىگى. ديپلوماتيالىق قاتىناس ورناتقان ءبىر جىلدان بەرى، ءبىز جۇڭگونىڭ جاڭالىق جاراتا دامۋعا كۇش سالىپ، الەمدىك ماسەلەلەردى شەشۋ جوباسىن بىرلىكتە زەرتتەپ، دۇنيە ءجۇزىنىڭ كەدەيلىكتى ارىلتۋ  ىستەرىنە بارىنشا دەم بەرگەندىگىنە كۋا بولدىق. حوندۋراس ءبىر جۇڭگو پرينسيبىنە تاباندى بولادى، جۇڭگو جاقپەن دەربەس، ءوز-وزىنە قوجايىن بولاتىن، ءوزارا قۇرمەت ەتەتىن ەكى جاقتى قاتىناستى دامىتۋدى قالايدى. ەكى ەل حالقىنىڭ دوستىعىنىڭ ماڭگى جالعاسۋىن تىلەيمىن.