ءوز حابارىمىز. ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تاسقىننان ساقتانۋ، اپاتتان قۇتقارۋ قىزمەتى جونىندە ماڭىزدى نۇسقاۋ بەردى.

شي جينپيڭ مىنالاردى اتاپ كورسەتتى: تاياۋدا شىعىس جۇڭگو، سولتۇستىك جۇڭگو، شىعىس سولتۇستىك قاتارلى جەرلەردە ءۇرتىس نوسەر جاۋىپ، تاسقىن جانە گەولوگيالىق اپات تۋىلىپ، بەيجيڭ، حىبەي، جيلين، شاندۇڭ سياقتى جەرلەردە اۋىر ءولىم-ءجىتىم جانە مال-مۇلىك شىعىنى بولدى. تاسقىننان ساقتانۋ، قاتەردەن اراشالاۋ، اپاتتان قۇتقارۋ قىزمەتتەرىن تىڭعىلىقتى ىستەپ، دەرەكسىز كەتكەندەردى بار كۇشپەن ىزدەپ، قۇتقارىپ، حاۋىپكە ۇشىراعان بۇقارانى باتىل كوشىرىپ ورنالاستىرىپ، ءولىم-ءجىتىمدى مۇمكىندىكتىڭ بارىنشا ازايتۋ كەرەك.

شي جينپيڭ بىلاي دەپ باسا دارىپتەدى: قازىر تاسقىننان ساقتانۋداعى شەشۋشى كەزەڭ، جەر-جەر جانە قاتىستى تاراۋلار تومەنگى شەكتە ويلاۋدى، شەكتىك ويلاۋدى بەرىك ورناتىپ، ساياسي جاۋاپكەرشىلىكتى جاپپاي كۇشەيتىپ، تاسقىننان ساقتانۋ شارالارىن ناقتى، ەگجەي-تەگجەيلى تياناقتاندىرىپ، ءالسىز بۋىندار مەن ءتۇيىندى ورىنداردى ءجىتى قاداعالاپ جانە بەكەمدەپ، قۇتقارۋ كۇشتەرى مەن اپاتتان قۇتقارۋ زاتتىق ماتەريالدارىن عىلمي ورنالاستىرىپ، توسىن جاعدايلارعا قاراتا دەرەۋ ارەكەتكە كەلىپ، دەرەۋ ءبىر جاقتى ەتىپ، حالىقتىڭ ءومىرى مەن مال-مۇلكىنىڭ حاۋىپسىزدىگىن بار كۇشپەن قامتاماسىزداندىرۋ كەرەك.

ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ بەكىتۋ جازىپ بىلاي دەپ اتاپ كورسەتتى: بەيجيڭ قالاسى مييۇن رايونىندا نوسەر، تاسقىن اپاتىنان اۋىر ءولىم-ءجىتىم تۋىلدى، دەرەكسىز كەتكەندەردى بار كۇشپەن ىزدەپ قۇتقارىپ، اپاتقا ۇشىراعان بۇقارانى ۇيلەسىمدى ورنالاستىرىپ، ءولىم-ءجىتىمدى مۇمكىندىكتىڭ بارىنشا ازايتۋ كەرەك.تاياۋدا سولتۇستىك جۇڭگونىڭ ءىشىنارا رايوندارىندا ارت-ارتىنان نوسەر جاۋدى، مەملەكەتتىك تاسقىننان ساقتانۋ قۋاڭشىلىققا قارسى تۇرۋ باس قولباسشىلىق شتابى قاتىستى جەرلەردىڭ نوسەر، تاسقىن اپاتىنان ساقتانۋدى، وعان توتەپ بەرۋدى ونان ارى كۇشەيتۋىنە جەتەكشىلىك ەتىپ، ەرەكشە اۋا رايىن باقىلاۋ-ولشەۋدى، ساقتاندىرۋدى ويداعىداي ىستەپ، وزەن-ءداريالاردى، سۋ قويمالارىن، توسپالاردى شارلاۋدى، قورعاۋدى جانە قالا ىشىندەگى تاسقىن اپاتىنىڭ كومەسكى قاتەرىن تەكسەرۋدى كۇشەيتىپ، حاۋىپ-قاتەرگە تاپ بولعان بۇقارانى دەر كەزىندە جوتكەپ، حالىق بۇقاراسىنىڭ ءومىرى مەن مال-مۇلكىنىڭ حاۋىپسىزدىگىن شىنايى قامتاماسىزداندىرۋ كەرەك.