ءوز حابارىمىز. 1-ايدىڭ 16-كۇنى تۇستەن بۇرىن، مەملەكەت ءتوراعاسى شي جينپيڭ بەيجيڭدە حالىق سارايىندا جۇڭگوعا رەسمي ساپارلاي كەلگەن كانادانىڭ زۇڭليى كارنەيمەن  كەزدەستى.

شي جينپيڭ مىنالاردى اتاپ كورسەتتى: بىلتىر 10-ايدا ءبىز حانگونىڭ چيڭجوۋ قالاسىندا كەزدەسىپ، جۇڭگو-كانادا قاتىناسى جاقسارۋىنىڭ جاڭا جاعدايىن اشتىق. ەكى جاق ءار سالاداعى سەلبەستىكتى قالپىنا كەلتىرۋ جانە قايتا باستاۋ جونىندە ىشكەرىلەي تالقى جۇرگىزىپ، بەلسەندى تابىستارعا قول جەتكىزدى. جۇڭگو مەن كانادا قاتىناسىنىڭ اقاۋسىز، ورنىقتى دامۋى ەكى ەلدىڭ ورتاق مۇددەسىنە ۇيلەسەدى ءارى دۇنيە ءجۇزىنىڭ بەيبىتشىلىگىنە، ورنىقتىلىعىنا جانە دامۋىنا، گۇلدەنۋىنە ءتيىمدى. ەكى جاق تاريحقا، حالىققا، دۇنيە جۇزىنە جاۋاپتى بولۋ پوزيتسياسىمەن جۇڭگو مەن كانادانىڭ جاڭاشا ستراتەگيالىق سەرىكتەستىك قاتىناسىن ورناتۋدى ىلگەرىلەتىپ، جۇڭگو مەن كانادا قاتىناسىنىڭ اقاۋسىز، ورنىقتى، باياندى دامۋ ارناسىنا ءتۇسۋىن جەبەپ، ەكى ەل حالقىنا اناعۇرلىم زور باقىت جاراتۋى كەرەك.

شي جينپيڭ جۇڭگو مەن كانادا قاتىناسى جونىندە 4 ءتۇرلى پىكىردى ورتاعا قويدى. ءبىرىنشى، ءوزارا قۇرمەت ەتەتىن سەرىك بولۋ كەرەك. جۇڭگو مەن كانادا ديپلوماتيالىق قاتىناس ورناتقان 55 جىلدان بەرى، ەكى ەل قاتىناسى بوران-شاشىندى باستان كەشىرىپ، اۋمالى-توكپەلى بولىپ، باعالى تاريحي تاجىريبەلەر مەن رەال تولعامداردى قورتىندىلادى. جۇڭگو مەن كانادانىڭ مەملەكەت جاعدايى ۇقساماعانىمەن، ءبىر-ءبىرىنىڭ يەلىك ۇقىعى مەن تەرريتوريا تۇتاستىعىنا، وزدەرى تاڭداعان ساياسي ءتۇزىم مەن دامۋ جولىنا قۇرمەت ەتىپ، مەملەكەت پەن مەملەكەتتىڭ دۇرىس قارىم-قاتىناس جولىنا تاباندى بولۋ كەرەك. ەكىنشى، بىرگە داميتىن سەرىك بولۋ كەرەك. جۇڭگو مەن كانادانىڭ ەكونوميكا-ساۋدا قاتىناسىنىڭ ءمانى ءوزارا پايدا جەتكىزىپ، تەڭ يگىلىككە كەنەلۋ، ەكى جاقتى  سەلبەستىك بارىسىندا يگىلىككە كەنەلدىرۋ. جۇڭگونىڭ جوعارى ساپالى دامۋى، جوعارى دەڭگەيدەگى ەسىك اشۋى جۇڭگو مەن كانادانىڭ سەلبەستىگىنە ۇزدىكسىز جاڭا وراي ازىرلەپ، جاڭا ءورىس اشاتىن بولادى. ەكى جاق سەلبەستىكتى جەبەۋ جاعىندا كوبىرەك قوسۋ ءادىسىن قولدانىپ، شەكتەلگەن سالالار تىزىمدىگىندە كوبىرەك ازايتۋ ءادىسىن قولدانىپ، اناعۇرلىم ىشكەرىلەي، اناعۇرلىم كەڭ كولەمدى سەلبەستىك ارقىلى ورتاق مۇددە دانەكەرىن ۇزدىكسىز بەكەمدەۋى كەرەك. ءۇشىنشى، ءوزارا سەنىم ارتاتىن سەرىك بولۋ كەرەك. حالىق تىلەگىنىڭ توعىسۋى ەڭ نەگىزدىك، ەڭ بەرىك، ەڭ باياندى ءوزارا بايلانىس سانالادى، ەكى جاق ەكى ەلدىڭ وقۋ-اعارتۋ، مادەنيەت، ساياحات، دەنە تاربيە، جەرگىلىكتى ورىندار سياقتى ءار سالاسىن اۋىس-كۇيىستى، سەلبەستىكتى كۇشەيتۋگە شابىتتاندىرىپ، ادامدار بارىس-كەلىسىنە قولايلىلىق جاساپ، حالىق رايى نەگىزىن بەكەمدەۋ كەرەك. ءتورتىنشى، ءوزارا سەلبەسەتىن سەرىك بولۋ كەرەك. بولشەكتەنگەن دۇنيە ادامزات ءدوپ كەلىپ وتىرعان ورتاق سىن-سايىستارعا توتەپ بەرە المايدى، مۇنىڭ شىعار جولى ناعىز كوپ جاقتىلىقتى قورعاپ جانە امالياتتا ايگىلەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ. جۇڭگو كانادامەن ب م ۇ، 20 ەل توبى، ازيا-تىنىق مۇحيت ەكونوميكالىق سەلبەستىك ۇيىمى سياقتى جۇلگەدەگى سويلەسۋ مەن سايكەسۋدى كۇشەيتىپ، الەمدىك سايىستارعا بىرگە توتەپ بەرۋدى قالايدى.

كارنەي بىلاي دەدى: كانادانىڭ جۇڭگومەن دوستىق بارىس-كەلىس جاساۋ تاريحى ۇزاق، ەكى ەل ەكونوميكاسى جوعارى دارەجەدە ءبىرىن-ءبىرى تولىقتايدى، كەڭ كولەمدى ورتاق مۇددەگە يە، ورايعا تولى. كانادا جۇڭگومەن پارمەندى، باياندى جاڭاشا ستراتەگيالىق سەرىكتەستىك قاتىناس ورناتىپ، ەكى جاق حالقىنا ءتىپتى دە كوپ باقىت جاراتۋدى قالايدى. ءتوراعا شي جينپيڭنىڭ باسشىلىعىندا، جۇڭگو ەكونوميكاسى جەدەل دامىپ، عىلىم-تەحنيكادا جاڭالىق اشۋ جەتىستىكتەرى دۇنيە ءجۇزى ەكونوميكاسىنىڭ ارتۋىنا قوزعاۋشى كۇش ازىرلەدى. كانادا ءبىر جۇڭگو ساياساتىن اتقاراتىندىعىن قايتالاي دارىپتەيدى، جۇڭگومەن ءبىر باعىتتا ىلگەرلەۋگە، ءوزارا قۇرمەت ەتىپ، قول ۇستاسا قۇلشىنىپ، ەكونوميكا-ساۋدا، ەنەرگيا، اۋىل شارۋاشىلىعى، فينانس، وقۋ-اعارتۋ، كىليمات وزگەرىسى قاتارلى سالالاردا سەلبەستىكتى كەڭەيتۋگە جانە كۇشەيتۋگە كۇش سالادى. كوپ جاقتىلىق دۇنيە ءجۇزىنىڭ حاۋىپسىزدىگى مەن ورنىقتىلىعىنىڭ ىرگە تاسى، ءتوراعا شي جينپيڭنىڭ الەمدىك باسقارۋ دارىپتەمەسىن العا قويۋى ماڭىزدى مانگە يە. كۇردەلى دە قۇبىلمالى حالىقارالىق جاعداي الدىندا، كانادا جۇڭگومەن كوپ جاقتى سايكەسۋدى جيىلەتىپ، كوپ جاقتىلىقتى جانە ب م ۇ-نىڭ بەدەلىن قورعاپ، دۇنيە ءجۇزىنىڭ بەيبىتشىلىگى مەن ورنىقتىلىعىن بىرگە قورعاۋدى قالايدى.

كەزدەسۋدەن كەيىن ەكى جاق «جۇڭگو مەن كانادا باسشىلارى كەزدەسۋىنىڭ بىرلەسكەن مالىمدەمەسىن» جاريالادى.

ۋاڭ ي كەزدەسۋگە قاتىناستى.