ينفورماتسيا اشكەرەلەۋ: mzjubao@cnr.cn

ۋنيۆەرسال

بالالاردى شابىتتاندىرۋعا ءسال قاراۋعا بولمايدى

来源:جۇڭگو قازاق راديو تورابى     |责编:达吾力别克 |     发布日期: 2020-10-13 15:31

جەڭىس قاباش ۇلى

مۇعالىم مەن اتا- انا بالالاردى عىلىمي شابىتتاندىرۋعا ءمان بەرۋ كەرەك.


بالالاردىڭ بارلىعىندا، كومەسكى، جاسىرىن، كەزدەيسوق زەيىن- زەردە، قابىلەت بولاتىندىعىن عىلىم جوققا شىعارمايدى.

بۇنداي زەيىن- زەردە، قابىلەت ءار بالادا ءار ءتۇرلى بولادى، سوندىقتان تۇرلىشە بالانىڭ كومەسكى زەيىن- زەردەسىن، قابىلەتىن مۇمكىندىكتىڭ بارىنشا اشۋ، ىسكە جاراتۋ، ساۋلەلەندىرۋ- كوپ ويلانۋدى، كوپ تولعانۋدى، قولايلى جاعداي جاراتۋدى تالاپ ەتەدى، مىنە بۇلار سول بالانىڭ جاقسى ناتيجە جاراتۋىنىڭ مىقتى باسپالداعى بولا الادى.

بۇندا شابىتتاندىرۋ- كومەسكى قابىلەتتى اشۋدىڭ، پايدالانۋدىڭ ءونىمدى ادىستەرىنىڭ ءبىرى ەسەپتەلەدى.

” ءارقانداي ءىستىڭ ءونىمدى بولۋى ءۇشىن ءۇش شارت بار: ەڭ اۋەلى- نيەت كەرەك، ودان سوڭ- كۇش كەرەك، ودان سوڭ- ءتارتىپ كەرەك “ دەيدى، وسىندا ايتىلعان نيەت ياعىني شىنايى پەيىل دەيتىن ءبىرىنشى شارتتى قىسقا ۋاقىتتا ورىنداۋ ءۇشىن شابىتتاندىرۋ قاجەت، ۇيلەسىمدى الىپ بارىلعان شابىتتاندىرۋ ادامداردىڭ كومەسكى، جاسىرىن، كەزدەيسوق قابىلەتىن قوزعاپ، جاقسى ناتيجەلەردى قولعا كەلتىرۋىنە تۇرتكى بولادى.

” بالانىڭ جاقسىسى قىزىق، جامانى كۇيىك “
اتا- انانىڭ بارلىعىندا بولاتىن ورتاق ارمان - تىلەك: ۇرپاعىم ۇلاعاتتى بولسا ەكەن، تاربيەلى بولسا ەكەن، سانالى بولسا ەكەن، وپالى بولسا ەكەن، بەتىمە شىركەۋ كەلتىرمەسە ەكەن دەيدى، سونى ورىنداۋ ءۇشىن قارمانادى.
” كۇللى تاماشانىڭ ىشىندەگى، ەڭ تاماشاسى- جاقسى تاربيەلەنگەن ۇرپاق “ دەگەن تۇجىرىم بەكەر ايتىلماسا كەرەك.

بالامىز ءۇشىن ويلانۋ، ەڭبەكتەنۋ سىندى وسى ءبىر تالعام- ءومىردىڭ بىزگە بەرگەن داڭقتى سيى، ورايى، باقىتى.


شابىتتاندىرۋدان- كوڭىلدىلىك، كوڭىلدىلىكتەن- پەيىل پايدا بولادى.


جوعارداعىنىڭ بارلىعى كەڭەس بەرۋ، اقىل ايتۋ، ءىستىڭ ءجونىن ءتۇسىندىرۋ.


ونى ۋاقىت اجىراتىپ وقۋ، ءتۇسىنۋ بىرشاما وڭاي.


ەڭ قيىنى- وسى ايتىلعانداردى ناقتىلى رەيال ومىردە، تۇرمىس بارىسىندا پايدالانا بىلۋدە.

كوزقاراسىمىزدى تىپتىدە ايقىنداي ءتۇسۋ ءۇشىن: جۇڭگوداعى ەڭ ءوتىمدى كىتاپتاردىڭ ءبىرى ” بالاعا جارايسىڭ دەي ءبىلىڭىز “ دەيتىن كىتاپتا ايتىلعان كەيبىر كەڭەستەردى ورتاعا سالا كەتپەكشىمىن، وندا كوپتەگەن اتا- انالار، ۇستازدار ورىندى دەپ قاراعان مىنانداي تۇجىرىمدار بار.

” بالالاردىڭ كوڭىل قامباسىن اشاتىن التىن كلت- جارايسىڭ دەگەن ءبىر اۋىز ءسوز؛ سەن ونى جارايدى دەسەڭ جارايدى، جارامسىز دەسەڭ، جارامسىز بولىپ شىعادى؛ وعان ءجونىن تاۋىپ، دەم بەرىپ وتىرساڭ، ول سەنى رازى قىلماي قويمايدى؛ ونى باسقالارعا جەتپەيسىڭ دەپ، جەلكەلەي بەرسەڭ، ول توپاستىعىن امالياتى ارقىلى كورسەتىپ بەرەدى.

بالا جونىنەن العاندا، ماڭدايعا جازعان باق- سور دەگەن ماڭىزدى ەمەس، ماڭىزدىسى- اۋەسىنىڭ، سەنىمىنىڭ بار- جوقتىعى. ول ءبىر ءتۇرلى كۇش- جىگەر بولا الادى. اۋەسى كۇشتى ادامنىڭ تۇرمىسى دا الۋان ءتۇرلى، باي مازمۇندى بولادى، ءورىسى كەڭەيەدى، دارىن- پاراساتىن ايگىلەۋىنە سەپ بولادى.

مەن بالالاردىڭ ءبارى جاقسى، ولاردىڭ ءون بويىندا القاۋعا تاتيتىن نارسەلەر كوپ، بىراق، كوبىنەسە بايقالماي قالادى، ەگەر بايقالسا، ولاردىڭ بەينەسى ەشكىمنەن كەم بولمايدى دەپ ەسەپتەيمىن.

مەيلى كىم بولسىن، ءوزىن شابىتتاندىراتىن بىرەۋگە نەمەسە ىسكە جولىققاندا، كوزى جايناپ كەتەدى.

بالالاردىڭ ارتىقشىلىعى، ابزالدىلىعى كوبىنەسە كومىلىپ جاتادى؛ ناعىز ءونىمدى ءادىس كورنەۋدە القاپ، كومەسكىدە سىنداۋ؛ ادام جاقسى بولۋدىڭ ءلاززاتىن سەزىنگەننەن تارتىپ، وزدىگىنەن جاقسى بولۋعا تالپىناتىن بولادى، بارعان سايىن جاقسى بولا تۇسسەم دەيدى.

ادامنىڭ ءبارى القاۋ العىسى كەلىپ تۇرادى، وزىنە ورىندى باعا العىسى كەلىپ جۇرەدى؛ بالانى ىنتالاندىرۋدىڭ ەڭ ءونىمدى ءتاسىلى- ولاردى ماداقتاي ءبىلۋ. “

توقسان اۋىز ءسوزدىڭ توبىقتاي ءتۇيىنى- بالالارىمىزدا ەلەۋسىز بولسادا ارتىقشىلىق، تابىس، ناتيجە بايقالسا، ۇيلەسىمدى ماداقتاۋلار ايتۋىمىز كەرەك.


ماقتاۋدى جەك كورەتىن ادام بولماسا كەرەك، بىراق ماقتاۋ شىندىق بولۋ كەرەك، سوندا عانا ول ءوزىنىڭ شابىتتاندىرۋ رولىن تولىق اتقارا الادى.

تاعىدا قايتالاپ ايتارىمىز، اتا- انالار، ۇستازدار بالالارىمىزدى، وقۋشىلارىمىزدى زەر سالا باقىلاپ، ولاردىڭ بويىنان بايقالعان زارەدەي بولسادا ارتىقشىلىىقتاردى نەگىز ەتە وتىرىپ، دەركەزىندە، ۇيلەسىمدى ماداقتاۋمەن شابىتتاندىرىپ، جالعاستى وڭدى ىستەرمەن قۇلشىنا كىرىسۋىنە دەم بەرۋىمىز، جاقسى ىسكە اۋدارىلعان نيەتىن بەكەمدەي ءتۇسىپ، ادەتكە ايلانۋىنا مۇمكىندىك جاراتۋىمىز اۋاداي قاجەت.

中央广播电视总台 央广网 版权所有

بالالاردى شابىتتاندىرۋعا ءسال قاراۋعا بولمايدى

بۇنداي زەيىن- زەردە، قابىلەت ءار بالادا ءار ءتۇرلى بولادى، سوندىقتان تۇرلىشە بالانىڭ كومەسكى زەيىن- زەردەسىن، قابىلەتىن مۇمكىندىكتىڭ بارىنشا اشۋ، ىسكە جاراتۋ، ساۋلەلەندىرۋ- كوپ ويلانۋدى، كوپ تولعانۋدى، قولايلى جاعداي جاراتۋدى تالاپ ەتەدى، مىنە بۇلار سول بالانىڭ جاقسى ناتيجە جاراتۋىنىڭ مىقتى باسپالداعى بولا الادى.