ءوز حابارىمىز. مەملەكەت ءتوراعاسى شي جينپيڭ 7-ايدىڭ 16-كۇنى افعانستاننىڭ پرەزيدەنتى عانيمەن تەلەفوندا سويلەستى.

شي جينپيڭ مىنالاردى اتاپ كورسەتتى: ءداستۇرلى دوس كورشى ەلدەر بولعان جۇڭگو مەن افعانستان باستان اياق ءبىرىن ءبىرى ءتۇسىنىپ، ءبىر بىرىنە كومەكتەسىپ كەلەدى. ىندەت تۋىلعاننان بەرى، ەكى ەل حالقى ءبىر جاعادان باس، ءبىر جەڭنەن قول شىعارىپ، ءوزارا قارايلاسىپ، ەكى ەلدىڭ دوستىعى مەن سەلبەستىگىن تەرەڭدەتتى. جۇڭگو جاق افعانستاننىڭ ىندەتكە قارسى تۇرۋىنا ۇزدىكسىز قولداۋ كورسەتۋدى جانە كومەكتەسۋدى قالايدى. افعانستاننىڭ سول ەلدەگى جۇڭگو ازاماتتارى مەن قۇرىلىمدارىنىڭ حاۋىپسىزدىگىن قورعاۋدى كۇشەيتۋىن ءۇمىت ەتەمىز.

شي جينپيڭ مىنالاردى باسا دارىپتەدى: جۇڭگو افعانستان ۇكىمەتىنىڭ مەملەكەتتىڭ يەلىك ۇقىعىن، تاۋەلسىزدىگىن، تەرريتوريا تۇتاستىعىن قورعاۋىن باتىل قولدايدى. بۇل افعانستان حالقى مەن وسى وڭىردەگى ەلدەردىڭ مۇددەسىنە ۇيلەسەدى. جۇڭگو جاق باستان اياق بىلاي دەپ قارايدى: ساياسي پىكىرلەسۋ افعانستانداعى ۇلتتاردىڭ تاتۋلاسۋى مەن باياندى بەيبىتشىلىگىن جۇزەگە اسىرۋىنىڭ ءتۇبىرلى ءادىسى، جۇڭگو «افعانستاندىقتار جەتەكشى بولۋ، افعانستاندىقتار مەنشىكتەنۋ» پرينسيبىن ۇزدىكسىز قولدايدى، افعانستاننىڭ بەيبىت تاتۋلاسۋ اياق الىسىن جانە ەرتەرەك بەيبىت قايتا قۇرىلۋىن قولدايدى. جۇڭگو افعانستان ۇكىمەتى مەن ەل ىشىندەگى ءارقايسى توپتاردىڭ تاياۋدان بەرى تەھران كەڭەسىندە بەلسەندى ورتاق تانىمعا كەلگەندىگىنەن ءۇمىت كۇتەدى، بەيبىتشىلىك كەلىسسوزىندەگى ەكى جاقتىڭ افعانستان حالقىنىڭ مۇددەسىن ماڭىزدى ورىنعا قويىپ، كەلىسسوز ارقىلى ەرتەرەك ساياسي شەشۋ جوباسىنا قول جەتكىزۋىن ءۇمىت ەتەدى. جۇڭگو جاق بۇل ءۇشىن بۇرىنعىداي سىندارلى رول اتقارا بەرەدى.

گاني بىلاي دەدى: جۇڭگو ىندەتكە ءساتتى توتەپ بەردى ءارى ەكونوميكانىڭ ارتۋىن جۇزەگە اسىردى، بۇل دۇنيە جۇزىندەگى ءار ەلگە زور پايدا جەتكىزدى. افعانستان جۇڭگونىڭ ىندەتكە توتەپ بەرۋ جاعىندا افعانستانعا قىمباتتى قولداۋ كورسەتكەندىگىنە العىس ايتادى، جۇڭگومەن جالپى جۇزدىك ءوزارا بايلانىس جاساۋ سياقتى سالالارداعى سەلبەستىكتى ۇزدىكسىز ىلگەرىلەتۋدى ءۇمىت ەتەدى. افعانستان ۇكىمەتى كەزەكتەگى داعدارىستى ساياسي جولمەن شەشىپ، افعانستاننىڭ باياندى بەيبىتشىلىگىن جۇزەگە اسىرۋعا كۇش سالادى. جۇڭگو ەجەلدەن ءوڭىردىڭ حاۋىپسىزدىگى مەن ورنىقتىلىعىن قورعاۋداعى ماڭىزدى بەلسەندى كۇش، جۇڭگونىڭ افعانستان ماسەلەسىن ساياسي جولمەن شەشۋدى ىلگەرىلەتۋدە ۇزدىكسىز ماڭىزدى رول اتقارۋىن ءۇمىت ەتەدى.

اۋدارعان: شالقار قازەز ۇلى