شي جينپيڭ مىنالاردى دارىپتەدى: ەكى ەل ديپلوماتيالىق قاتىناس ورناتقان ەكى جىلدان بەرى، ەكى ەل قاتىناسى قارىشتاپ دامىپ، ەكى ەل حالقىنا ناقتى باقىت جاراتتى. اماليات سولوموننىڭ جۇڭگومەن ديپلوماتيالىق قاتىناس ورناتۋ شەشىمىنىڭ بۇكىلدەي دۇرىس ەكەندىگىن دالەلدەدى. جۇڭگو مەن سولومون دا دامۋ جولىنداعى ەلدەر، حالىقارالىق ٴتارتىپ پەن ادىلدىكتى، تۋراشىلدىقتى قورعاۋ جاعىندا كوپتەگەن ورتاق مۇددەلەر بار. جۇڭگو سولوموننىڭ ٴوز ەلىنىڭ مەملەكەت جاعدايىنا ۇيلەسەتىن دامۋ جولىن دەربەس قاراستىرۋىنا قۇرمەت ەتەدى، سولومون توپ ارالى حالقىنىڭ تاماشا تۇرمىسقا تالپىنۋ قۇلشىنىسىن قولدايدى. جۇڭگو سولوموننىڭ ٴبىر جۇڭگو ساياساتىن باتىل اتقارعاندىعىن ايرىقشا القايدى، سولومونمەن بىرگە جۇڭگو-سولومون قاتىناسىن اناعۇرلىم جوعارى دەڭگەيگە كوتەرۋدى قالايدى.

    شي جينپيڭ مىنالاردى اتاپ كورسەتتى: جۇڭگو سولومونمەن پارتيالار ارا اۋىس-كۇيىستى كۇشەيتىپ، ”ٴبىر بەلدەۋ، ٴبىر جولدى“ بىرگە قۇرۋ باستاماسىن سولومون توپ ارالىنىڭ دامۋ جوباسىمەن ۇشتاستىرۋدى ىلگەرىلەتىپ، ٴار سالاداعى ناقتى سەلبەستىكتى تەرەڭدەتۋدى قالايدى، سولوموننىڭ جۇڭگو حالىقارالىق يمپورت كورمەسى سياقتى ارنالاردان پايدالانىپ، باسىمدىققا يە ونىمدەردى جالپىلاستىرىپ، جۇڭگوعا ەكسپورتتى كەڭەيتۋىن قارسى الادى. جۇڭگو سولومونعا ەشقانداي ساياسي شارت قوسىمشالانبايتىن ەكونوميكالىق-تەحنيكالىق كومەك بەرۋدى جالعاستىرىپ، سولوموننىڭ ىندەتكە قارسى تۇرۋىنا شاماسىنىڭ جەتىسىنشە كومەكتەسۋدى قالايدى. جۇڭگو سولومون توپ ارالى سياقتى تىنىق مۇحيتتاعى ارال ەلدەرمەن كەدەيلىكتى ازايتۋ تاجىريبەسىن ٴبولىسۋدى، دامۋ سەلبەستىگىن تەرەڭدەتۋدى قالايدى، تىنىق مۇحيتتاعى ارال ەلدەردىڭ ٴوز ەلىنىڭ مەملەكەت جاعدايىنا ۇيلەسەتىن كەدەيلىكتى ازايتۋ، دامۋ جولىن قاراستىرۋىنا، ٴىرى الەۋمەتتىك دەنساۋلىق ساقتاۋ وقيعالارى مەن جاراتىلىستىق اپاتتارعا اناعۇرلىم ويداعىداي توتەپ بەرۋىنە، كليمات وزگەرىسىنە توتەپ بەرۋ قابىلەتىن جوعارىلاتۋىنا كومەكتەسۋدى قالايدى.

    سوگاۆالي بىلاي دەدى: جۇڭگو كوممۋنيستىك پارتياسى قۇرىلعاندىعىنىڭ 100 جىلدىعىن ٴارى جۇڭگو حالقىنا باسشىلىق ەتىپ، ۇلى دامۋ جەتىستىكتەرىنە قول جەتكىزگەندىگىن قۇتتىقتايمىن، بەيجيڭ قىسقى وليمپيك سپورت جارىسىنىڭ ٴساتتى وتكىزىلۋىنە تىلەكتەسپىن. جۇڭگو سولومون توپ ارالىن قامتىعان دۇنيە جۇزىندەگى ٴار ەلدىڭ جاڭا تيپتى ايدارشا ۆيرۋس وكپە قابىنۋ اۋرۋىنا قارسى تۇرۋىنا قىرۋار قولداۋ كورسەتتى جانە كومەكتەستى، سولومون مۇنى القايدى جانە وعان العىس ايتادى. سولومون ٴبىر جۇڭگو ساياساتىن باتىل اتقارادى، جۇڭگو قۋاتتاعان يەلىك ۇقىق تاۋەلسىزدىگى، ٴوزارا قۇرمەتتەۋ، ٴبىر-ٴبىرىنىڭ ىشكى ىسىنە ارالاسپاۋ سياقتى پرينسيپتەردى قۇپتايدى، ادامزاتتىڭ تاعدىرلاس ورتاق تۇلعاسىن قۇرۋدى قولدايدى، تايۋان، شينجياڭ، شياڭگاڭ، ادامدىق ۇقىق سياقتى ماسەلەلەردە جۇڭگونى ۇزدىكسىز باتىل قولدايدى. سولومون جۇڭگونىڭ دامۋ تاجىريبەلەرىنەن ۇيرەنىپ، ۇلگى الىپ، جۇڭگومەن ٴار سالاداعى ٴوزارا ٴتيىمدى سەلبەستىكتى كۇشەيتىپ، ەكى ەل قاتىناسىن تىڭ دەڭگەيگە كوتەرۋدى قالايدى.

اۋدارعان: گۇلنۇر قابىلقاق قىزى