گۇيجوۋدىڭ تاۋ قويناۋىنداعى، ۋجياڭ وزەنىنىڭ قاينار باسىنداعى مياۋزۋ ۇلتىنىڭ بايىرعى حۋا-ۋ قىستاعىندا تۇمشالامالى شامدار اسىلىپ، ٴسۇرى ەتتىڭ حوش ٴيىسى اڭقىپ، ٴار ٴۇيدىڭ مورجالارىنان ٴتۇتىن بۋداقتاپ، تاماشا تۇرمىس كەشىرىپ جاتقاندارى ٴبىلىنىپ تۇر. قىستاق تۇرعىنى جاۋ يۇيشۋە ۇيىندە ايەلىمەن بىرگە اس دايىنداۋمەن ابىگەرلەنىپ ٴجۇر. 2 جىلدىڭ الدىنداعى كوكتەم مەرەكەسى قارساڭىندا، باس شۋجي شي جينپيڭ حۋا-ۋ قىستاعىنداعى مياۋزۋ تۇرعىنداردىڭ وتباسىنا باردى. قونىس جاڭالاپ كوشىپ كەلگەن قىستاق تۇرعىنى جاۋ يۇيشۋەنىڭ وتباسىندا باس شۋجي ٴۇي ىشىندەگىلەرمەن بىرگە جەرگىلىكتى ٴداستۇرلى مەرەكەلىك تاعام بولعان حۋاڭبا نانىن جاسادى ٴارى جەرگىلىكتى كادرلارعا اۋىل ـ قىستاق كاسىبىن بەلسەنە دامىتىپ، بۇقارانىڭ ۇيىنە تاياۋ ماڭدا جۇمىسقا ورنالاسۋىنا قولايلىلىق جاساپ، بۇقارانىڭ كىرىس كوزىن تابۋىنا ٴارى وتباسىنان ۇزاماۋىنا مۇمكىندىك جاساۋدى تاپسىردى.

 

 2 جىلدان بەرى، حۋا ـ ۋ قىستاعىنداعىلار ۋجياڭ وزەنىنىڭ قاينار كوزى ساياحات بايلىعىنا سۇيەنە وتىرىپ اۋىل ـ قىستاق ساياحاتىن دامىتتى، سارى سيىر باعىمشىلىعى، سارى جەمجەمىل ەگىمشىلىگى، حۋاڭبا نانىن جاساۋ كاسىبى دە اۋىل ـ قىستاق ساياحاتى دامۋىنىڭ ارقاسىندا داڭقى شىعىپ، حۋا ـ ۋ قىستاعىنداعى تۇرعىنداردى اۋقاتتانۋعا باستاعان ەرەكشە تىرەكتى كاسىپكە اينالدى. جاۋ يۇيشۋە قىستاقتاعى كوپتەگەن تۇرعىندار سياقتى شارۋالار شاتتىعى ساياجايىن اشتى.

 

 مەكەنىندە-اق كاسىپتەنىپ، كىرىس كوزىن تاپقان جاۋ يۇيشۋە عانا ەمەس. مياۋزۋ كەستەشىلىگىمەن كەدەيلەردى سۇيەمەلدەۋ سەحىنىڭ جاۋاپتىسى ياڭ ۋىنلي قارشادايىنان ٴداستۇرلى كەستەشىلىك ونەرىن ۇيرەنگەن بولاتىن، سىرت جەرگە بارىپ بىرنەشە جىل جۇمىس ىستەگەننەن كەيىن، ول جۇبايىمەن بىرگە جيعان-تەرگەن بارلىق 20 مىڭ يۋان اقشالارىن جۇمساپ وتكەرمەلەنگەن كەستە ماشيناسىن ساتىپ الىپ اۋىلىنا قايتىپ كاسىپ جاراتتى ٴارى حۋا ـ ۋ قىستاعىنىڭ كەستەشىلىكپەن كەدەيلەردى سۇيەمەلدەۋ سەحىنىڭ سەركەسى بولىپ شىقتى. باس شۋجيدىڭ كەدەيلەردى سۇيەمەلدەۋ سەحىنە كەلىپ، مياۋزۋ ۇلتىنىڭ بايىرعى كەستەشىلىك مادەنيەتىن جالعاستىرۋعا كوڭىل ٴبولىپ، ٴجون سىلتەگەندىگىنە 2 جىل وتسە دە، ول سول شاقتى ەسكە العاندا تەبىرەنبەي تۇرا المايتىندىعىن ايتتى. وسى سەنىممەن ياڭ ۋىنلي ىلگەرىندى-كەيىندى بىرنەشە جوبالاۋشىنى مياۋزۋ كەستەشىلىگىنىڭ جاڭا ونىمدەرىن زەرتتەپ اشۋعا ۇسىنىس ەتتى، تاعى ٴبىر جاعىنان گۋاڭجوۋداعى ٴبىر كيىم-كەشەك كاسىپورنىمەن سەلبەسىپ، مياۋزۋ كەستەسىن وسىزامان كيىم-كەشەكتەرىنە ورنەكتەدى ٴارى كەستەشى كەلىنشەكتەردى باستاپ ونىمدەرىن جەلىدە ساتۋدىڭ جاڭا ٴتاسىلىن تاپتى. ەكى جىلدا جىلىنا 1000 نان استام تاپسىرىستى ورىنداپ، جىلدىق ٴونىم قۇنىن 1 ميلليون يۋاننان اسىردى، 50 نەشە جەرلىك جەلەكتى مياۋزۋ كەستەشىلىك ونەرىنە سۇيەنىپ تىڭ تۇرمىستارىن باستادى.

 

 بۇگىنگى تاڭدا، گۇيجوۋداعى مياۋزۋ ۇلتىنىڭ كەستەشىلىك كاسىبى جاقسى دامىعان كوپتەگەن قىستاق بەيزاتتىق كورمە سارايىن قۇرىپ، مياۋزۋ كەستەشىلىك ونەرىنە مۇراگەرلىك ەتتى ٴارى توراپتا تىكە تاراتۋ ارقىلى جاس تۇتىنۋشىلاردى باۋراپ، مياۋزۋ كەستەشىلىك كاسىبىن قارىشتاپ دامىتتى، ونىمدەرى باسقا ولكەلەرگە، اۋەلى شەتەلدەرگە دەيىن كوپتەپ ساتىلدى. 

 

 كوكتەم مەرەكەسى قارساڭىندا، قىستاق تۇرعىندارى ۇيىمداستىرىپ قۇرعان حۋا-ۋ قىستاعىنىڭ ٴان-ٴبي ۇيىرمەسى ياڭ ۋىنليدىڭ مياۋزۋ كەستەشىلىگى سەحىنە نەشە ونداعان ساحىنالىق كيىمدەر تىگۋدى تاپسىرىپ، الىستان كەلگەن قوناقتاردى قارسى الۋعا دايىندالدى. قىسقى كۇننىڭ شۇلەن شۇعىلاسىندا، مياۋزۋ ۇلتىنىڭ ەر-ايەلدەرى كەستەسى كۇردەلى، كوزدىڭ جاۋىن الاتىن ۇلتتىق كيىمدەرىن كيىپ، الاڭدا ٴان ايتىپ، ٴبي بيلەپ، وسى داۋىردەگى باقىتتى تۇرمىستارىن جىرلاپ، وسى داۋىرگە ٴتان سەنىمدەرىن بيلەرىمەن ايگىلەدى. 

 

اۋدارعان: امانتاي مۇسايىپ ۇلى